តួយ៉ាង ប្រទេសអាល្លឺម៉ង់បានអះអាងនាចុងសប្ដាហ៍មុននេះថា មហាអំណាចសេដ្ឋកិច្ចតំបន់អឺរ៉ុបមួយនេះ ត្រៀមខ្លួនរួចជាស្រេចក្នុងការបញ្ឈប់ការទិញប្រេងពីរុស្ស៊ី ដើម្បីចូលរួមជាមួយសហភាពអឺរ៉ុបលើការដាក់ទណ្ឌកម្មកាន់តែខ្លាំងក្លាហ៊ុមព័ទ្ធចំពោះការនាំចេញប្រេងរុស្ស៊ី ដើម្បីការដាក់សម្ពាធឲ្យកាន់តែធ្ងន់ធ្ងរថែមទៀតទៅលើទីក្រុងម៉ូស្គូ ដែលបានឈ្លានពានអ៊ុយក្រែន។ នេះបើតាមការរាយការណ៍ពីសារព័ត៌មាន Business Insider។
លោក Matt Smith អ្នកវិភាគប្រេងនាំមុខនៅក្រុមហ៊ុនវិភាគទីផ្សារ ខេភ្ល័រ (Kpler) បានអះអាងថា សេដ្ឋកិច្ចរបស់រុស្ស៊ីត្រូវបានព្យាករណ៍ថានឹងធ្លាក់ចុះជាង ១០% នៅឆ្នាំនេះ។ ក៏ប៉ុន្តែប្រសិនបើទណ្ឌកម្មប្រេងត្រូវហ៊ុមព័ទ្ធដោយសហភាពអឺរ៉ុបកើនឡើងមែន នោះវាទំនងជានឹងធ្វើឱ្យសេដ្ឋកិច្ចទីក្រុងម៉ូស្គួអាចនឹងធ្លាក់ចុះកាន់តែខ្លាំងជាងនេះទៅទៀត។
ក្នុងសេណារីយោគ្មានការទិញប្រេងពីអ៊ឺរ៉ុប រុស្ស៊ីនឹងត្រូវស្វែងរកកន្លែងណាមួយ ដើម្បីលក់ប្រេងប្រហែល ២លាន៥ សែនបារ៉ែលក្នុងមួយថ្ងៃ។ លោក Smith បាននិយាយទៀតថា លុះត្រាតែទីក្រុងម៉ូស្គូអាចលក់ការផ្គត់ផ្គង់នោះបានលឿន ឬ យ៉ាងហោចណាស់រកកន្លែងរក្សាទុកប្រេងឲ្យបានឆាប់ នោះរុស្ស៊ីនឹងមានឱកាសអាចកាត់បន្ថយការផលិតប្រេងក្នុងស្រុករបស់ខ្លួន ដើម្បីឲ្យសមាមាត្រនឹងស្ដុកប្រេង។
មែនទែនទៅ ប្រទេសរុស្ស៊ីអាចប្រើប្រាស់បណ្តាញបំពង់បង្ហូរប្រេងដ៏ធំទូលាយរបស់ខ្លួនធ្វើជាកន្លែងស្តុកទុកប្រេង ប៉ុន្តែទំហំនៃការផ្ទុកគឺមានចំនួនកំណត់។ ដោយឡែក ប្រេងឆៅដែលមិនទាន់បានលក់ក៏អាចផ្ទុកនៅលើកាប៉ាល់ដឹកប្រេង និងរក្សាទុកនៅឯសមុទ្រផងដែរ។
ទោះបីជាយ៉ាងណាក៏ដោយ ដំណោះស្រាយទាំងនេះ មិនអាចជួយដោះស្រាយសេដ្ឋកិច្ចរបស់រុស្ស៊ី ដែលត្រូវបានហ៊ុមព័ទ្ធដោយទណ្ឌកម្មសហភាពអឺរ៉ុបយ៉ាងចាស់ដៃបានទេ។
យោងតាមក្រុមហ៊ុន Rhodium Group បានឱ្យដឹងថា ប្រាក់ចំណូលពីការនាំចេញប្រេងទៅកាន់អឺរ៉ុបរបស់រុស្ស៊ីមានចំនួន ១១% នៃផលិតផលក្នុងស្រុកសរុបរបស់រុស្ស៊ីក្នុងឆ្នាំ ២០២១ ដែលច្រើនជាង ២,៣% ទៅ ២,៦% នៃការនាំចេញឧស្ម័នទៅកាន់អឺរ៉ុប។
លោក Smith បាននិយាយថា ការធ្លាក់ចុះនៃប្រាក់ចំណូលពីការនាំចេញយ៉ាងធ្ងន់ធ្ងរនេះ នឹងបណ្តាលឱ្យមានការថយចុះគួរឱ្យកត់សម្គាល់នៅក្នុងសេដ្ឋកិច្ចរបស់ប្រទេសរុស្ស៊ី ហើយទីក្រុងម៉ូស្គួរហាក់បីដូចជាមានផ្លូវនៃការតស៊ូតិចតូចបំផុត ដោយគ្មានជម្រើសអ្វីផ្សេងក្រៅពីត្រូវកាត់បន្ថយការផលិតនោះទេ។
អត្ថបទគួរអាន
ហេតុអ្វីបានជាពូទីន មិនអាចពឹងចិន ឬ ឥណ្ឌាទាំងស្រុងបាន?
