លោកស្រី ដួងចៃ អាសាវ៉ាជីនតាឈីត (Duangjai Asawachintachit) អគ្គលេខាធិការនៃក្រុមប្រឹក្សាវិនិយោគថៃ បាននិយាយថា គេកំពុងមើលឃើញភាពប្រសើរឡើងរបស់អាជីវកម្មទាំងមូល ប៉ុន្តែភាពមិនច្បាស់លាស់ដែលកំពុងកើតមានទាក់ទងនឹងមេរោគបំប្លែងថ្មី តម្រូវឱ្យរដ្ឋាភិបាលមានការលើកទឹកចិត្តជាបន្តបន្ទាប់ទៀត ដើម្បីគាំទ្រការវិនិយោគ។
ក្រុមប្រឹក្សាវិនិយោគថៃ បាននិយាយថា ការរំពឹងទទួលបានលំហូរវិនិយោគប្រមាណជិត ១៥ពាន់លានដុល្លារអាមេរិកនៅឆ្នាំ២០២២ គឺវាមានប្រហាក់ប្រហែលនឹងឆ្នាំ២០២១នេះដែរ ដោយសរុបទំហំទុនវិនិយោគទាំងការវិនិយោគនៅក្នុងស្រុក និងការវិនិយោគពីក្រៅប្រទេសនៅឆ្នាំនេះ ថៃរំពឹងទទួលបានប្រមាណជិត ១៨ពាន់លានដុល្លារ ខណៈកាលពីឆ្នាំ២០២០មានតែប្រមាណជាង ១៤ពាន់លានដុល្លារប៉ុណ្ណោះ។អត្ថបទគួរអាន
ភាពមិនប្រាកដប្រជានៃជំងឺរាតត្បាតជាបន្តបន្ទាប់ បានធ្វើឲ្យមានការពន្យារពេលមួយឆ្នាំសម្រាប់គម្រោងលើកទឹកចិត្តការវិនិយោគនេះ ដែលរួមមានការលើកលែងពន្ធសម្រាប់គម្រោងវិនិយោគខ្នាតធំជាដើម។ ទន្ទឹមនេះ ក្រុមប្រឹក្សាវិនិយោគថៃ ក៏បានអនុម័តការបន្ថែមរយៈពេលមួយឆ្នាំទៀត នៃការលើកទឹកចិត្តសម្រាប់ការវិនិយោគនៅក្នុងតំបន់សេដ្ឋកិច្ចពិសេសនៅភាគខាងកើតនៃប្រទេសផងដែរ ដែលវាជាចំណុចស្នូលនៃកិច្ចខិតខំប្រឹងប្រែងរបស់រដ្ឋាភិបាលក្នុងជំរុញដល់ឧស្សាហកម្មបច្ចេកវិទ្យាខ្ពស់។
សូមបញ្ជាក់ថា ថ្មីៗនេះ រដ្ឋមន្ត្រីក្រសួងហិរញ្ញវត្ថុថៃ លោក អាកខុម បានឱ្យដឹងថា សេដ្ឋកិច្ចថៃត្រូវបានរំពឹងថា នឹងងើបឡើងវិញពេញលេញ ដូចទៅនឹងកម្រិតមុនពេលមានជំងឺរាតត្បាតកូវីដ១៩បាន គឺត្រូវរង់ចាំដល់ឆ្នាំ ២០២៣ ខណៈនៅឆ្នាំ២០២២ ថៃរំពឹងថា សេដ្ឋកិច្ចនឹងចាប់ផ្ដើមងើបឡើងជាបណ្ដើរប៉ុណ្ណោះ៕អត្ថបទដោយ៖ ស៊ើង និមល់
None
