សំណើសម្រាប់ លើកលែងពន្ធឧស្ម័ន ដើម្បីទប់ទល់នឹងអតិផរណា បាននិងកំពុងដំណើរការបន្តិចម្តងៗនៅក្នុងសភា និងតាមរដ្ឋធានី តាំងតែមុនពេលរុស្ស៊ីឈ្លានពានអ៊ុយក្រែនទៅទៀត ប៉ុន្តែ ដោយសារតម្លៃឧស្ម័នហាក់កើនឡើងកាន់តែខ្ពស់នៅក្នុងសប្ដាហ៍នេះ ចំពេលតម្លៃកើនឡើងជាមធ្យមដល់ជាង ៤ដុល្លារ ២៥សេនក្នុងមួយហ្គាឡុង ឬស្មើនឹងជិត៤លីត្រ។ ដូចនេះហើយ ទើបអភិបាលក្រុងនីមួយៗនៅសហរដ្ឋអាមេរិកកំពុងជំរុញពន្លឿនសំណើផ្អាកយកពន្ធងហ្គាសនេះ។
ថ្នាក់ដឹកនាំមកពីគណបក្សសាធារណរដ្ឋនៅក្នុងរដ្ឋ Michigan និង Pennsylvania បានប្រកាសពីសំណើកាលពីថ្ងៃពុធ ដើម្បីផ្អាក ឬកាត់បន្ថយពន្ធឧស្ម័នរបស់រដ្ឋ។ ការប្រកាសនេះ បានកើតឡើងបន្ទាប់ពីអភិបាលរដ្ឋ Georgia មកគណបក្សសាធារណរដ្ឋ និងអភិបាលរដ្ឋកាលីហ្វ័រញ៉ា មកពីគណបក្សប្រជាធិបតេយ្យ បានអំពាវនាវឱ្យមានការបន្ធូរបន្ថយពន្ធឧស្ម័នរដ្ឋដូចគ្នាផងដែរ ជាពិសេសនៅពេលដែលប្រធានាធិបតីលោក ចូ ប៉ៃដិន បានបញ្ជាឱ្យកាត់ផ្ដាច់សរសៃរឈាមសេដ្ឋកិច្ចរុស្ស៊ី ដោយហាមឃាត់ការនាំចូលប្រេងពីរុស្ស៊ី។
អត្ថបទទាក់ទង!
ជាមួយគ្នានេះ អភិបាលរដ្ឋផ្សេងៗទៀតក៏បានផ្ញើលិខិតរួមមួយទៅកាន់មេដឹកនាំសភា ដោយជំរុញឱ្យពួកគេគាំទ្រសំណើផ្អាកការពន្ធហ្គាសនេះរហូតដល់ចុងឆ្នាំ២០២២។ សូមបញ្ជាក់ថា រដ្ឋភិបាលអាមេរិកបានយកពន្ធជាង ១៨សេនក្នុងហ្គាសមួយហ្គាឡុង ឬស្មើនឹងជិត៤លីត្រ។
តែយ៉ាងណាមិញ ក៏មានអ្នករិះគន់លើសំណើនេះដែរ ដោយលើកឡើងថា វាមិនមានការធានាថាការសន្សំប្រាក់ពីការកាត់បន្ថយពន្ធឧស្ម័ននឹងទៅដល់អ្នកប្រើប្រាស់នោះទេ ហើយគេបារម្ភថាការផ្អាកការយកពន្ធឧស្ម័នអាចប៉ះពាល់ដល់មូលនិធិសម្រាប់គម្រោងអភិវឌ្ឍហេដ្ឋរចនាសម្ព័ន្ធផ្លូវថ្នល់ផងដែរ ។
សូមជម្រាបថា យោងតាមរបាយការណ៍ឆ្នាំ ២០២០ ពីសមាគមអ្នកសាងសង់ផ្លូវ និងដឹកជញ្ជូនរបស់អាមេរិកបានឱ្យដឹងថា ជាមធ្យម មានត្រឹមតែប្រហែលមួយភាគបីនៃតម្លៃនៃការកាត់បន្ថយពន្ធ ឬការដំឡើងពន្ធពីមុនប៉ុណ្ណោះត្រូវបានបញ្ជូនទៅអ្នកប្រើប្រាស់៕
អត្ថបទ៖ ស៊ើង និមល់
None
