លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា បានប្រាប់ក្រុមការងារសារព័ត៌មាន ឌីជីថល ខេមបូណូមីស តាមប្រព័ន្ធតេឡេក្រាមថា ព្រឹត្តិការណ៍សហគមន៍ ២០កុម្ភៈ មិនបានធ្វើឲ្យរោងចក្រណាមួយ ដែលជាសមាជិករបស់សមាគមត្រូវផ្អាកដំណើរការ ឬបិទទ្វារនៅឡើយនោះទេ។ ទោះយ៉ាងណា លោកថា សមាគមក៏មានក្ដីបារម្ភខ្លះដែរ ចំពោះបញ្ហានេះ តែលោកសង្ឃឹមថា បញ្ហានេះ នឹងត្រូវដោះស្រាយបានក្នុងពេលឆាប់ៗ។
សម្រាប់ការបញ្ជាទិញថ្មីពីក្រៅប្រទេស សម្រាប់ ដើមឆ្នាំនេះ ត្រូវបានលោក កាំង ម៉ូនីកា អះអាងថា នៅតែមានការបញ្ជរទិញជាធម្មតា សម្រាប់រយៈពេលខ្លី ប៉ុន្ដែសម្រាប់ការបញ្ជាទិញរយៈពេលវែងវិញ គឺមានរូបភាពមិនច្បាស់លាស់ និង ពិបាកក្នុងការព្យាករណាស់។ ហេតុអ្វីក៏ការបញ្ជាទិញរយៈពេលវែងស្ថិតក្នុងភាពមិនច្បាស់លាស់ គឺដោយសារតែមួយផ្នែក បណ្តាលមកពីកូវីដ-១៩ និងមួយផ្នែកទៀត បណ្តាលមកពីការផ្លាស់ប្តូរនៃទីផ្សារ ដោយការកម្មង់ទិញបានផ្លាស់ប្តូរពីធំៗ រយៈពេលវែង មកជាការកម្មង់ទិញតូចៗ តែញឹកញ៉ាប់ ហើយត្រូវការបញ្ជូនទំនិញក្នុងរយៈពេលខ្លីវិញ។
ចំពោះការរំពឹងទុក សម្រាប់ការនាំចេញនៅក្នុងវិស័យកាត់ នៅឆ្នាំ២០២១នេះវិញ ត្រូវបានអគ្គលេខាធិការរងសមាគមរោងចក្រកាត់ដេរនៅកម្ពុជាអះអាងថា គឺអាស្រ័យលើស្ថានភាពកូវីដ-១៩ បើយើងទាំងអស់គ្នា ទាំងរដ្ឋនិងប្រជាពលរដ្ឋ ចូលរួមទប់ស្កាត់ការរីករាលដាលនេះបានល្អ នោះការនាំចេញរបស់យើងក៏ល្អទៅតាមនោះដែរ។
សូមបញ្ជាក់ថា ការនាំចេញ ផលិតផលកាត់ដេរ វាយនភណ្ឌ របស់កម្ពុជា កាលពីឆ្នាំ២០២០ បានថយចុះប្រមាណជាជិត១០% បើធៀបនឹងឆ្នាំ២០១៩ ដែលធ្លាប់មានទំហំទឹកប្រាក់នាំចេញដល់ទៅជាង ៩ពាន់៣រយលានដុល្លារអាមេរិក៕
