![ឯកឧត្តម វង្សី វិស្សុត ចាត់ទុកការប្រតិបត្តិល្អក្នុងការរៀបចំនិងការអនុវត្តបទប្បញ្ញត្តិ នឹងផ្ដល់បច្ច័យវិជ្ជមានដល់សង្គម-សេដ្ឋកិច្ច](https://cdn.cambonomist.com/media/images/Thumnbnail-6_MThavxM.2e16d0ba.fill-960x540.jpg)
វគ្គបណ្តុះបណ្តាលនេះរៀបចំឡើងក្នុងគោលបំណង ដើម្បីពង្រឹងសមត្ថភាព, ចែករំលែក, ផ្លាស់ប្ដូរចំណេះដឹងនិងបទពិសោធពាក់ព័ន្ធនានាជូនដល់ថ្នាក់ដឹកនាំ សមាជិក សមាជិកា និងមន្ត្រីក្រុមប្រឹក្សាអ្នកច្បាប់, ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌, អគ្គនាយកដ្ឋានចំណុះទីស្តីការគណៈរដ្ឋមន្ត្រី, ក្រសួង-ស្ថាប័ន, សភាពាណិជ្ជកម្ម, វិស័យឯកជន, អង្គការសង្គមស៊ីវិល, ស.ស.យ.ក. និង និស្សិតប្រមាណ៥០០នាក់។
ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានចាត់ទុកប្រធានបទស្តីពី «ការប្រតិបត្តិល្អនៃការតាក់តែងបទប្បញ្ញត្តិ» ពិតជាមានសារសំខាន់សម្រាប់រាជរដ្ឋាភិបាល ជាពិសេសសម្រាប់ទីស្តីការគណៈរដ្ឋមន្ត្រីដែលជាសេនាធិការក្នុងការសម្របសម្រួលការងារប្រចាំថ្ងៃរបស់គណៈរដ្ឋមន្ត្រី លើការងារពិនិត្យ និងកែសម្រួលការតាក់តែងសេចក្ដីព្រាងច្បាប់, លិខិតបទដ្ឋានគតិយុត្ដ, គោលនយោបាយ និងផែនការយុទ្ធសាស្ត្ររបស់រាជរដ្ឋាភិបាល។ ក្នុងនោះ, រាជរដ្ឋាភិបាលផ្ដោតសំខាន់លើការលើកកម្ពស់ និងការពង្រឹងប្រសិទ្ធភាពនៃច្បាប់ និងប្រព័ន្ធយុត្តិធម៌, ការលើកកម្ពស់ប្រសិទ្ធភាព, សង្គតិភាព និងអនុលោមភាពគតិយុត្តនៃការរៀបចំច្បាប់ និងលិខិតបទដ្ឋានគតិយុត្ត សំដៅធានាបាននូវភាពមានប្រយោជន៍ ភាពជឿទុកចិត្តបាន តម្លាភាព ភាពស្មើគ្នានៅចំពោះមុខច្បាប់ និងភាពដែលអាចអនុវត្តបាន ដែលជាគោលការណ៍សំខាន់ នៃការកសាងនីតិរដ្ឋក៏ដូចជាការរក្សាសុខសន្តិភាព និងការអភិវឌ្ឍប្រទេសក្នុងរយៈពេលយូរអង្វែង។
![photo_2024-05-28_20-19-03](https://cdn.cambonomist.com/media/images/photo_2024-05-28_20-19-03.original.jpg)
