IMF ព្យាករទម្លាក់កំណើនសេដ្ឋកិច្ចអាមេរិកមកនៅត្រឹម២,៣%ប៉ុណ្ណោះ សម្រាប់ឆ្នាំ២០២២

មូលនិធិរូបិយវត្ថុអន្តរជាតិ ឬហៅកាត់ថា IMF កាលពីថ្ងៃអង្គារបានព្រមានថា សេដ្ឋកិច្ចអាមេរិកកំពុងប្រឈមកាន់តែខ្លាំងនៃការធ្លាក់ចូលទៅក្នុងវិបត្តិ។ ការព្រមានដូច្នេះ ធ្វើឡើងនៅក្រោយដែល IMF បានកាត់បន្ថយការព្យាករណ៍ថ្មីចុងក្រោយរបស់ខ្លួនសម្រាប់កំណើនសេដ្ឋកិច្ចអាមេរិកនៅឆ្នាំ២០២២ មកនៅត្រឹម ២,៣%ប៉ុណ្ណោះ ហើយ នេះជាការទម្លាក់កំណើនសេដ្ឋកិច្ចរបស់មហាអំណាចពិភពលោកអាមេរិកជាលើកទី២ហើយ ក្នុងពេលមិនដល់មួយខែផង ក្រោយ IMF កាលពីចុងខែមិថុនាបានធ្លាប់បានព្យាករណ៍សេដ្ឋកិច្ចអាមេរិកម្តងរួចមកហើយថានឹងមានកំណើន ២,៩%។

ទិន្នន័យថ្មីចុងក្រោយរបស់ IMF កត់សម្គាល់ពីកត្តាមួយចំនួន ដែលបណ្តាលឱ្យសេដ្ឋកិច្ចអាមេរិកមានកំណើនតិច ក្នុងនោះរួមមានការចំណាយរបស់អ្នកប្រើប្រាស់បានថយចុះខ្លាំង បញ្ហាប្រឈមនៃអតិផរណាខ្ពស់ និងការដំឡើងអត្រាការប្រាក់របស់ធនាគារកណ្តាលអាមេរិក។

ក្រៅពីនេះ មូនិធិរូបិយវត្ថុអន្តរជាតិIMF បានកាត់បន្ថយល្បឿននៃការធ្លាក់ចុះអតិផរណានៅអាមេរិកផងដែរ ដែលខ្លួនធ្លាប់បានប៉ាន់ស្មានកន្លងមក។ ក្នុងនោះ អតិផរណានៅអាមេរិកអាចធ្លាក់ចុះត្រឹម ១,៩%ប៉ុណ្ណោះនៅមុនត្រីមាសទី៤ ឆ្នាំ២០២៣ ខណៈដែលការព្យាករណ៍លើកមុន មានអត្រា ៦,៦% នៅត្រឹមត្រីមាសទី៤ ឆ្នាំ២០២២នេះ។

ការណ៍នេះនឹងធ្វើឱ្យកំណើនសេដ្ឋកិច្ចរបស់សហរដ្ឋអាមេរិកធ្លាក់ចុះបន្ថែមទៀត ប៉ុន្តែ IMF នៅតែព្យាករណ៍ថា សហរដ្ឋអាមេរិកនឹងអាចជៀសផុតពីវិបត្តិសេដ្ឋកិច្ច។

IMF បានអំពាវនាវឱ្យអាមេរិកពន្លឿនការអនុម័តសំណើថវិកា ចំណាយផ្នែកសង្គម និងអាកាសធាតុ ដែលកំពុងជាប់គាំងរបស់ប្រធានាធិបតីអាមេរិក Joe Biden ដោយនិយាយថា ថវិកាទាំងនេះនឹងជំរុញឱ្យមានកំណើនការងារ ដែលឈានទៅជួយបន្ធូរបន្ថយអតិផរណា។

សូមជម្រាបថា ដើម្បីទប់ទល់នឹងកម្រិតអតិផរណាដែលកើនឡើងខ្ពស់ដល់ទៅជិត ៩% រដ្ឋបាលអាមេរិកក៏កំពុងគិតគូរបន្ធូរបន្ថយការយកពន្ធ លើទំនិញខ្លះដែលនាំចូលមកពីប្រទេសចិនផងដែរ។ ប៉ុន្តែមកទល់នឹងពេលនេះ ពុំទាន់មានការប្រកាសជាផ្លូវការណាមួយនៅឡើយទេ៕