សន្ទស្សន៍ នៃរបាយការណ៍របស់ វេទិកាពិភពលោក ដែលបានចេញផ្សាយជាសាធារណៈ កាលពីថ្ងៃពុធ ទី៩ តុលា ឆ្នាំ២០១៩នេះ បានឆ្លុះបញ្ចាំងពីទិដ្ឋភាពនៃភាពប្រកួតប្រជែងសេដ្ឋកិច្ច ដែលមានកត្តាវាស់ស្ទង់ដូចជា ស្ថិរភាពម៉ាក្រូសេដ្ឋកិច្ច ហេដ្ឋារចនាសម្ព័ន្ធ ទីផ្សារការងារ និងសមត្ថភាពនៃភាពច្នៃប្រឌិត។
ប្រទេសសាំងហ្គាពួរ បានរុញទម្លាក់សហរដ្ឋអាមេរិកដែលជាមហាអំណាចសេដ្ឋកិច្ចពិភពលោកទី១នោះ ឲ្យមកនៅឈរលេខ ២ ក្នុងតំណែងជាប្រទេសមានសេដ្ឋកិច្ចប្រកួតប្រជែងខ្លាំងបំផុត ខណៈដែលប្រទេសដីកោះនៃតំបន់អាស៊ីមួយនេះ ទទួលបានពិន្ទុខ្ពស់បំផុត នៅលើវិស័យហេដ្ឋារចនាសម្ព័ន្ធ សុខាភិបាល ទីផ្សារការងារ និងប្រព័ន្ធហិរញ្ញវត្ថុ។
អត្ថបទទាក់ទង!
បើទោះបីជា អាមេរិកបានចាញ់សាំងហ្គាពួរក៏ពិតមែន តែអាមេរិក នៅតែជាប្រទេសមួយដែលមានកម្លាំងច្នៃប្រឌិតដ៏ខ្លាំងក្លាដដែល។ នេះបើតាមការគូសបញ្ជាក់នៅក្នុងរបាយការណ៍។
ប្រទេសសាំងហ្គាពួរ និងវៀតណាម ត្រូវបានគេមើលឃើញថា បានបង្ហាញពីសន្ទុះខ្លាំងនៅឆ្នាំនេះ ដោយសារតែមានមួយផ្នែកជំរុញដោយសង្គ្រាមពាណិជ្ជកមុ្មរវាងអាមេរិក និងចិន។
របាយការណ៍បានកត់សម្គាល់ទៀតថា ប្រទេសអាស៊ានទាំងពីរនេះ ហាក់ដូចជាទទួលបានអត្ថប្រយោជន៍ពីភាពតានតឹងពាណិជ្ជកម្មសកល តាមរយៈការបង្វែរពាណិជ្ជកម្ម (Trade Diversion)។ ជាក់ស្ដែង វៀតណាមបានហក់កើនឡើង ១០ពិន្ទុ កាលពីឆ្នាំមុន ដោយបានឈរនៅចំណាត់ថ្នាក់ទី ៦៧ ក្នុងចំណោម ១៣៧ ប្រទេស។
សារព័ត៌មាន របស់អាមេរិក CNN បានរាយការណ៍ថា សហរដ្ឋអាមេរិក បាននាំចូលទំនិញពីវៀតណាម កើនឡើងដល់ ៣៦% នៅរយៈពេល ៥ខែដំបូងនៃឆ្នាំ២០១៩នេះ ដោយមានក្រុមហ៊ុនមួយចំនួន បានផ្លាស់ប្តូររោងចក្រផលិតពីប្រទេសចិន ទៅវៀតណាម និងទៅកាន់ប្រទេសតំបន់អាស៊ីអាគ្នេយ៍ផ្សេងទៀត ដើម្បីគេចផុតពីការដំឡើងពន្ធ។
យ៉ាងណាក៏ដោយចុះ សម្រាប់ប្រទេសសាំងហ្គាពួរវិញ សង្គ្រាមពាណិជ្ជកម្ម អាមេរិក និងចិន មិនសូវជាផ្ដល់ជ័យជម្នះខ្លាំងក្លានោះឡើយ ដោយសារតែ សាំងហ្គាពួរ មានការពឹងផ្អែកខ្លាំងលើការនាំចេញទៅប្រទេសចិន ហើយចិនក៏ជាដៃគូពាណិជ្ជកម្មធំបំផុតរបស់ប្រទេសនេះផងដែរ។ នេះបើតាមការកត់សម្គាល់ពី CNN។
សារព័ត៌មានអន្តរជាតិ ដដែលនេះ បានគូសបញ្ជាក់ថា សាំងហ្គាពួរ បានទម្លាក់ព្យាករណ៍កំណើនសេដ្ឋកិច្ចរបស់ខ្លួន កាលពីខែសីហា បន្ទាប់មានរបាយការណ៍ធ្លាក់ចុះយ៉ាងខ្លាំងនៃសកម្មភាពសេដ្ឋកិច្ចនៅក្នុងត្រីមាសទី២នៃឆ្នាំនេះ ហើយវាក៏ត្រូវបានគេមើលឃើញថា ឈានទៅរកកំណើនប្រចាំឆ្នាំទាបបំផុត ចាប់តាំងពីមានវិបត្តិហិរញ្ញវត្ថុពិភពលោកកាលពីឆ្នាំ២០០៩មក។
ទីក្រុងហុងកុង ប្រទេសហូឡង់ និងស្វីស
បានឈរក្នុងលំដាប់កំពូលទាំង៥ បន្ទាប់ពី សាំងហ្គាពួរ និងអាមេរិក ក្នុងតំណែងជាប្រទេសដែលមានសេដ្ឋកិច្ចប្រកួតប្រជែងខ្លាំង។
ហុងកុង ទទួលបាន៤ ពិន្ទុ ពីរបាយការណ៍កាលពីឆ្នាំមុន បើទោះបីជា បញ្ហានយោបាយក្នុងទីក្រុងនេះ
កំពុងបង្កបញ្ហាស្មុគ្រស្មាញដល់សេដ្ឋកិច្ចក៏ដោយ។ ហុងកុង ទទួលបាន ពិន្ទុខ្ពស់ សម្រាប់ស្ថិរភាពម៉ាក្រូសេដ្ឋកិច្ច
និងប្រព័ន្ធហិរញ្ញវត្ថុ ប៉ុន្ដែ ធ្លាក់ចុះទាបចំពោះសមត្ថភាពច្នៃប្រឌិតរបស់ខ្លួន។
របាយការណ៍របស់ វេទិកាសេដ្ឋកិច្ចពិភពលោក ក៏បានព្រមានដែរថា ការកើនឡើងនូវភាពតានតឹងផ្នែកពាណិជ្ជកម្ម និងភូមិសាស្ត្រនយោបាយ កំពុងបង្កភាពមិនប្រាកដប្រជានៅជុំវិញពិភពលោក៕
None
