ទីភ្នាក់ងារទេសចរណ៍អង្គការសហប្រជាជាតិ បានឱ្យដឹងថា នៅក្នុងឆ្នាំ២០២៤ ប្រទេសជប៉ុន បានវ៉ាដាច់ប្រទេសថៃ ក្លាយជាគោលដៅទេសចរណ៍ដ៏ដាក់ទាញសម្រាប់ភ្ញៀវទេសចរអន្តរជាតិ ដោយប្រទេសនេះបានស្វាគមន៍ភ្ញៀវទេសចរអន្តរជាតិ រហូតដល់ជាង៣៦លាននាក់ ខណៈថៃ ទទួលបានជាង៣៥លាននាក់។ ភ្ញៀវទេសចរអន្តរជាតិ ដែលទៅកម្សាន្តនៅប្រទេសជប៉ុន ភាគច្រើនជាជនជាតិចិន។
យោងតាមរបាយការណ៍ពីក្រុមហ៊ុន Trip.com Group ដែលជាទីភ្នាក់ងារទេសចរណ៍អនឡាញដ៏សំខាន់មួយបានឱ្យដឹងថា នៅក្នុងអំឡុងថ្ងៃឈប់សម្រាកនៃពិធីបុណ្យចូលឆ្នាំថ្មីប្រពៃណីចិន ដែលទើបបញ្ចប់កាលពីពេលថ្មីៗ ការធ្វើដំណើរចេញចូលប្រទេសចិន បានកើនឡើង៣០% នៅឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ដោយជប៉ុនបានក្លាយជាគោលដៅទេសចរណ៍ដ៏ទាក់ទាញបំផុតសម្រាប់ភ្ញៀវទេសចរចិន។
យ៉ាងណាមិញបើតាមទីភ្នាក់ងារទេសចរណ៍ Tongcheng Travel ក្រៅពីទេសចរចិន ប្រទេសជប៉ុន ក៏ជាគោលដៅទេសចរណ៍អន្តរជាតិ ដ៏ទាក់ទាញសម្រាប់ភ្ញៀវទេសចរម៉ាឡេស៊ី សិង្ហបុរី កូរ៉េខាងត្បូង និងថៃ ផងដែរ។
ការបញ្ចុះតម្លៃសំបុត្រយន្តហោះបានរួមចំណែកដ៏សំខាន់ដល់ការកើនឡើងការធ្វើដំណើរកម្សាន្តទេសចរណ៍នៅក្រៅប្រទេសរបស់ប្រជាជនចិន។ បើតាមទិន្នន័យរបស់រដ្ឋបាលអាកាសចរណ៍ស៊ីវិលចិន ជើងហោះហើរអន្តរជាតិ ជាមធ្យមមានជិត២ពាន់ជើងបានដំណើរការជារៀងរាល់ថ្ងៃនៅក្នុងពិធីបុណ្យចូលឆ្នាំចិន ដោយកើនឡើង២៤,៦% បើធៀបនឹងរយៈពេលដូចគ្នានៅក្នុងឆ្នាំ២០២៤។
ក្រុមហ៊ុនអាកាសចរណ៍ចិន China Eastern Airlines បានបង្កើនជើងហោះហើររបស់ខ្លួនទៅប្រទេសជប៉ុន៥៤% ជាមួយនឹងបរិមាណអ្នកដំណើរកើនឡើងជាង៧១% នៅឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។ ចំណែកក្រុមហ៊ុនអាកាសចរណ៍ចិន Spring Airlines បានរាយការណ៍ថា មានការកើនឡើង៧៦% ក្នុងការធ្វើដំណើរទៅក្រៅប្រទេស៕
អត្ថបទ៖ សុខ មង្គល
