មូលធនទីផ្សារនៃវិស័យធនាគារត្រូវបានព្យាករថា អាចកើនឡើង៧ទ្រីលានដុល្លារនៅប៉ុន្មានឆ្នាំខាងមុខ

ក្រុមហ៊ុនប្រឹក្សាយោបល់អន្តរជាតិ Boston Consulting Group (BGC) បានលើកឡើងតាមរយៈរបាយការណ៍សិក្សាមួយកាលពីពេលថ្មីៗនេះថា មូលធនទីផ្សារនៃវិស័យធនាគារទូទាំងពិភពលោកអាចកើនឡើងចំនួន៧ទ្រីលានដុល្លារ ក្នុងពេល៥ឆ្នាំខាងមុខ ប្រសិនបើធនាគារធំៗចាត់វិធានការសំខាន់ៗ ដើម្បីជំរុញកំណើន និងផលិតភាពរបស់ខ្លួន។

ក្រុមហ៊ុនអន្តរជាតិមួយនេះនិយាយទៀតថា បណ្ដាធនាគារអាចនឹងបង្កើនមូលធនទីផ្សារបច្ចុប្បន្នរបស់ខ្លួនទ្វេដង ប្រសិនបើស្ថាប័នទាំងនោះបន្តសម្រេចបានកំណើន ហើយតម្លៃភាគហ៊ុនរបស់ពួកគេហក់ឡើង បើទោះបីជាប្រឈមឧបសគ្គខ្លះៗក៏ដោយចុះ។

ក្រុមហ៊ុនប្រឹក្សាយោបល់អន្តរជាតិ Boston Consulting Group (BGC) បាននិយាយថា ការធ្លាក់ចុះប្រាក់ចំណេញយ៉ាងខ្លាំងជាកត្តាដ៏ធំបំផុត ដែលជំរុញឱ្យមានទុទិដ្ឋិនិយមចំពោះវិស័យធនាគារ។

ក្រុមហ៊ុននេះបានគូសបញ្ជាក់ថា ទោះបីជាធនាគារវិនិយោគលើផលិតភាព និងធ្វើឱ្យអាជីវកម្មរបស់ខ្លួនកាន់តែមានភាពងាយស្រួលសម្រាប់អតិថិជនយ៉ាងណាក៏ដោយ ក៏ប្រាក់ចំណេញរបស់ធនាគារនឹងនៅតែទទួលរងសម្ពាធពីលក្ខខណ្ឌតម្រូវឱ្យមានដើមទុនកាន់តែខ្ពស់ និងការប្រកួតប្រជែងកាន់តែខ្លាំងពីបណ្ដាគូប្រជែងថ្មីៗដូចជាក្រុមហ៊ុនបច្ចេកវិទ្យាហិរញ្ញវត្ថុ (FinTech) ជាដើម។ ក្រុមហ៊ុនប្រឹក្សាយោបល់នេះបានលើកឡើងថា ធនាគារនានាទំនងជាមិនអាចទទួលបានប្រាក់ចំណេញ និងមូលធនទីផ្សារដូចកម្រិតមុនពេលផ្ទុះវិបត្តិហិរញ្ញវត្ថុពិភពលោកវិញបាននោះឡើយក្នុងពេលឆាប់ៗនេះ៕

អត្ថបទ៖ សុខ ជា