ទីភ្នាក់ងារព័ត៌មានរដ្ឋ RIA របស់រុស្ស៊ី បានបញ្ជាក់កាលពីថ្ងៃអាទិត្យ ចុងសប្ដាហ៍កន្លងទៅថា ខ្លួនបានគណនាឃើញថា លោកខាងលិចប្រឈមនឹងការបាត់បង់ទ្រព្យសកម្ម និងការវិនិយោគក្នុងទំហំទឹកប្រាក់យ៉ាងតិច២៨៨ពាន់លានដុល្លារអាម៉េរិក ប្រសិនបើពួកគេហ៊ានរឹបអូសទ្រព្យសម្បត្តិបង្កកទុករបស់រុស្ស៊ី ដើម្បីយកទៅជួយកសាងប្រទេសអ៊ុយក្រែនឡើងវិញ ព្រោះរដ្ឋាភិបាលក្រុងមូស្គូ នឹងសងសឹកវិញ។
គួររំលឹកថា បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជូនកងកម្លាំងចូលឈ្លានពានប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ សហរដ្ឋអាម៉េរិក និងបណ្ដាសម្ព័ន្ធមិត្តបានដាក់បម្រាមមិនឱ្យធ្វើប្រតិបត្តិការជាមួយធនាគារកណ្តាល និងក្រសួងហិរញ្ញវត្ថុរបស់រុស្ស៊ីនោះឡើយ និងបានបង្កកទុនបម្រុងអន្តរជាតិប្រមាណ៣០០ពាន់លានដុល្លារអាម៉េរិក របស់ប្រទេសរុស្ស៊ី ដែលរក្សាទុកនៅក្នុងប្រទេសលោកខាងលិច។
អត្ថបទគួរអាន
ក្រុមមន្ត្រីអាម៉េរិក និងអង់គ្លេស ក្នុងរយៈពេលប៉ុន្មានខែចុងនេះ កំពុងធ្វើការជាមួយគ្នា ដើម្បីឈានទៅដល់ការរឹបអូសទ្រព្យសម្បត្តិរបស់រុស្ស៊ី ដែលត្រូវបានបង្កកទុកនៅក្នុងប្រទេសបែលហ្ស៊ិក និងបណ្ដាទីក្រុងផ្សេងៗទៀតក្នុងតំបន់អឺរ៉ុប ដើម្បីយកទៅជួយកសាងប្រទេសអ៊ុយក្រែន ឡើងវិញ។
ក្រុមមន្ត្រីអាម៉េរិក និងអង់គ្លេសសង្ឃឹមថា ក្រុមមេដឹកនាំនៃប្រទេសឧស្សាហកម្មឈានមុខគេទាំង៧ ហៅកាត់ថា G7 ដែលមានសមាជិកសំខាន់ៗដូចជាកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាម៉េរិក នឹងឈានដល់ការព្រមព្រៀងចេញសេចក្តីថ្លែងការណ៍បញ្ជាក់ពីគោលបំណងកាន់តែម៉ឺងម៉ាត់ទាក់ទិនការរឹបអូសទ្រព្យសម្បត្តិរុស្ស៊ី នៅពេលមេដឹកនាំទាំងនោះកោះប្រជុំនៅចុងខែកុម្ភៈ ខាងមុខ។ នេះបើយោងតាមប្រភពច្បាស់ការបានទម្លាយប្រាប់ទីភ្នាក់ងារព័ត៌មានអន្តរជាតិធំៗ។
រុស្ស៊ី បានចោទប្រកាន់រដ្ឋាភិបាលក្រុងវ៉ាស៊ីនតោន ថាបានព្យាយាមចាប់បង្ខំឱ្យបណ្ដាប្រទេសក្នុងតំបន់អឺរ៉ុប ដែលជាកន្លែងរក្សាទុកទ្រព្យសម្បត្តិរុស្ស៊ី ភាគច្រើនចុះហត្ថលេខាលើវិធានការស្រដៀងគ្នានេះ ហើយវិមានក្រឹមឡាំង បានព្រមានបកទៅវិញថា ក្រុងមូស្គូ ក៏នឹងរឹបអូសទ្រព្យសម្បត្តិរបស់សហរដ្ឋអាម៉េរិក អឺរ៉ុប និងទ្រព្យសម្បត្តិផ្សេងៗទៀតជាការសងសឹក ប្រសិនបើលោកខាងលិច ហានរឹបអូសទ្រព្យសម្បត្តិរបស់រុស្ស៊ីមែននោះ៕
ដោយ: តែម សុខុម
None