សម្រាប់ ឯកឧត្តម វង្សី វិស្សុត ការតាក់តែង និងការអនុវត្ដបទប្បញ្ញត្ដិមានកម្មវិបាក ឬបច្ច័យដល់ភាពប្រកួតប្រជែងនិងកំណើនសេដ្ឋកិច្ច សុខុមាលភាព និងជីវភាពរស់នៅប្រចាំថ្ងៃ ក៏ដូចជាការប្រកបធុរកិច្ចរបស់ប្រជាពលរដ្ឋ និងក្រុមហ៊ុន។ ជាក់ស្ដែង, ការអនុវត្ដបទប្បញ្ញត្តិល្អ នឹងផ្ដល់បច្ច័យវិជ្ជមានដល់សង្គម-សេដ្ឋកិច្ច ដូចជាប្រសិទ្ធភាពសេដ្ឋកិច្ចជួយការពារសិទ្ធិ និងផលប្រយោជន៍ដល់សាធារណជន ព្រមទាំងគាំទ្រដល់អន្ដរអំពើក្នុងសង្គម ដើម្បីធានាភាពច្បាស់លាស់, ភាពអាចប៉ាន់ប្រមាណបាន និងភាពយុត្ដិធម៌។ ផ្ទុយទៅវិញ ការដាក់ឱ្យអនុវត្ដបទប្បញ្ញត្តិ ដែលមិនមានលក្ខណៈអំណោយផលនឹងបង្កើនជាបន្ទុកចំណាយអនុលោមភាព, ការរឹតត្បិតសេរីភាព, និងជាពិសេសការបន្ទុចបង្អាក់នវានុវត្ដន៍ និងការបង្កើតជាវិបាកមិនល្អដល់សង្គម-សេដ្ឋកិច្ចជាយថាហេតុ។
![photo_2024-05-28_20-19-04](https://cdn.cambonomist.com/media/images/photo_2024-05-28_20-19-04.original.jpg)
ឆ្លៀតក្នុងឱកាសនេះ ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានគូសបញ្ជាក់ផងដែរថា រាជរដ្ឋាភិបាលនីតិកាលទី ៧ នៃរដ្ឋសភា ដែលដឹកនាំប្រកបដោយភាពស្វាហាប់, ថាមវន្ដ និងវាងវៃរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជាបានបន្ដ និងជំរុញលើកកម្ពស់ការប្រតិបត្តិល្អនៃការតាក់តែងបទប្បញ្ញត្តិ ដោយបានរៀបចំបង្កើតគណៈកម្មាធិការដឹកនាំកែទម្រង់ច្បាប់ ដែលជាយន្ដការដឹកនាំសម្របសម្រួល និងជំរុញការអនុវត្ដការងារកែទម្រង់ច្បាប់ ស្របតាមកម្មវិធីនយោបាយរបស់រាជរដ្ឋាភិបាលក្នុងគោលបំណងដើម្បីពង្រឹង និងលើកកម្ពស់គោលការណ៍នីតិរដ្ឋ សន្ដិសុខគតិយុត្ដ ព្រមទាំងគុណភាព និងប្រសិទ្ធភាពនៃច្បាប់។
![photo_2024-05-28_20-19-05 (2)](https://cdn.cambonomist.com/media/images/photo_2024-05-28_20-19-05_2.original.jpg)
ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានវាយតម្លៃជារួមថា ការប្រតិបត្តិល្អនៃការតាក់តែងបទប្បញ្ញត្តិទាមទារឱ្យមានការចូលរួម និងការពិគ្រោះយោបល់ជាមួយភាគីពាក់ព័ន្ធ,ការវាយតម្លៃលើផលប៉ះពាល់នៃលិខិតបទដ្ឋានគតិយុត្ត (RIA) និងអនុលោមតាមនិយាមស្ដង់ដាអន្ដរជាតិ ក្នុងការតាក់តែងសេចក្ដីព្រាងច្បាប់ លិខិតបទដ្ឋានគតិយុត្ដ និងគោលនយោបាយនានា។ ក្នុងន័យនេះ ឯកឧត្តម វង្សី វិស្សុត បានបន្តលើកឡើងថា ការពង្រឹងការប្រតិបត្តិល្អនៃការតាក់តែងបទប្បញ្ញត្តិ ត្រូវផ្ដោតលើចំណុចសំខាន់ៗ មានដូចជា៖ ទី១.ទីស្ដីការគណៈរដ្ឋមន្រ្ដី ត្រូវពង្រឹងមុខងារស្នូលគឺជាស្ថាប័នសម្របសម្រួលត្រួតពិនិត្យ និងវាយតម្លៃការតាក់តែង, ការធ្វើវិសោធនកម្ម, និរាករណ៍ច្បាប់ និងលិខិតបទដ្ឋានគតិយុត្ត ដែលមានក្រុមប្រឹក្សាអ្នកច្បាប់ និងក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ជាសេនាធិការ តាមរយៈការបង្កើតប្រព័ន្ធការងារដែលមានប្រសិទ្ធភាព និងស័ក្ដិសិទ្ធិភាព។
