ប្រាក់ចំណេញ និងទិន្នផលស្រូវរបស់កសិកររងការគំរាមកំហែងពីទឹកជំនន់ និងថ្លៃដើមផលិតកើនឡើង ទោះតម្លៃស្រូវហក់ឡើង

លោក សុខ សុថា ស្ថាបនិក និងជានាយកប្រតិបត្តិ នៃសមាគមសហព័ន្ធកសិករកម្ពុជានៃអ្នកផលិតកសិកម្ម បានលើកឡើងថា បច្ចុប្បន្នកសិករកំពុងមមាញឹកប្រមូលផលស្រូវវស្សា ប៉ុន្តែតំបន់មួយចំនួនបានរងផលប៉ះពាល់ដោយសារទឹកជន់លិច ដែលបង្កការលំបាកដល់ការប្រមូលផលរបស់កសិករ។ បើតាមលោក សុខ សុថា បច្ចុប្បន្នតម្លៃស្រូវសនៅលើទីផ្សារអាចលក់បានចន្លោះពី៦០០រៀលទៅ១,០០០រៀលក្នុង១គីឡូក្រាម ខណៈស្រូវក្រអូបមានតម្លៃចន្លោះពី៩០០រៀលទៅ១,២០០រៀលក្នុង១គីឡូក្រាម។ តែយ៉ាងណាតម្លៃនេះមិនបានផ្តល់ប្រាក់ចំណេញច្រើនដល់កសិករនោះទេ ដោយសារថ្លៃដើមផលិតកម្មបន្តកើនឡើង ជាពិសេសតម្លៃជីកសិកម្ម ពូជស្រូវ និងធាតុចូលកសិកម្មផ្សេងៗទៀត។ យ៉ាងណាមិញលោក សុខ សុថា ស្នើឱ្យកសិករពិចារណាងាកមកប្រើប្រាស់ជីសរីរាង្គក្នុងស្រុក ដែលមានតម្លៃសមរម្យជាងជីគីមីនាំចូល ដើម្បីកាត់បន្ថយថ្លៃដើមផលិត និងបង្កើនឱកាសទទួលបានប្រាក់ចំណេញ។

ដោយឡែកលោក នួន ណារិន្ទដា កសិករធ្វើស្រែនៅខេត្តឧត្តរមានជ័យបានឱ្យដឹងថា បច្ចុប្បន្នតម្លៃស្រូវនៅតំបន់របស់លោកមានការកើនឡើង ដោយស្រូវប្រភេទស្រូវកែងអាចលក់បានក្នុងតម្លៃជាង៨០០រៀលក្នុងមួយគីឡូក្រាម ខណៈកាលពីឆ្នាំមុនមានតម្លៃត្រឹមជាង៦០០រៀលប៉ុណ្ណោះ។ តែយ៉ាងណាកសិកររូបនេះបានអះអាងថា ទោះបីតម្លៃស្រូវនៅឆ្នាំនេះមានការកើនឡើងក៏ដោយ តែកសិករនៅតំបន់របស់លោកបានជួបប្រឈមនឹងបញ្ហាអាកាសធាតុ ដែលជះឥទ្ធិពលដល់ទិន្នផលស្រូវ។ លោកបន្ថែមថា ដើម្បីឱ្យកសិករអាចទទួលបានប្រាក់ចំណេញពីការធ្វើស្រែ តម្លៃស្រូវគួរតែអាចលក់បានក្នុងតម្លៃចាប់ពី៩០០រៀលក្នុងមួយគីឡូក្រាមឡើងទៅ។

ជាមួយគ្នានេះលោក វង្ស ប៉ោយយ៉ង់ កសិករធ្វើស្រែនៅខេត្តបាត់ដំបងបានគូសបញ្ជាក់ថា ស្រូវប្រភេទអូអឹមនៅតំបន់របស់លោកលក់បានតម្លៃជាង៨០០រៀលក្នុងមួយគីឡូក្រាម ប៉ុន្តែស្រែទំហំ២០ហិកតារបស់លោកកំពុងរងការជន់លិចដោយទឹកជំនន់ ហើយប្រសិនបើទឹកមិនស្រកទាន់ពេលទេនោះ លោកប្រឈមនឹងខាតបង់ទឹកប្រាក់រហូតដល់ប្រមាណ២លានរៀលក្នុងមួយហិកតា។ ក្រៅពីគ្រោះធម្មជាតិ លោកក៏បានទម្លាយពីការលំបាកក្នុងការលក់ស្រូវផងដែរ ដោយសារឈ្មួញកណ្តាលជាអ្នកកំណត់តម្លៃស្រេចតែអំពើចិត្ត ដោយកសិករមិនមានលទ្ធភាពក្នុងការតថ្លៃនោះឡើយ ហើយប្រសិនបើមិនព្រមលក់តាមតម្លៃដែលពួកគេកំណត់ នោះកសិករអាចប្រឈមនឹងគ្មានឈ្មួញទិញស្រូវរបស់ពួកគេ។ ទន្ទឹមនឹងនេះ លោក ស្នើឱ្យរាជរដ្ឋាភិបាលជួយអន្តរាគមន៍កំណត់តម្លៃស្រូវឱ្យបានច្បាស់លាស់ ដើម្បីការពារប្រាក់ចំណេញរបស់កសិករ។

បើយោងតាមរបាយការណ៍របស់សហព័ន្ធស្រូវអង្ករកម្ពុជា កាលពីថ្ងៃទី២៨ ខែតុលា នៅក្នុងខេត្តមួយចំនួនដូចជា ខេត្តព្រះវិហារ ពោធិ៍សាត់ កំពង់ស្ពឺ ព្រៃវែង និងកំពង់ចាម តម្លៃស្រូវសើមប្រភេទស្រូវកែង មានតម្លៃក្នុងរង្វង់៨៤០រៀលដល់៨៩០រៀលក្នុងមួយគីឡូក្រាម ខណៈស្រូវផ្ការំដួល មានតម្លៃក្នុងរង្វង់១,០៤០រៀល ដល់១,១១០រៀលក្នុងមួយគីឡូក្រាមដោយផ្អែកទៅតាមគុណភាពស្រូវនីមួយៗ៕

អត្ថបទ៖ ជា ម៉ារ៉ា