យោងតាមប្រភពដដែល កញ្ចប់សេវាកម្មគិតថ្លៃខាងលើទាំងសម្រាប់ Instagram និង Facebook ដែលនឹងត្រូវដាក់ឱ្យដំណើរការនៅចុងសប្តាហ៍នេះ គឺរួមបញ្ចូលទាំងការការពារបន្ថែមប្រឆាំងនឹងការក្លែងបន្លំគណនីទៀតផង ហើយនឹងមានតម្លៃចាប់ពីប្រមាណ ១២ ដុល្លារក្នុងមួយខែសម្រាប់ការប្រើប្រាស់លើគេហទំព័រ ឬប្រមាណ ១៥ ដុល្លារក្នុងមួយខែ សម្រាប់ប្រើនៅលើប្រព័ន្ធ iOS និង Android។
សេវាកម្ម Meta Verified នឹងត្រូវដាក់ឱ្យប្រើប្រាស់នៅក្នុងប្រទេសអូស្ត្រាលី និងញូហ្សេលេន ក្នុងសប្តាហ៍នេះ ហើយក៏កំពុងបើកដំណើរការជាបណ្តើរៗនៅក្នុងប្រទេសផ្សេងទៀត ជាបន្តបន្ទាប់។ វាមិនមែនជារឿងថ្មីនោះទេ សម្រាប់បណ្ដាញសង្គម ដែលដាក់ឱ្យប្រើប្រាស់សេវាកម្មបែបនេះជាមួយនឹងការបង់ប្រាក់នោះ ថ្មីៗនេះ Twitter ក៏ដាក់ចេញសេវាកម្មបែបនេះផងដែរ ខណ:ដែល Telegram បានដាក់ចេញវាកាលពីឆ្នាំមុន និងកំពុងទទួលបានការគាំទ្រយ៉ាងច្រើនផងដែរ។ Twitter ប្រកាសឲ្យប្រើប្រាស់កម្មវិធី Twitter Blue កាលពីខែមុនដែលនឹងមានតម្លៃ ១១ ដុល្លារក្នុងមួយខែផងដែរ។
អត្ថបទគួរអាន
លោក Mark Zuckerberg ដែលជានាយកប្រតិបត្តិរបស់ប្រព័ន្ធផ្សព្វផ្សាយសង្គមដ៏ធំមួយនេះ បាននិយាយថា លោកគ្រោងនឹងចេញផលិតផលថ្មីជាច្រើនបន្តទៀតដែលនឹង ផ្តល់អានុភាពឲ្យអ្នកបង្កើតមាតិកាទូទាំងសកលលោកមានភាពច្នៃប្រឌិតកាន់តែច្រើន និងដោយមិនបារម្ភពីការក្លែងបន្លំ។
យ៉ាងណាក៏ដោយចុះ ការដាក់ចេញនូវសេវាថ្មីនេះ វាត្រូវបានគេមើលឃើញថា គឺជាយុទ្ធសាស្ត្រថ្មីមួយ ក្នុងការប្រមូលចំណូលសម្រាប់ក្រុមហ៊ុន Meta ដ្បិតថា ក្រុមហ៊ុនយក្សរបស់អាមេរិកមួយនេះ កន្លងមកមានការប្រកាសពីការខាតបង់ប្រាក់ចំណូលរបស់ខ្លួនជាច្រើន ដោយសារតែមានការចំណាយខ្ពស់ទៅលើគម្រោង Metaverse។ មិនតែប៉ុណ្ណោះក្រុមហ៊ុនបណ្ដាញសង្គមយក្សមួយនេះក៏ស្ថិតនៅក្នុងចំណោមក្រុមហ៊ុនបច្ចេកវិទ្យាយក្សៗរបស់អាមេរិកផ្សេងទៀត ដែលមានគម្រោងកាត់បន្ថយបុគ្គលិកជាច្រើន ដោយសារតែបញ្ហាធ្លាក់ចុះនៃប្រាក់ចំណូល ចំពេលសេដ្ឋកិច្ចសាកលកំពុងមានភាពអាប់អ៊ួកាន់តែខ្លាំងផងដែរ៕