![photo_2024-05-28_20-19-06](https://cdn.cambonomist.com/media/images/photo_2024-05-28_20-19-06.original.jpg)
ទី២.គ្រប់ក្រសួង-ស្ថាប័ន ត្រូវអនុវត្ដវិធីសាស្រ្ដការប្រតិបត្តិល្អនៃការតាក់តែងបទប្បញ្ញត្តិ តាមរយៈការបង្កើនការយកចិត្ដដាក់លើការចូលរួមពីភាគីពាក់ព័ន្ធ, ការពិគ្រោះយោបល់ជាសាធារណៈ, ការវាយតម្លៃលើផលប៉ះពាល់នៃលិខិតបទដ្ឋានគតិយុត្ត (RIA) និងអនុលោមតាមស្ដង់ដាអន្ដរជាតិ ក្នុងការតាក់តែងសេចក្ដីព្រាងច្បាប់ លិខិតបទដ្ឋានគតិយុត្ដ និងគោលនយោបាយនានា ដើម្បីធានាដល់តម្លាភាពនៃការអភិវឌ្ឍបទប្បញ្ញត្តិ ព្រមទាំងអនុវត្ដលិខិតបទដ្ឋានគតិយុត្ដ ប្រកបដោយតម្លាភាព, ប្រសិទ្ធភាព និងការទទួលខុសត្រូវខ្ពស់។ ទី៣. គ្រប់ក្រសួង ស្ថាប័ន ត្រូវពង្រឹង និងបង្កើនសមត្ថភាពរបស់អង្គភាព និងធនធានមនុស្ស ដែលមានសមត្ថភាពស្វែងយល់អំពីការប្រតិបត្តិល្អនៃការតាក់តែងបទប្បញ្ញត្តិ, ការតាក់តែងសេចក្ដីព្រាងច្បាប់, លិខិតបទដ្ឋានគតិយុត្ដ និងគោលនយោបាយនានា និងការវិភាគសេដ្ឋកិច្ច និងសង្គម។
![photo_2024-05-28_20-19-07](https://cdn.cambonomist.com/media/images/photo_2024-05-28_20-19-07.original.jpg)
ទី៤. ក្រសួងសេដ្ឋកិច្ច និងហិរញ្ញវត្ថុ គួរផ្ដោតការយកចិត្ដទុកដាក់ក្នុងការវិភាជថវិកាគ្រប់គ្រាន់សម្រាប់ក្រសួង ស្ថាប័ន ដើម្បីធានាដល់ការអនុវត្ដការប្រតិបត្តិល្អនៃការតាក់តែងបទប្បញ្ញត្តិតាមបណ្ដាក្រសួង ស្ថាប័នទាំងអស់ និងទី៥. គ្រប់ក្រសួង-ស្ថាប័ន ត្រូវពង្រឹងយន្ដការសម្រេចចិត្ដបទប្បញ្ញត្តិដោយផ្អែកលើវិទ្យាសាស្រ្ដ ដើម្បីធានាថារាល់ការតាក់តែងសេចក្ដីព្រាងច្បាប់, លិខិតបទដ្ឋានគតិយុត្ដ និងគោលនយោបាយបែបវិទ្យាសាស្រ្ដផ្ដល់នូវសង្គតិភាព, និងភាពដែលអាចប៉ាន់ប្រមាណបាននូវលទ្ធផលនៃច្បាប់, លិខិតបទដ្ឋានគតិយុត្ដ និងគោលនយោបាយទាំងនេះ។
![photo_2024-05-28_20-19-08](https://cdn.cambonomist.com/media/images/photo_2024-05-28_20-19-08.original.jpg)
