លោកប្រាក់ សុខុន រដ្ឋមន្រ្តីក្រសួងការបរទេស បាននិយាយតាមហ្វេសប៊ុក កាលពីថ្ងៃទី២៦ ខែមីនា ឆ្នាំ២០២០ថា ម៉ាឡេស៊ីបានបញ្ជូនយន្តហោះពិសេសមួយគ្រឿងមកទទួលជនជាតិគាត់ ដែលជាប់នៅកម្ពុជាចំនួន ១១១ នាក់ ដោយសារតែការលុបគ្រប់ជើងហោះហើរទាំងអស់តាមបទបញ្ជាគ្រប់គ្រងការធ្វើដំណើររបស់រដ្ឋាភិបាលម៉ាឡេស៊ី ។
លោកប្រាក់ សុខុន បាននិយាយដូច្នេះថា “ជាមួយនេះ យើងក៏បានសម្របសម្រួលឲ្យពលរដ្ឋយើងចំនួន ៦នាក់ដែលជាប់នៅម៉ាឡេស៊ីបានធ្វើដំណើរតាមយន្តហោះពិសេសនេះត្រឡប់មកកម្ពុជាវិញដែរ។”
លោកប្រាក់ សុខុនបាននិយាយថា ពលរដ្ឋកម្ពុជាទាំង៦នាក់នោះ បានទៅធ្វើតេស្តនៅមន្ទីរពេទ្យចាក់អង្រែពេលមកដល់ភ្លាម។
អត្ថបទទាក់ទង!
លោក Hugo Wavrin អ្នកផ្តល់ប្រឹក្សាផ្នែកនយោបាយ និងសារព័ត៌មាននៅស្ថានទូតបារាំងប្រចាំនៅកម្ពុជា បានប្រាប់សារព័ត័មានរ៉យទ័រ នៅថ្ងៃសុក្រ ទី២៧ ខែមីនា ឆ្នាំ២០២០នេះថា ជនជាតិបារាំង ចំនួន ៤១៣នាក់ បានចាកចេញពីកម្ពុជាហើយ កាលពីថ្ងៃទី២៦ ខែមីនា ឆ្នាំ២០២០ តាមរយ:ជើងយន្តហោះពិសេស។
លោក Hugo Wavrin បាននិយាយប្រាប់រ៉យទ័របន្តថា ថាជនជាតិបារាំងចំនួន ១០០ នាក់ផ្សេងទៀត នឹងចាកចេញពីប្រទេសកម្ពុជានៅថ្ងៃសៅរ៍នេះ ហើយមនុស្សជាច្រើននឹងចាកចេញនៅក្នុងរយៈពេលប៉ុន្មានថ្ងៃខាងមុខទៀតតាមជើងហោះហើរពាណិជ្ជកម្មធម្មតា។
យោងតាមក្រសួងសុខាភិបាលកម្ពុជា គិតត្រឹមថ្ងៃទី២៦ ខែមីនាឆ្នាំ២០២០ ករណីវិជ្ជមានកូវីដ១៩ សរុបទាំងអស់មានចំនួន ៩៨នាក់ ដោយក្នុងនោះមានចំនួន ១១នាក់ បានជាសះស្បើយ៕
None
