តម្លៃប្រេងនៅលើទីផ្សារអាមេរិក បានធ្លាក់ចុះ៤១សេន មកនៅត្រឹមតម្លៃ៦៨ដុល្លារ៨០សេនក្នុងមួយបារ៉ែល នៅថ្ងៃអង្គារសប្ដាហ៍នេះ ខណៈដែលតម្លៃប្រេងឆៅអង់គ្លេសវិញ ធ្លាក់ចុះ៤៦សេន មកនៅត្រឹម ៧២ដុល្លារ ៩៥សេនក្នុងមួយធុងបារ៉ែល។
ក្តីរំពឹងទុកថា ការពន្យារពេលនៃការចម្រាញ់ប្រេង នឹងទប់ស្កាត់តម្រូវការប្រើប្រាស់ប្រេង ដែលវានឹងធ្វើឲ្យប៉ះពាល់ទៅដល់តម្លៃទីផ្សារប្រេងពិភពលោក។ បញ្ហាព្យុះសង្ឃរា អ៊ីដា នៅសហរដ្ឋអាមេរិក បានធ្វើឲ្យប៉ះពាល់យ៉ាងធ្ងន់ធ្ងរដល់រោងចក្រចម្រាញ់ប្រេងនៅក្នុងរដ្ឋលូហ្ស៊ីណាចំនួន៦រោងចក្រដែលរោងចក្រទាំងនេះ អាចផលិតប្រេងឆៅបានប្រមាណជិត ២លានបារ៉ែលក្នុងមួយថ្ងៃ និងមានប្រហែល១២% នៃសមត្ថភាពចម្រាញ់ប្រេងសរុបនៅក្នុងសហរដ្ឋអាមេរិកទាំងមូល។
អ្នកជំនាញបាននិយាយថា បច្ចុប្បន្នក្រុមហ៊ុនជាច្រើនកំពុងវាយតម្លៃផលប៉ះពាល់ ទាក់ទងនឹងការផ្អាកដំណើរការរោងចក្រចម្រាញ់ប្រេង ថានឹងត្រូវបន្ដដល់ពេលណា ប៉ុន្ដែ វានៅតែមិនទាន់ដឹងច្បាស់នៅឡើយ។
អត្ថបទគួរអាន
ទោះយ៉ាងណា មន្ត្រីជំនាញរបស់អាមេរិកបាននិយាយថា ជាមួយនឹងការខូចខាតធ្ងន់ធ្ងរដល់បណ្ដាញអគ្គិសនីនៅរដ្ឋ លូហ្ស៊ីណា អាចនឹងមានដល់រយៈពេល៣សប្ដាហ៍ ហើយវានឹងពន្យារពេលដល់កិច្ចខិតខំប្រឹងប្រែងក្នុងការជួសជុលដំណើរការរោងចក្រថាមពលឡើងវិញផងដែរ។
ការរក្សាតម្លៃប្រេងគឺជាការរំពឹងទុកដែលអង្គការប្រទេសនាំចេញប្រេង OPEC និងសម្ព័ន្ធមិត្ត គឺ OPEC+ នឹងយល់ព្រមបន្ដផែនការបន្ថែមការផលិតប្រេង ៤០ម៉ឺនបារ៉ែលបន្ថែមក្នុងមួយថ្ងៃ ដើម្បីផ្គត់ផ្គង់ក្នុងមួយខែៗរហូតដល់ខែធ្នូឆ្នាំនេះ។
ទោះយ៉ាងណា ផែនការបង្កើនការផលិតប្រេងពី ប្រទេសនាំចេញប្រេងៗធំៗនេះ ត្រូវបានគេរំពឹងថា អាចនឹងត្រូវបានពិចារណាឡើងវិញ ដ្បិតថា បច្ចុប្បន្នពិភពលោកកំពុងនៅតែបន្ដរាតត្បាតដោយកូវីដ-១៩ នៅឡើយ ដែលវានឹងធ្វើឲ្យតម្រូវការប្រើប្រាស់ប្រេងមានការថយចុះ៕
None
