ការចាក់វ៉ាក់សាំងលាយឡំគ្នានេះ រដ្ឋាភិបាលហ្វីលីពីននឹង សាកល្បងលើមនុស្សចំនួន ១.៥០០នាក់សិន ដោយនឹងប្រើប្រាស់វ៉ាក់សាំងចិន Sinovac ចាក់លាយលំគ្នាជាមួយនឹងវ៉ាក់សាំងប្រភេទផ្សេងទៀត។
មន្ត្រីជាន់ខ្ពស់រដ្ឋាភិបាលហ្វីលីពីន បាននិយាយថា ការសាកល្បងចាក់វ៉ាក់សាំងលាយលំប្រភេទគ្នានេះ គឺដើម្បីធ្វើយ៉ាងណា ស្វែងរកប្រសិទ្ធភាពវ៉ាក់សាំងដែលល្អបំផុតសម្រាប់ពលរដ្ឋហ្វីលីពីន បន្ទាប់ពីមានប្រទេសជាច្រើនបានរាយការណ៍ថា ការចាក់វ៉ាក់សាំងលាយលំប្រភេទគ្នានេះ គឺបង្កើនប្រសិទ្ធភាពខ្ពស់ជាងការចាក់តាមធម្មតា។
ជាមួយនឹងអ្នកឆ្លងកូវីដ១៩ជិត៣លានករណី និងមានអ្នកស្លាប់ជាង៤ម៉ឺននាក់ បានធ្វើឲ្យហ្វីលីពីន បានឈរនៅលំដាប់ទី២ ដែលមានករណីឆ្លង និងស្លាប់ដោយសារកូវីដ១៩ខ្ពស់ជាងគេបំផុត នៅក្នុងតំបន់អាស៊ីអាគ្នេយ៍នេះ។ ទោះយ៉ាងណា បច្ចុប្បន្ន ប្រទេសសមាជិកអាស៊ានមួយនេះ ក៏មានការចាក់វ៉ាក់សាំងគ្រប់ចំនួន២ដូសបានដល់ប្រជាជនរបស់ខ្លួនជិត ២៦លាននាក់រួចហើយ ឬមានប្រហែល១ភាគបីនៃចំនួនប្រជាជនដែលមានសិទ្ធិទទួលបានវ៉ាក់សាំងសរុប។ យ៉ាងណាមិញ ក្នុងចំណោមវ៉ាក់សាំងជិត១០០លានដូស ដែលហ្វីលីពីនទទួលបាន គឺមានជិតពាក់កណ្ដាល ជាវ៉ាក់សាំងស៊ីណូវ៉ាក់របស់ចិន។អត្ថបទគួរអាន
ការរឹតបន្ដឹងវិធានការបិទខ្ទប់រយៈពេលវែង កាលពីឆ្នាំមុននេះ បានកាត់បន្ថយការងាររាប់លានកន្លែង និងបានធ្វើឲ្យការចំណាយនៅក្នុងប្រទេសហ្វីលីពីនមានការធ្លាក់ចុះផងដែរ ខណៈដែលប្រទេសនេះ ក៏ស្ថិតក្នុងចំណោមប្រទេសដែលមានសេដ្ឋកិច្ចរីកចម្រើនលូតលាស់លឿនជាងគេបំផុតនៅអាស៊ីផងដែរ។
គួររំឭកថា ថ្មីនេះដែរ ហ្វីលីពីនក៏កំពុងគិតគូក្នុងការឈានទៅបើកប្រទេសទទួលទេសចរបរទេសដែលបានចាក់វ៉ាក់សាំងរួចផងដែរ ខណៈដែលប្រទេសជាច្រើន នៅក្នុងតំបន់អាស៊ានកំពុងញ៉ាប់ដៃញ៉ាប់ជើងមែនទែនក្នុងការបើកជើងមេឃទទួលទេសចរបរទេស ក្នុងនោះថៃ គឺមានការបើកជើងមេឃមុនគេ។
ជុំវិញនឹងការបើកប្រទេសទទួលទេសចរបរទេសនេះដែរ ប្រធានាធិបតីឥណ្ឌូនេស៊ី លោក Joko Widodo ថ្មីៗនេះ ក៏បានអំពាវនាវដល់ប្រទេសអាស៊ីអាគ្នេយ៍ បង្កើនល្បឿនផែនការរបស់ខ្លួន ក្នុងការបង្កើតនូវការធ្វើដំណើរឆ្លងព្រំដែននៅក្នុងតំបន់ ដើម្បីជួយស្ដារវិស័យទេសចរ និងជំរុញការស្ទុះងើបឡើងនៃសេដ្ឋកិច្ចដែលបានរងផលប៉ះពាល់ដោយសារតែកូវីដ១៩ផងដែរ៕None
