នៅទីបំផុតកូនស្រីពៅរបស់លោក ថាក់ស៊ីន គឺលោកស្រី ផែថងថាន ស៊ីណាវ៉ាត្រា ត្រូវបានសភាតំណាងរាស្ត្ររបស់ប្រទេសថៃ បោះឆ្នោតគាំទ្រឱ្យធ្វើជានាយករដ្ឋមន្ត្រីទី៣១របស់ថៃនៅក្នុងកិច្ចប្រជុំនៅថ្ងៃទី១៦ សីហា នេះ ជាមួយសំឡេងគាំទ្រ៣១៩ទល់នឹង១៤៥សំឡេង ខណៈ២៧សំឡេងទៀតបានបោះឆ្នោតអនុប្បវាទ។
ស្ថិតក្នុងវ័យ៣៧ឆ្នាំលោកស្រី ផែថងថាន បានក្លាយជានាយករដ្ឋមន្ត្រីវ័យក្មេងជាងគេបំផុតនៅក្នុងប្រវត្តិសាស្ត្ររបស់ប្រទេសថៃ ហើយលោកស្រីជានាយករដ្ឋមន្ត្រីស្ត្រីទីពីរ បន្ទាប់ពីលោកស្រី យីងឡាក់ ស៊ីណាវ៉ាត្រា ដែលត្រូវម្តាយមីង និងជាបុគ្គលទី៣សម្រាប់ត្រកូល ស៊ីណាវ៉ាត្រា ដែលបានក្លាយជានាយករដ្ឋមន្ត្រីថៃ។
ក្នុងតំណែងជានាយករដ្ឋមន្ត្រី លោកស្រី ផែថងថាន ត្រូវប្រឈមមុខនឹងបញ្ហាជាច្រើនដូចជាភាពស្រពេចស្រពិលនៃសេដ្ឋកិច្ច ការធ្លាក់ចុះប្រជាប្រិយភាពរបស់គណបក្សភឿថៃ និងការមិនទាន់ដោះស្រាយកម្មវិធីប្រគល់សាច់ប្រាក់ដ៏មានប្រជាប្រិយរបស់ខ្លួនដែលមានទំហំរហូតដល់ជាង១៤ពាន់លានដុល្លារផងដែរ៕
អត្ថបទ៖ សុខ មង្គល
