ក្រោយពីមានការបើកទទួលភ្ញៀវទេសចរអន្តរជាតិនេះ ក្រុមប្រឹក្សាទេសចរណ៍ថៃបានព្យាករថា នៅពេញមួយឆ្នាំ២០២១នេះ ក្រោមសេណារីយ៉ាល្អបំផុត ថៃនឹងទទួលបានភ្ញៀវទេសចរអន្តរជាតិដល់ទៅ៣លាននាក់ ជាមួយប្រាក់ចំណូលប្រមាណជាង ៦ពាន់៦រយលានដុល្លារ។ នេះបើតាមការចុះផ្សាយដោយសារព័ត៌មានបាងកកប៉ុស្ដិ៍របស់ថៃ។
បើតាមក្រុមប្រឹក្សាទេសចរណ៍ថៃ បានគូសបញ្ជាក់ថា បើទោះបីជា ថៃមានក្ដីរំពឹងអាចទទួលបានទេសចរអន្តរជាតិដល់៣លាននាក់ក៏ពិតមែន ប៉ុន្ដែ សន្ទស្សន៍ទំនុកចិត្តនៃវិស័យទេសចរណ៍ ក៏មានការធ្លាក់ចុះមកនៅកម្រិតពិន្ទុទាបបំផុតនៅត្រីមាសទី១កន្លងទៅនេះ ដោយមានការងារក្នុងវិស័យនេះប្រមាណ២លាននាក់ត្រូវបានបាត់បង់។
អត្ថបទទាក់ទង
យ៉ាងណាក៏ដោយចុះ លោក វិចិត្រ ប្រាកុបកោសល (Vichit Prakobgosal) អនុប្រធានក្រុមប្រឹក្សាទេសចរណ៍ថៃ បានលើកឡើងថា ក្រៅពីមានការចាក់វ៉ាក់សាំងបានកាន់តែលឿនសម្រាប់តំបន់ទេសចរទាំង១០ ដែលស្ថិតក្រោមគម្រោងបើកសាកល្បងហើយនោះ វាក៏អាចនៅមានកត្តាសំខាន់ៗមួយចំនួនផ្សេងទៀតដែរ ដែលអាចប៉ះទង្គិចដល់ចំនួននៃភ្ញៀវទេសចរនឹងចូលមកកម្សន្ដនៅក្នុងប្រទេសថៃ ពិសេសទាក់ទងនឹងទីក្រុងបាងកកតែម្ដង ដែលជាមជ្ឈមណ្ឌលអាកាសចរណ៍របស់ថៃដ៏សំខាន់ ហើយបច្ចុប្បន្នក្រុងបាងកកនេះ កំពុងស្ថិតក្រោមវិធានការរឹតបន្ដឹងថ្មីបន្ថែមទៀតពីអាជ្ញាធរថៃ។ កត្តាមួយទៀតនោះគឺ រដ្ឋាភិបាលចិន ក៏កំពុងតែមានការរឹតត្បិតការធ្វើដំណើរចេញចូលប្រទេសខ្លួនដែរ ដោយរំពឹងថាទាល់តែខែតុលាឯណោះ ទើបអាជ្ញាធរចិនអាចអនុញ្ញាតឲ្យភ្ញៀវទេសចរជនជាតិចិនចេញធ្វើដំណើរក្រៅប្រទេសបាន។ ក្នុងន័យនេះ គម្រោងបើកកោះភូកេតរបស់ថៃចាប់ពីខែកក្កដានេះ រហូតដល់ខែកញ្ញាទំនងជាមិនទទួលបានភ្ញៀវទេសចរចិនច្រើននោះទេ។
ក្រៅតែពីបើកកោះភូកេត នៅខែបន្ដបន្ទាប់នេះ រដ្ឋាភិបាលប្រទេសនេះ ក៏គ្រោងនឹងបើកខេត្តមួយចំនួនទៀតដើម្បីទទួលភ្ញៀវទេសចរអន្តរជាតិផងដែរ សរុបប្រមាណ ១០ខេត្តក្រុងឯណោះ។
បើតាមក្រុមប្រឹក្សាទេសចរណ៍ថៃ សេណារីយ៉ូ ដែលប្រទេសថៃ ទទួលបានភ្ញៀវទេសចរអន្តរជាតិ៣លាននាក់ នឹងអាចនឹងទទួលបានប្រាក់ចំណូលប្រមាណជាង៦ពាន់៦រយលានដុល្លារអាមេរិក ប្រសិនបើខេត្តក្រុងទាំង១០ របស់ថៃអាចបើកទទួលភ្ញៀវទេសចរឡើងវិញ ហើយក្នុងករណីដែលទេសចរជនជាតិចិនអាចចេញធ្វើដំណើរក្រៅស្រុកបានចាប់ពីខែតុលាតទៅ។ ក្នុងករណីដែល ទីក្រុងប៉េកាំងមិនអនុញ្ញាតឲ្យពលរដ្ឋខ្លួនចេញធ្វើដំណើរក្រៅប្រទេសទេនោះ ចំនួនទេសចរអន្តរជាតិដែលថៃទទួលបានអាចនឹងមានប្រមាណ ២លាននាក់ ជាមួយប្រាក់ចំណូលជិត៥ពាន់លានដុល្លារ។
ដោយឡែក ចំពោះសេណារីយ៉ូដែលទំនងជាងអាចនឹងកើតឡើងវិញ ត្រូវបានក្រុមប្រឹក្សាទេសចរណ៍ថៃរំពឹងថា នឹងទទួលបានភ្ញៀវទេសចរអន្តរជាតិ ១លាន៤សែននាក់ ជាមួយប្រាក់ចំណូលជាង៣ពាន់លានដុល្លារ។ រីឯ សាណារីយ៉ូអាក្រក់បំផុតវិញ ថៃអាចទទួលបានទេសចរអន្តរជាតិត្រឹមតែជាង ១លាននាក់ប៉ុណ្ណោះ ជាមួយប្រាក់ចំណូលជាង២ពាន់៥រយលានដុល្លារ។
ទោះយ៉ាងណា អ្នកជំនាញទេសចរជឿជាក់ថា ប្រទេសចិន នឹងមិនបន្ដពន្យារពេលការរឹតត្បិតការធ្វើដំណើរយូរទៀតនោះទេ ដោយសារតែចិនខ្លួនឯង ក៏ត្រូវការសាកល្បងបើកប្រទេសទទួលអ្នកដំណើរឡើងវិញដែរ ដើម្បីត្រៀមសម្រាប់ផែនការ កីឡារដូវរងានៅក្នុងទីក្រុងប៉េកាំងនៅឆ្នាំ២០២២៕
None
