តាមការរាយការណ៍ដោយសារព័ត៌មាន Bloomberg បានឲ្យដឹងថា ផ្សារភាគហ៊ុនអាស៊ី និងនៅប្រទេសចិនផងដែរ នៅថ្ងៃអង្គារនេះ បានបង្ហាញពីសញ្ញាធ្លាក់ចុះ បន្ទាប់ពីថ្មីៗនេះ មានការផ្ទុះឡើងនូវវីរុសរលាកផ្លូវដង្ហើមថ្មី ឈ្មោះកូរ៉ូណា ដែលពិភពលោកកំពុងមានការព្រួយបារម្ភ និងទប់ស្កាត់យ៉ាងខ្លាំង។ ការធ្លាក់ចុះនៃទីផ្សារហ៊ុននេះ គឺបន្ទាប់ពីវិនិយោគិន បានព្យាយាមរងចាំមើលពីទំហំនៃផលប៉ះពាល់សេដ្ឋកិច្ចដោយសារវីរុសកូរ៉ូណានេះ ខណៈដែលការទិញលក់មិនមានភាពសកម្មនោះឡើយ។
ភាគហ៊ុននៅប្រទេសជប៉ុន គឺមានការខាតបង់ច្រើនជាងគេ ចាប់តាំងតែពីខែសីហា២០១៩មក ដោយសារតែមានការព្រួយបារម្ភពី សង្គ្រាមពាណិជ្ជកម្ម ហើយបច្ចុប្បន្នក៏ត្រូវប្រឈមនឹងបញ្ហាការផ្ទុះឡើងនៃវីរុសកូរ៉ូណាទៀត ពោលនៅថ្ងៃអង្គារនេះ ផ្សារភាគហ៊ុនជប៉ុន បានបន្តធ្លាក់ចុះ ០,៨%ទៀត។ រីឯ ភាគហ៊ុននៅកូរ៉េខាងត្បូង បានធ្លាក់ចុះជាង ៣% ខណៈដែលទីផ្សារហ៊ុនប្រទេសនេះ បានបើកជាថ្មី បន្ទាប់ពីឈប់សម្រាក។ ដោយឡែក ភាគហ៊ុននៅអូស្ត្រាលីវិញ ក៏មិនបង្ហាញពីភាពល្អប្រសើរនោះដែរ។ សម្រាប់ភាគហ៊ុននៅប្រទេសចិនវិញ បានធ្លាក់ចុះជិត ១% នៅថ្ងៃអង្គារនេះ បន្ទាប់ពីមានការធ្លាក់ចុះជិត៦% កាលពីថ្ងៃចន្ទ។
អត្ថបទទាក់ទង!
ចំណែកផ្សារហ៊ុនហុងកុងវិញ គ្រោងនឹងបើកឡើងវិញនៅថ្ងៃពុធសប្ដាហ៍នេះបន្ទាប់ពីឈប់សម្រាក់អំឡុងបុណ្យចូលឆ្នាំចិន ខណៈដែលការណែនាំចុងក្រោយពីទីផ្សារចិន គឺត្រូវបើកដំណើរការឡើងវិញកាលពីថ្ងៃចន្ទ។ ទន្ទឹមនឹងនេះ ប្រទេសចិននៅថ្ងៃអង្គារនេះ បានរាយការណ៍អំពីការកើនឡើងបន្ថែមទៀតនៃចំនួនអ្នកស្លាប់ និងឆ្លងមេរោគ កូរ៉ូណា ពោល គិតមកទល់នឹងម៉ោង ១ កន្លះ រសៀលថ្ងៃអង្គារ ទី២៨ មករានេះ បើតាមការរាយការណ៍ ចំនួនអ្នកស្លាប់ដោយវីរុសកូរ៉ូណានេះ បានកើនឡើងដល់ ១០៧នាក់ និងចំនួនអ្នកដែលមានផ្ទុកមេរោគនេះ មានរហូតដល់ទៅជាង៤៤០០នាក់។
អ្នកជំនាញសេដ្ឋកិច្ចបានះអាងថា ការថយចុះនៃហានិភ័យនៅក្នុងផ្សារហ៊ុន ទំនងជាមិនប្រសើរឡើងទេ រហូតទាល់តែមានការប្រកាសថា ការរាលដាលនៃវីរុសកូរ៉ូណានេះ គឺត្រូវបានគ្រប់គ្រង។ ប៉ុន្ដែ ឥឡូវនេះ កង្វះព័ត៌មានអវិជ្ជមានអំពីរឿងនេះ ដែលវាទំនងជាធ្វើឲ្យវិនិយោគិន នៅតែមានការការពារខ្លួនកាន់តែខ្លាំង មុនធ្វើការវិនិយោគ។
បើតាមសារព័ត៌មាន New York Times មិនមែនមានតែផ្សារភាគហ៊ុន អាស៊ីក៏ដូចជាចិននោះទេ បានធ្លាក់ចុះ ភាគហ៊ុននៅអាមេរិក និងអឺរ៉ុប ក៏បានបង្ហាញពីការធ្លាក់ចុះដូចគ្នា។ តួយ៉ាង គិតត្រឹមថ្ងៃចន្ទទី ២៧ មករាកន្លងទៅនេះ តម្លៃភាគហ៊ុននៅក្នុងផ្សារហ៊ុនអាមេរិក S&P 500 បានធ្លាក់ចុះជាង ១,៥% ខណៈដែលផ្សារហ៊ុនចងក្រភពអង់គ្លេស ធ្លាក់ចុះប្រមាណ២,៣%។
បើតាមការគូសបញ្ជាក់របស់ Bloomberg ក្រៅពីតម្លៃភាគហ៊ុនដាំក្បាលចុះ គេសង្កេតឃើញថា តម្លៃប្រេងឆៅក៏បានធ្លាក់ចុះដែរ ជាក់ស្ដែងទីផ្សារប្រេងឆៅដាក់លក់នៅក្នុង West Texas Intermediate បានធ្លាក់ចុះ ០,២% មកនូវតម្លៃ ប្រមាណ៥៣ដុល្លារ ក្នុងមួយបារ៉ែល។
ជាមួយគ្នានេះ តម្លៃមាស ក៏បានធ្លាក់ចុះ ០,២% ដូចទៅនឹងប្រេងឆៅដែរ ដែលមានតម្លៃមកនៅ ជាង ១៥០០ ដុល្លារ ក្នុងមួយអោន៕
None