ប្រទេសឥណ្ឌាគ្រោងនឹងនាំចូលប្រេងឆៅពីរុស្ស៊ី ប្រហែល៦០ម៉ឺនបារ៉ែលក្នុងមួយថ្ងៃ ដោយសារតែរុស្ស៊ីលក់ជូនក្នុងតម្លៃទាបជាងទីផ្សារ។
ការដាក់ទណ្ឌកម្មផ្តាច់ឈប់ទិញប្រេងពីទីក្រុងម៉ូស្គួ ពីសំណាក់សហភាពអឺរ៉ុប ក៏អាចនឹងជំរុញឲ្យប្រទេសចិន និង ឥណ្ឌា នឹងនឹងបង្កើនការនាំចូលប្រេងពីរុស្ស៊ីបន្ថែម ១ លានបារ៉ែលទៀតក្នុងមួយថ្ងៃ ខណៈដែលមានការទាក់ទាញនៃការលក់ប្រេងបញ្ចុះតម្លៃពីរុស្ស៊ី ដែលបណ្តាលមកពីសម្ពាធអន្តរជាតិក្នុងការកាត់ផ្តាច់ការនាំចូលពីប្រទេសនេះ។ ក៏ប៉ុន្តែតាមវិធីសាស្ត្រនេះ ទីក្រុងម៉ូស្គូអាចនឹងបង្កើតប្រាក់ចំណូលពីប្រេងបានតិចតូចប៉ុណ្ណោះ។ ម្យ៉ាងទៀត អ្នកជំនាញប៉ាន់ប្រមាណថា ទោះបីមហាយក្សចិន និងឥណ្ឌា ទិញប្រេងពីរុស្ស៊ីបន្ថែមក្ដី ក៏ប្រទេសទាំងពីរនេះ នៅតែមិនអាចជំនួសទីផ្សារអឺរ៉ុបបាន១០០%នោះដែរ។
យ៉ាងណាមិញ បញ្ហាការដឹកជញ្ជួន ដូចជាការទទួលបានការធានារ៉ាប់រងសម្រាប់ទំនិញថ្មី ឬ ស្វែងរកនាវាគ្រប់គ្រាន់ ដើម្បីសម្រួលដល់លំហូរដឹកប្រេងពីរុស្ស៊ី ក៏ជាបញ្ហាប្រឈមសម្រាប់ប្រទេសចិន និងឥណ្ឌាផងដែរ។ ទន្ទឹមនឹងនេះ តម្រូវការថាមពលរបស់ប្រទេសចិនបានធ្លាក់ចុះ ក្រោមគោលនយោបាយគ្មានកូវីដ របស់ទីក្រុងប៉េកាំង ហើយរោងចក្រចម្រាញ់ប្រេងរបស់ប្រទេសនេះ ក៏បានងើបឡើងត្រឡប់មកវិញផងដែរ៕
អត្ថបទ៖ វ៉ាន់ ស្រីរ័ត្ន
None