មុននឹងបញ្ចប់ ឯកឧត្តម វង្សី វិស្សុត ក៏បានលើកឡើងថា ច្បាប់អាចដើរតួជាឃ្នាស់ដែលអាចលើកកម្ពស់ការអភិវឌ្ឍសង្គម-សេដ្ឋកិច្ច ដោះស្រាយបញ្ហាសេដ្ឋកិច្ច និងលើកកម្ពស់សេដ្ឋកិច្ច ប៉ុន្តែក៏អាចដើរតួជាបន្ទុកសម្រាប់ប្រជាពលរដ្ឋ ដែលនាំឱ្យរាំងស្ទះដល់ការអភិវឌ្ឍផងដែរក្នុងករណីរៀបចំមិនបានល្អ។ ហើយអ្នករៀបចំច្បាប់ក៏ត្រូវប្រកាន់ខ្ជាប់នូវម្ខាងគឺគោលការណ៍នីតិរដ្ឋ ដែលយកច្បាប់ជាធំ ហើយម្ខាងទៀតគឺគោលការណ៍ផលប្រយោជន៍នៃច្បាប់ក្នុងសង្គម-សេដ្ឋកិច្ច ដើម្បីធានាថារាល់ច្បាប់ដែលត្រូវបានដាក់ឱ្យអនុម័ត និងអនុវត្តពិតជាជះឥទ្ធិពលល្អដល់ប្រទេសជាតិ។ ជាមួយគ្នានេះ ការរៀបចំច្បាប់នីមួយៗត្រូវមានការគិតគូរច្បាស់លាស់នៅគ្រប់ដំណាក់កាល ដោយចាប់ផ្តើមពីការយល់ដឹងអំពីគោលដៅនៃច្បាប់ ការរៀបចំ តាក់តែង អនុម័ត អនុវត្ត និងតាមដានការអនុវត្តច្បាប់៕
![photo_2024-05-28_20-19-44](https://cdn.cambonomist.com/media/images/photo_2024-05-28_20-19-44.original.jpg)
![photo_2024-05-28_20-19-45](https://cdn.cambonomist.com/media/images/photo_2024-05-28_20-19-45.original.jpg)
![photo_2024-05-28_20-19-07 (2)](https://cdn.cambonomist.com/media/images/photo_2024-05-28_20-19-07_2.original.jpg)
![photo_2024-05-28_20-19-47](https://cdn.cambonomist.com/media/images/photo_2024-05-28_20-19-47.original.jpg)
![photo_2024-05-28_20-19-41](https://cdn.cambonomist.com/media/images/photo_2024-05-28_20-19-41.original.jpg)
![photo_2024-05-28_20-19-42](https://cdn.cambonomist.com/media/images/photo_2024-05-28_20-19-42.original.jpg)
![photo_2024-05-28_20-19-43 (2)](https://cdn.cambonomist.com/media/images/photo_2024-05-28_20-19-43_2.original.jpg)
![photo_2024-05-28_20-19-43](https://cdn.cambonomist.com/media/images/photo_2024-05-28_20-19-43.original.jpg)
![photo_2024-05-28_20-19-45 (2)](https://cdn.cambonomist.com/media/images/photo_2024-05-28_20-19-45_2.original.jpg)
![photo_2024-05-28_20-19-46](https://cdn.cambonomist.com/media/images/photo_2024-05-28_20-19-46.original.jpg)