សារព័ត៌មាន VN Express ដែលបានស្រង់សេចក្ដីថ្លែងការរបស់ក្រុមប្រឹក្សាអឺរ៉ុប បានឲ្យដឹងថា នេះគឺជាជំហានចុងក្រោយបង្អស់ សម្រាប់កិច្ចព្រមព្រៀងពាណិជ្ជកម្មសេរី អឺរ៉ុប វៀតណាម ដែលនឹងត្រូវចូលជាធរមាន។
សភាជាតិវៀតណាម រំពឹងថា កិច្ចព្រមព្រៀងនេះ នឹងបញ្ចប់ជាស្ថាពរ នៅក្នុងរដូវក្ដៅនេះ បន្ទាប់មកវានឹងត្រូវបានចូលជាធរមាន។ តាមផែនការ កិច្ចព្រមព្រៀង ពាណិជ្ជកម្មសេរី រវាងអឺរ៉ុប និងវៀតណាម ត្រូវបានកំណត់នឹងចូលជាធរមាន នៅក្នុងឆ្នាំ២០២០នេះ។
រដ្ឋមន្ត្រីក្រសួងការបរទេស និងកិច្ចការអឺរ៉ុប នៃប្រទេសក្រូអាត លោក ហ្គ័រដែន ហ្គីលីល រ៉ាមេន បាននិយាយថា “កិច្ចព្រមព្រៀងនេះ គឺជាកិច្ចព្រមព្រៀងពាណិជ្ជកម្ម ដែលពោរពេញដោយមហិច្ឆតាបំផុត ដែលមិនធ្លាប់បានធ្វើឡើយជាមួយនឹងប្រទេសកំពុងអភិវឌ្ឍន៍”។
អត្ថបទទាក់ទង!
ក្រោមកិច្ចព្រមព្រៀង ដែលបានបានចំណាយពេលចរចាអស់រយៈពេល ៨ឆ្នាំនេះ គឺនឹងតម្រូវឲ្យប្រទេសវៀតណាមនឹងត្រូវលុបចោលពន្ធគយ លើទំនិញនាំចូលពីអឺរ៉ុបរហូតដល់ទៅ ៩៩% សម្រាប់រយៈពេល១០ឆ្នាំ ហើយអឺរ៉ុបនឹងលុបចោលពន្ធ ៩៩%ដូចគ្នានេះ លើទំនិញវៀតណាម ក្នុងរយៈពេល ៧ឆ្នាំ។
សភាអឺរ៉ុប កាលពីខែកុម្ភៈ បានបោះឆ្នោតគាំទ្រកិច្ចព្រមព្រៀងពាណិជ្ជកម្មសេរីនេះ ដោយប្រទេសវៀតណាម គឺជាប្រទេសទី២ហើយនៅក្នុងតំបន់អាស៊ីអាគ្នេយ៍ បន្ទាប់ពីសិង្ហបុរី ហើយក៏ស្ថិតនៅក្នុងចំណោម ប្រទេសតិចតួចប៉ុណ្ណោះនៃប្រទេសកំពុងអភិវឌ្ឍន៍ ដែលត្រូវបានអឺរ៉ុបចុះកិច្ចព្រមព្រៀងពាណិជ្ជកម្មសេរីជាមួយ។
សូមបញ្ជាក់ថា អឺរ៉ុប គឺជាទីផ្សារនាំចេញទំនិញធំបំផុតទី ២ របស់វៀតណាម កាលពីឆ្នាំមុន បន្ទាប់ពីសហរដ្ឋអាមេរិក ដែលមានតម្លៃទឹកប្រាក់នាំចេញជាង ៤១ ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
