អត្ថបទទាក់ទង
បើទោះបីជាកូវីដ-១៩ បង្កគ្រោះថ្នាក់យ៉ាងណាក៏ដោយ តែជាសំណាងដែរដែលបច្ចេកវិទ្យាបាននិងកំពុងដើរតួនាទីយ៉ាងសំខាន់ ដើម្បីជួយដល់មនុស្សក្នុងការកាត់បន្ថយការជួបជុំគ្នា ដោយគេអាចធ្វើការងារ និងទំនាក់ទំនងគ្នាពីចម្ងាយបាន ។ ឧទាហរណ៍មួយក្នុងចំណោមនេះ គឺ អេស៊ីលីដាម៉ូបាល ដែលជាប្រព័ន្ធធនាគារឌីជីថលដ៏ទំនើប ជួយអតិថិជនបានគ្រប់ពេលវេលានៅក្នុងស្ថានភាពលំបាកបែបនេះ ។
លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ នៃធនាគារ អេស៊ីលីដា ភីអិលស៊ី បានមានប្រសាសន៍ឱ្យដឹងថា ជាមួយនឹង អេស៊ីលីដាម៉ូបាល អតិថិជនអាចធ្វើការបញ្ចូលទឹកប្រាក់ទូរសព្ទ ផ្ទេរប្រាក់ ទូទាត់ប្រាក់តាម QR Code ដកប្រាក់ដោយមិនប្រើកាត (Cardless) ដកប្រាក់រហ័ស (Quick Cash) បង់ថ្លៃទឹក-ភ្លើង, បង់ពន្ធ, ចែកគ្នាទូទាត់វិក្កយបត្រ (Share Bill), ទារប្រាក់ពីអ្នកជំពាក់, ស្នើសុំប្រាក់កម្ចី, បង់ថ្លៃសាលា ចូលបុណ្យដោយស្កេន QR Code និងបង់ការចំណាយសព្វបែបសព្វយ៉ាង ពីអេស៊ីលីដាម៉ូបាល ។
លោកស្រីនាយិកាបានបន្ថែមថា ៖ «អ្វីដែលកាន់តែពិសេសថែមទៀត គឺថា ជាមួយ អេស៊ីលីដាម៉ូបាល អតិថិជនអាចផ្ទេរប្រាក់បានរហូតដល់ $២០០,០០០ (២សែនដុល្លារអាមេរិក) ឯណោះក្នុងមួយថ្ងៃ ដែលទាំងអស់នេះ គឺមានសារៈសំខាន់មែនទែន ក្នុងការចូលរួមបញ្ចៀសនូវការឆ្លងជំងឺនាសម័យកាលនៃវិបត្តិកូវីដ-១៩ នេះ ។ មានអេស៊ីលីដាម៉ូបាលប្រើប្រាស់ ងាយស្រួល មិនចាំបាច់ទៅដល់ធនាគារ ប្រៀបបានដូចយើងមានធនាគារនៅក្នុងដៃ នៅក្នុងផ្ទះ ដូច្នេះដែរ ។»
គួររំឭកបញ្ជាក់ថា ធនាគារ អេស៊ីលីដា ភីអិលស៊ី បានដាក់ឲ្យដំណើការសេវាធនាគារឌីជីថលមុនគេបង្អស់នៅកម្ពុជា នៅឆ្នាំ២០១០ ដែលកាលណោះមានឈ្មោះថា អេស៊ីលីដា យូនីធី (ACLEDA Unity) ហើយកាលគ្រាដាក់ឲ្យប្រើប្រាស់ភ្លាមៗនាពេលនោះ មានអតិថិជនចុះឈ្មោះប្រើប្រាស់ច្រើនជាង ២០ម៉ឺននាក់ ក្នុងរយៈពេលដ៏ខ្លី ។
ហើយថ្មីៗនេះ ដោយសារតែការយកចិត្តទុកដាក់បម្រើនិងយកចិត្តទុកដាក់ស្តាប់យោបល់ល្អៗពីសំណាក់អតិថិជនជាទីគោរពនិងឆ្លាតវៃរបស់ខ្លួន នៅខែមេសា ឆ្នាំ២០១៧ អេស៊ីលីដាយូនីធី ត្រូវបានអភិវឌ្ឍដោយដាក់ឲ្យមានបម្រើសេវាថ្មីៗយ៉ាងច្រើន ដើម្បីបំពេញសេចក្តីត្រូវការ និងរួមចំណែកកាត់បន្ថយការចំណាយពេលវេលារង់ចាំ និងដើម្បីធានាបាននូវទំនុកចិត្តពីដៃគូអាជីវកម្មរបស់អតិថិជន និងកាត់បន្ថយការធ្វើដំណើរដែលមិនចាំបាច់នានា ប្រកបដោយជោគជ័យ ៕
