អាជ្ញាធរទេសចរណ៍ថៃ បានព្យាករណ៍ថា ចំនួនភ្ញៀវទេសចរណ៍បរទេស ដែលមកកម្សាន្តនៅប្រទេសថៃ អាចនឹងធ្លាក់ចុះរហូតដល់ទៅ ៦០% នៅក្នុងឆ្នាំនេះពោលគឺមានប្រមាណតែ ១៦លាននាក់ ដែលធ្វើឲ្យ ថៃ បាត់បង់ប្រាក់ចំណូលពីភ្ញៀវទេសចរបរទេស សឹងតែទាំងស្រុងទៅហើយ ហើយតួលេខនេះ អាចធ្លាក់ចុះទាបជាងនេះទៅទៀត បើសិនជា រលកទី ២ នៃការវាយប្រហារដោយ មេរោគកូវីដ១៩ កើតមានឡើងយ៉ាងពិតប្រាកដនោះ។
លោក យុត្តាស័ក ស៊ូផាសន អភិបាលនៃអាជ្ញាធរទេសចរណ៍ថៃ បានមានប្រសាសន៍ថា មនុស្សគ្រប់គ្នាកំពុងរង់ចាំវ៉ាក់សាំង សម្រាប់មេរោគកូវីដ១៩ ហើយវ៉ាក់ស៊ាំងនេះ អាចនឹងកើតមានឡើងក្នុងរយៈពេល ១៨ខែទៀត ដូច្នេះ ហើយប្រជាជនគ្រប់រូប ត្រូវបានរស់នៅក្នុងភាពភ័យខ្លាច និងបារម្ភជានិច្ច។
អត្ថបទទាក់ទង
លោក យុត្តាស័ក បន្តថា វិស័យទេសចរណ៍ថៃ ពឹងផ្អែកខ្លាំងទៅលើ ការចំណាយរបស់ភ្ញៀវទេសចរបរទេស ជាពិសេសភ្ញៀវទេសចរចិន ដូច្នេះហើយ ថៃ ត្រូវតែបង្កើនទំនុកចិត្តឡើងវិញ ចំពោះសុវត្ថិភាពនៃការធ្វើដំណើរកម្សាន្ត ហើយរំពឹងថា ភ្ញៀវទេសចរណ៍ចិន នឹងត្រលប់មកវិញ យ៉ាងលឿនបំផុតត្រឹមខែតុលា ឆ្នាំ ២០២០នេះ។
ជាចុងក្រោយ ថៃ រំពឹងថា ប្រាក់ចំណូលពីវិស័យទេសចរណ៍ នៅក្នុងឆ្នាំ ២០២០នេះ អាចនឹងសម្រេចបានត្រឹមតែ ៣០ពាន់លានដុល្លារអាមេរិក ដែលធ្លាក់ចុះពី ៦០ពាន់លានដុល្លារអាមេរិក កាលពីឆ្នាំ ២០១៩កន្លងទៅ៕
None
