អ្វីដែលគួរឱ្យចាប់អារម្មណ៍នោះ គឺគណនីមួយចំនួនដែលពាក់ព័ន្ធ ក៏ត្រូវបានរកឃើញថា មានទំនាក់ទំនងជាមួយសកម្មភាពឧក្រិដ្ឋកម្មតាមអ៊ីនធឺណិតផងដែរ។ នេះបើតាមការចុះផ្សាយរបស់កាសែត The Nation នៅថ្ងៃទី២ ខែវិច្ឆិកា នេះ។
ប៉ូលិសថៃបានចាប់ខ្លួនឈ្មោះ ផារីន (Parin) អាយុ៣៨ឆ្នាំជាជនជាតិថៃ និងជានាយកក្រុមហ៊ុន Taobao (Thailand) នៅទីក្រុងបាងកក កាលពីថ្ងៃទី១ ខែវិច្ឆិកា ឆ្នាំ២០២៦។ ប៉ូលិសបានចាប់ផ្ដើមបើកការស៊ើបអង្កេត បន្ទាប់ពីធនាគារកណ្តាលថៃ បានផ្តល់ព័ត៌មានដល់ប៉ូលិសអំពីគេហទំព័រចំនួនពីរ គឺ Fupay និង Taobao Thailand ដែលជាប់សង្ស័យថា បានផ្តល់សេវាប្តូរប្រាក់យន់ចិន ផ្ទេរប្រាក់ទៅកាន់គណនី Alipay និងសេវាទូទាត់ប្រាក់ផ្សេងៗ ដោយគ្មានអាជ្ញាប័ណ្ណ។
អតិថិជនអាចចុះឈ្មោះបង្កើតគណនី និងកាបូបលុយអេឡិចត្រូនិក ឬ E-Wallet ដើម្បីដាក់ប្រាក់ ដកប្រាក់ និងប្រើប្រាស់សម្រាប់ទិញទំនិញតាមវេទិកា ឬ Platform អនឡាញរបស់ចិនដូចជា1688, Taobao និង Tmall ជាដើម។ ប៉ូលិសបានទម្លាយឱ្យដឹងថា គណនីធនាគារចំនួន៥ដែលពាក់ព័ន្ធប្រតិបត្តិការនេះបានចរាចរទឹកប្រាក់សរុបជាង១៧០លានបាត ឬជាង៥លានដុល្លារអាម៉េរិកក្នុងរយៈពេលត្រឹមមួយឆ្នាំប៉ុណ្ណោះ។
លើសពីនេះ ក្រុមអ្នកស៊ើបអង្កេត ក៏បានរកឃើញដែរថា គណនីប្តូរប្រាក់យន់ចំនួនពីរមានទំនាក់ទំនងជាមួយគណនីដែលជាប់សង្ស័យថា ពាក់ព័ន្ធឧក្រិដ្ឋកម្មតាមអ៊ីនធឺណិត ដែលមានទឹកប្រាក់សរុបជាង ៨៤០០ដុល្លារអាម៉េរិក។ ជនសង្ស័យកំពុងប្រឈមការចោទប្រកាន់ពីបទគប់គិតផ្តល់សេវាទូទាត់ប្រាក់ ប្តូររូបិយប័ណ្ណបរទេស និងផ្ទេរប្រាក់អន្តរជាតិដោយគ្មានការអនុញ្ញាត។
ជាមួយគ្នានេះ ប៉ូលិសថៃបានអំពាវនាវឱ្យពលរដ្ឋប្រើប្រាស់តែសេវាកម្មទូទាត់ប្រាក់តាមប្រព័ន្ធអេឡិចត្រូនិកណា ដែលមានអាជ្ញាប័ណ្ណស្របច្បាប់ និងស្ថិតក្រោមការត្រួតពិនិត្យរបស់ធនាគារកណ្តាលថៃ ដើម្បីជៀសវាងហានិភ័យ នៃការបាត់បង់ប្រាក់ ឬជាប់ពាក់ព័ន្ធនឹងបទល្មើស៕
