ទីភ្នាក់ងារថាមពលអន្តរជាតិ IEA ដំឡើងការព្យាករថា តម្រូវការប្រេងនឹងឈានដល់១,៣លានបារ៉ែលក្នុង១ថ្ងៃនៅឆ្នាំនេះ ខណៈតម្លៃប្រេងកំពុងធ្លាក់ចុះ

ទីភ្នាក់ងារថាមពលអន្តរជាតិ (IEA) ដែលមានមូលដ្ឋាននៅទីក្រុងប៉ារីស ប្រទេសបារាំង បានលើកឡើងក្នុងរបាយការណ៍ប្រេងប្រចាំខែរបស់ខ្លួនថា កំណើនតម្រូវការប្រេងនឹងវិលត្រលប់ទៅរកកំណើនខ្ពស់ជាប្រវត្តិសាស្រ្តរបស់ខ្លួន បន្ទាប់ពីមានការប្រែប្រួលខ្លាំងអំឡុងវិបត្តិកូវីដ-១៩ ក្នុងរយៈពេលប៉ុន្មានឆ្នាំមកនេះ។

ស្ថាប័នអន្តរជាតិមួយនេះ បានព្យាករថា តម្រួវការប្រេងក្នុងឆ្នាំ២០២៤ នេះនឹងឈានដល់១,៣លានបារ៉ែល​ក្នុងមួយថ្ងៃ (bpd) ដោយកើនឡើង១១ម៉ឺនបារ៉ែលក្នុងមួយថ្ងៃ បើធៀបនឹងការព្យាករមុននេះរបស់ខ្លួន ខណៈដែលការវាយប្រហារដោយក្រុមឧទ្ទាមហ៊ួធី (Houthi) ទៅលើកប៉ាល់ដឹកជញ្ជូនទំនិញនៅសមុទ្រក្រហម បានធ្វើឱ្យក្រុមហ៊ុនដឹកជញ្ជូននានាបង្ខំចិត្តប្រើផ្លូវវាងកាន់តែឆ្ងាយ។

ការព្យាករកំណើនរបស់ទីភ្នាក់ងារថាមពលអន្តរជាតិ (IEA) នេះខ្ពស់ជាងការព្យាកររបស់អង្គការនៃប្រទេសនាំចេញប្រេង (OPEC) ដែលរំពឹងថា តម្រូវការប្រេងនឹងមានជិត១លានបារ៉ែលក្នុងមួយថ្ងៃ។

សូមបញ្ជាក់ថា ការព្យាករអំពីកំណើនតម្រូវការប្រេង​សម្រាប់ឆ្នាំ២០២៤ នេះ ធ្វើឡើងស្របពេលតម្លៃប្រេងនៅលើទីផ្សារអន្តរជាតិ ជាពិសេសទីផ្សារអង់គ្លេស និងសហរដ្ឋអាម៉េរិក បា​នធ្លាក់ចុះនៅថ្ងៃសុក្រ ទី១៥ ខែមីនា នេះ។ តួយ៉ាង ការជួញដូរប្រេងឆៅនៅទីផ្សារអង់គ្លេស សម្រាប់ខែឧសភា បានធ្លាក់ចុះ៤១សេន ឬ០,៥% មកនៅត្រឹម៨៥ដុល្លារ ក្នុងមួយបារ៉ែល ខណៈប្រេងឆៅនៅទីផ្សារអាម៉េរិក បានធ្លាក់ចុះ៣២សេន ឬ០,៤% មកនៅត្រឹមជិត៨១ដុល្លារ ក្នុងមួយបារ៉ែល៕