បើតាមសន្និសីទសារព័ត៌មាន
ក្នុងទីក្រុងកាប៊ុលធ្វើឡើងកាលពីថ្ងៃទី៧ខែកញ្ញា
អ្នកនាំពាក្យក្រុមតាលីបង់ បានអះអាងថា
រដ្ឋាភិបាលបណ្តោះអាសន្នរបស់អាហ្វហ្កានីស្ថាននេះ នឹងត្រូវដឹកនាំដោយលោក
ម៉ូឡា ហាសាន អាគុន (Mullah Hasan Akhund) ក្នុងឋានៈជានាយករដ្ឋមន្ត្រី។ ប៉ុន្តែ
បុគ្គលរូបនេះធ្លាប់ត្រូវបានអង្គការសហប្រជាជាតិ ចក្រភពអង់គ្លេស សហភាពអឺរ៉ុប
ចាត់ទុកជាមេភេរវករមួយរូប។ ប៉ុន្តែថ្នាក់ដឹកនាំកំពូលក្រុមតាលីបង់រូបនេះ
បានសម្តែងការប្តេជ្ញាចិត្ត ចំពោះការគោរពច្បាប់អន្តរជាតិ សន្ធិសញ្ញានានា
និងការប្តេជ្ញាចិត្តទាំងអស់ដែលមិនផ្ទុយនឹងច្បាប់សាសនាអ៊ីស្លាម។
យ៉ាងណាមិញ អ្នកនាំពាក្យក្រសួងការបរទេសអាមេរិកបាននិយាយថា ខ្លួនមានការព្រួយបារម្ភចំពោះការកំណត់សមាជិករដ្ឋាភិបាលមួយចំនួន ដែលដឹកនាំដោយក្រុមតាលីបង់ ហើយបានធ្វើការកត់សម្គាល់ថាពុំមានស្ត្រីណាម្នាក់ ត្រូវបានរាប់បញ្ចូលក្នុងជួររដ្ឋាភិបាលថ្មីនេះទេ។ ភាគីសហរដ្ឋអាមេរិកបានបន្ថែមទៀតថា ពិភពលោកកំពុងឃ្លាំមើលយ៉ាងដិតដល់ជុំវិញបញ្ហានេះ ហើយជឿជាក់យ៉ាងមុតមាំថា រដ្ឋាភិបាលថ្មីនេះនឹងមិនត្រូវបានអន្តរជាតិទទួលស្គាល់ដោយងាយឡើយ។
សូមជម្រាបថា មិនត្រឹមតែបុគ្គលកំពូលរបស់រដ្ឋាភិបាលបណ្តោះអាសន្នអាហ្វហ្កានីស្ថាននេះទេ ដែលជាមុខសញ្ញារបស់អាមេរិក និងអន្តរជាតិ នៅមានបេក្ខភាពរដ្ឋមន្ត្រីច្រើនទៀតដែលធ្លាប់ និងនៅបន្តស្ថិតក្នុងបញ្ជីខ្មៅរបស់អាមេរិក។
អត្ថបទគួរអាន
ក្នុងនោះរួមមាន លោក អាប់ឌុល ហ្គានី បារ៉ាដា (Abdul Ghani Baradar) ប្រធានការិយាល័យនយោបាយតាលីបង់ ត្រូវបានតែងតាំងជាឧបនាយករដ្ឋមន្ត្រីស្តីទី។ លោក Baradar គឺជាបុគ្គលមួយរូប ដែលអាមេរិកធ្លាប់តាមប្រមាញ់ចាប់ខ្លួនដែរ និងធ្លាប់ជាប់ពន្ធនាគាររយៈពេល ៨ឆ្នាំនៅប៉ាគីស្ថាន។
លោក ស៊ីរ៉ាជូឌីន
អាខ្វានី (Sirajuddin Haqqani) ដែលជាមុខសញ្ញាដ៏សំខាន់របស់ FBI
អាមេរិក ត្រូវបានតែងតាំងជារដ្ឋមន្ត្រីមហាផ្ទៃស្តីទី។
អាជ្ញាធរអាមេរិក បានចាត់ទុកលោក Haqqani ជាភេរវករអន្តរជាតិ ហើយ FBI ធ្លាប់ប្រកាសផ្តល់រង្វាន់ចំនួន
៥លានដុល្លារសម្រាប់ព័ត៌មាន ដើម្បីតាមចាប់លោក Haqqaniផងដែរ។ ដោយឡែក តំណែងរដ្ឋមន្ត្រីការពារជាតិស្តីទី
គឺជា លោកម៉ូហាម៉ាត់ យ៉ាខុប (Mohammad Yaqoob) កូនប្រុសរបស់ស្ថានិកក្រុមតាលីបង់ផ្ទាល់តែម្តង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
