អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកនៃក្រុមហ៊ុន World Bridge Group បានគូសបញ្ជាក់ថា ឃ្លាំងត្រជាក់ស្តុកទំនិញនេះ មិនត្រឹមតែជួយរក្សាគុណភាពទំនិញ និងសុខុមាលភាពអ្នកប្រើប្រាស់នោះទេ តែការសាងសង់ឃ្លាំងត្រជាក់នេះ ក៏បានចូលរួមអភិវឌ្ឍវិស័យដឹកជញ្ជូន និងឡូជីស្ទីក នៅកម្ពុជា ឲ្យកាន់តែប្រសើរឡើងផងដែរ។
ស្ថិតក្នុងតំបន់កំពុងអភិវឌ្ឍន៍ តំបន់សេដ្ឋកិច្ចពិសេស Kerry WorldBridge ផ្ដោតសំខាន់លើវិស័យដឹកជញ្ជូន និងឡូជីស្ទីក ពិសេសការសាងសង់ឃ្លាំងត្រជាក់ដែលមានស្តង់ដារដំបូងគេនៅកម្ពុជា ដែលអាចរក្សានូវគុណភាពទំនិញសម្រាប់ចែកចាយប្រកបដោយគុណភាព និងប្រសិទ្ធភាពខ្ពស់។ បើតាមអ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកនៃក្រុមហ៊ុន World Bridge Group បានបញ្ជាក់ថា ការសាងសង់ឃ្លាំងត្រជាក់ស្តុកទំនិញ ក្នុងតំបន់សេដ្ឋកិច្ចពិសេស ផ្ដោតសំខាន់លើការគិតគូនូវសុខុមាលភាពអ្នកប្រើប្រាស់ ក៏ដូចជា រក្សានូវគុណភាពទំនិញឲ្យដូចដើម។ ជាមួយគ្នានេះ អ្នកឧកញ៉ា សៀ ឬទ្ធី បានគូសបញ្ជាក់ដែរថា នៅកម្ពុជា មានការសាងសង់ឃ្លាំងត្រជាក់ច្រើនក៏ពិតមែន តែសម្រាប់ឃ្លាំងត្រជាក់នៅតំបន់សេដ្ឋកិច្ចពិសេស Kerry WorldBridge មានលក្ខណៈខុសប្លែកពីគេ ព្រោះមានស្តង់ដារខ្ពស់ អាចរក្សាទុកនូវគុណភាពទំនិញគ្រប់ប្រភេទ ដូចជា ថ្នាំពេទ្យ ម្ហូបអាហារ និងផលិតផលកសិកម្ម ជាដើម។
អត្ថបទគួរអាន
បើតាមអ្នកឧកញ៉ា សៀ ឫទ្ធី ប្រទេសជិតខាងដែលមានការជឿនលឿននៅក្នុងវិស័យដឹកជញ្ជូន សុទ្ធតែមានការសាងសង់ឃ្លាំងត្រជាក់សម្រាប់ស្ដុកទំនិញបែបនេះ។ ដោយឡែក សម្រាប់កម្ពុជា វិញ ការសាងសង់នូវឃ្លាំងត្រជាក់ដែលមានស្ដង់ដារនេះ គឺដើរតួនាទីសំខាន់ណាស់ក្នុងការ ការចូលរួមអភិវឌ្ឍវិស័យឡូជីស្ទិក និងទាក់ទាញអ្នកវិនិយោគ ទាំងក្នុង និងក្រៅស្រុកសម្រាប់កម្ពុជា។ អ្នកឧកញ៉ា សៀ ឫទ្ធី ក៏បានសង្កត់ធ្ងន់ទៀតថា Kerry WorldBridge គឺជាផ្នែកមួយនៃអេកូស៊ីស្ទីម របស់វិស័យដឹកជញ្ជូនអាចជួយផ្គត់ផ្គង់ និងចែកចាយ ទំនិញសម្រាប់អតិថិជន ដែលមានថ្លៃដើមទាប។
សូមបញ្ជាក់ថា តំបន់សេដ្ឋកិច្ចពិសេស Kerry WorldBridge គឺជាការវិនិយោគរួមគ្នារវាងក្រុមហ៊ុនក្នុងស្រុក Worldbridge International Cambodia និងក្រុមហ៊ុន Kerry Logistics ដែលជាក្រុមហ៊ុនដឹកជញ្ជូនដ៏ធំនៅអាស៊ី ដែលបានបោះទុនវិនិយោគជាង ១០០លានដុល្លារ ស្ថិតនៅបណ្តោយផ្លូវជាតិលេខ២ ចម្ងាយ២គីឡូម៉ែត្រពីស្ពានព្រែកហូរ ក្រុងតាខ្មៅ។ តំបន់សេដ្ឋកិច្ចពិសេសនេះ ក៏បានដើតួនាទីយ៉ាងសំខាន់ផងដែរ សម្រាប់តភ្ជាប់សេដ្ឋកិច្ច និងពាណិជ្ជកម្មកម្ពុជាក្នុងក្របខ័ណ្ឌសហគមន៍សេដ្ឋកិច្ចអាស៊ាន៕
None
