ក្រោយឡើងកាន់ដំណែងបានមួយរយៈខ្លី ឯកអគ្គរដ្ឋទូតចិនថ្មីប្រចាំនៅសហរដ្ឋអាមេរិក លោក ឈីន កាង ក្នុងជំនួបដំបូងរបស់លោក ជាមួយនឹងអនុរដ្ឋមន្ត្រីការបរទេសអាមេរិក លោកស្រី វិនឌី សឺមែន (Wendy Sherman) បានធ្វើការជជែកពិភាក្សាគ្នាស៊ីជម្រៅក្នុងប្រធានបទទំនាក់ទំនងទ្វេភាគី ដោយក្នុងនោះ លោកកាង បានធ្វើការបញ្ជាក់ជាថ្មីពីជំហររបស់រដ្ឋាភិបាលក្រុងប៉េកាំងក្នុងបញ្ហាកោះតៃវ៉ាន់។
មន្ត្រីការទូតចិនរូបនេះបានគូសបញ្ជាក់ថា បញ្ហាកោះតែវ៉ាន់ជាបញ្ហាសំខាន់ ដែលប្រៀបបាននឹងរងើកភ្លើង ដែលឆេះងំ មិនងាយនឹងរលត់ ហើយអាចនឹងឆាបឆេះសន្ធោសន្ធៅឡើងក្នុងពេលណាមួយ។ សម្រាប់ប្រទេសចិន ប្រមុខការទូត លោក ឈីន កាង បានសង្កត់ធ្ងន់ថា ចិននៅតែចាត់ទុកកោះតៃវ៉ាន់ជាដែនអធិបតេយ្យរបស់ខ្លួន។
គួរជម្រាបថា ការបញ្ជាក់ពីជំហររបស់ចិនជាថ្មី ក្នុងសំណុំរឿងកោះតៃវ៉ាន់នេះធ្វើឡើងនៅបន្ទាប់ពីសហរដ្ឋអាមេរិកទើបបានអនុម័តយល់ព្រមលក់សព្វាវុធទៅឱ្យកោះតៃវ៉ាន់ក្នុងកិច្ចព្រមព្រៀងមានតម្លៃទឹកប្រាក់រហូតដល់ ៧៥០ លានដុល្លារ ដែលសកម្មភាពនេះ ត្រូវបានគេមើលឃើញថា នឹងបន្ថែមភាពតានតឹងដល់ទំនាក់ទំនងរវាងអាមេរិក-ចិនមួយកម្រិតទៀត។
អត្ថបទគួរអាន
សូមបញ្ជាក់ថា ក្រៅតែពីបញ្ហាកោះតៃវ៉ាន់ ភាគីទាំងពីរ ក៏បានឯកភាពគ្នាថា ទំនាក់ទំនងទ្វេភាគី មានសារសំខាន់ខ្លាំងណាស់ ហើយចាំបាច់ត្រូវ ដោះស្រាយបញ្ហាដែលកំពុងកើតមានតាមរយៈការសន្ទនា និងត្រូវស្ដារទំនាក់ទំនងឱ្យបានប្រសើរឡើងវិញជាងនេះបន្ថែមទៀត។
ប៉ុន្តែធាតុពិតជាក់ស្តែងទំនាក់ទំនងរវាងចិននឹងសហរដ្ឋអាមេរិក ត្រូវបានគេមើលឃើញថា មិនបានធូរស្បើយម្តងណាឡើយ ផ្ទុយទៅវិញចំណងទាក់ទងរវាងប្រទេសទាំងពីរហាក់កាន់តែមានភាពល្អក់កករពីមួយថ្ងៃទៅមួយថ្ងៃ នៅក្នុងរឿងចម្រូងចម្រាស់ជាច្រើនទាំងរឿងចាស់ និងរឿងថ្មី ដូចជាបញ្ហានៅសមុទ្រចិនខាងត្បូង រឿងនៅហុងកុង បញ្ហានៅស៊ីនជាំង និងកោះតៃវ៉ាន់នេះជាដើម។ យ៉ាងណាមិញ ជំនួបចរចាកម្រិតខ្ពស់ប៉ុន្មានលើកចុងក្រោយរវាងមហាអំណាចទាំងពីររមែងបញ្ចប់ទៅដោយមិនបានផ្លែផ្កាអ្វីទាល់តែសោះ ហើយថែមទាំងបានជជែកពិភាក្សាដោយប្រើប្រាស់សុទ្ធតែប្រើពាក្យសម្ដីធ្ងន់ៗ និង តឹងសសៃក ដាក់គ្នាថែមទៀតផង៕យើងរង់ចាំមើលបន្តទៀត។
None
