លោក ដាន់តេ ហាន់ រដ្ឋមន្ត្រីក្រសួងពាណិជ្ជកម្មអូស្ត្រាលី បាននិយាយនៅក្នុងសេចក្តីថ្លែងការណ៍មួយថា អូស្ត្រាលីជំទាស់នឹងការប្រើប្រាស់ការបង្ខិតបង្ខំផ្នែកសេដ្ឋកិច្ច និងការអនុវត្តពាណិជ្ជកម្មបែបរើសអើង និងរឹតត្បិត ដែលបំផ្លាញដល់ប្រព័ន្ធពាណិជ្ជកម្មអន្តរជាតិស្របតាមច្បាប់ និងបណ្តាលឱ្យមានផលប៉ះពាល់ដល់សេដ្ឋកិច្ច។
លោកបន្ថែមថា ទីក្រុងកង់បេរ៉ា មានចំណាប់អារម្មណ៍យ៉ាងខ្លាំងចំពោះបញ្ហាដែលបានលើកឡើងនៅក្នុងជម្លោះ ដែលលើកមកដាក់លើតុរកដំណោះស្រាយ ដោយសហភាពអឺរ៉ុបប្រឆាំងនឹងប្រទេសចិន ហើយចង់ស្នើសុំចូលរួមក្នុងការពិគ្រោះយោបល់ជុំវិញសំណុំរឿងនេះផង។
គួររំឭកថា សហភាពអឺរ៉ុបកាលពីថ្ងៃសុក្រ បាននាំយកសំណុំរឿងដែលចិនបិទខ្ទប់ការនាំចូលផលិតផលរបស់ប្រទេសលីទុយអានី ទៅកាន់អង្គការពាណិជ្ជកម្មពិភពលោក ដោយអឺរ៉ុបបានប្ដឹងចោទប្រកាន់ក្រុងប៉េកាំងថា កំពុងធ្វើឲ្យខូចដល់ទីផ្សាររួមរបស់តំបន់អឺរ៉ុបទាំង២៧ប្រទេស។
អត្ថបទគួរអាន
ចិនបានរាំងខ្ទប់ការនាំចូលទំនិញពីប្រទេសលីទុយអានី ចាប់តាំងពីពេលដែលប្រទេសអឺរ៉ុបមួយនេះបានអនុញ្ញាតឲ្យកោះតៃវ៉ាន់មានការិយាល័យតំណាងនៅក្នុងប្រទេសមួយរបស់ខ្លួន។ ជាងនេះទៅទៀត ប្រទេសចិនកំពុងដាក់សម្ពាធលើក្រុមហ៊ុនអន្តរជាតិ ឱ្យបោះបង់ចោលការប្រើប្រាស់ផលិតផលពីប្រទេសលីទុយអានីនៅក្នុងការផលិតរបស់ពួកគេ ដើម្បីនាំចេញទំនិញមកទីផ្សារចិន។ បើមិនដូច្នោះទេ ពួកគេអាចប្រឈមនឹងការរឹតបន្តឹងការនាំចូល។
ប្រទេសលីទុយអានីបានសម្តែងការសាទរ និងបានថ្លែងអំណរគុណចំពោះការគាំទ្ររបស់សហភាពអឺរ៉ុបដោយបានអះអាងថា ប្រតិកម្មនេះជាសារច្បាស់ៗមួយដល់ចិន ថាសហភាពអឺរ៉ុបនឹងមិនអត់ឱនឡើយចំពោះចេតនាដាក់សម្ពាធសេដ្ឋកិច្ចក្រោមហេតុផលនយោបាយ។
យ៉ាងណាមិញ អ្នកនាំពាក្យក្រសួងការបរទេសចិន លោក ចៅ លីចៀន បានចេញមកប្រតិកម្មហើយបានចាត់ទុកការអះអាងរបស់លីទុយអានីថា គ្មានមូលដ្ឋានច្បាស់លាស់ និងមិនត្រូវសោះឡើយ។ មន្ត្រីក្រុងប៉េកាំងរូបនេះបន្តថា នេះជាបញ្ហារវាងចិន និងលីទុយអានី មិនមែនចិន និងសហភាពអឺរ៉ុបទេ។ ប៉េកាំងជំរុញឱ្យភាគីលីទុយអានី កែតម្រូវជាបន្ទាន់នូវសកម្មភាពទាំងឡាយរបស់ខ្លួន ជៀសវាងការជ្រុលខ្លួនក្លាយជាកូនអុកសម្រាប់ការចង់បាន ឯករាជ្យរបស់កោះតៃវ៉ាន់ និងប្រែជាកម្លាំងប្រឆាំងប្រទេសចិន។ ចិនអំពាវនាវឲ្យលីទុយអានី ត្រឡប់ទៅរកផ្លូវត្រឹមត្រូវនៃការប្រកាន់ខ្ជាប់នូវគោលការណ៍ចិនតែមួយវិញ៕
None
