អ្នកជំនាញក្នុងវិស័យដឹកជញ្ជូនជឿជាក់ថា គម្រោងនេះ វានឹងជួយរួមចំណែកធ្វើការដឹកជញ្ជូននិងតម្លៃដឹកជញ្ជូននៅកម្ពុជាកាន់តែប្រសើរ ជាពិសេសនឹងជួយសម្រាលបន្ទុកនៃការដឹកជញ្ជូននៅក្នុងកំពង់ផែក្រុងព្រះសីហនុ ដែលកំពុងមានការកកស្ទះផងដែរ។ ក្រុមការងារខេមបូណូមីស លម្អិតលើរឿងនេះដូចតទៅ !
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនបានបញ្ជក់ថា គម្រោងមជ្ឈមណ្ឌលភស្តុភារកម្ម និងកំពង់ផែពហុបំណងស្ថិតនៅក្នុងក្រុងបូកគោ ខេត្តកំពត នឹងបើកការដ្ឋានសាងសង់នៅថ្ងៃទី៥ ខែឧសភា ឆ្នាំ២០២២ ដើម្បីត្រៀមបម្រើឲ្យវិស័យដឹកជញ្ជូន និងឡូជីស្ទីក ដែលកំពុងមានការរីកចម្រើន។ ឯកឧត្តមរំពឹងថា តាមរយៈគម្រោងនេះ វានឹងជួយរួមចំណែកធ្វើឲ្យវិស័យដឹកជញ្ជូន នៅកម្ពុជាកាន់តែប្រសើរ ជាពិសេសជួយទាក់ទាញការវិនិយោគតែម្តង។ ក្រៅពីគម្រោងកំពង់ផែពហុបំណងនេះ ខេត្តកំពតក៏មានកំពង់ផែទេសចរណ៍មួយទៀតផងដែរ ដែលមកទល់ពេលនេះសម្រេចការសាងសង់បានជាង៩០%ហើយ។
អត្ថបទគួរអាន
ជាមួយគ្នានេះឧកញ៉ា ស៊ិន ចន្ធី ប្រធានសមាគមភស្តុភារកម្ពុជាបានបង្ហាញការគាំទ្រ និងសុទិដ្ឋិនិយមខ្ពស់ចំពោះគម្រោងនេះ ក្នុងជួយធ្វើឲ្យប្រសើរឡើងនូវវិស័យដឹកជញ្ជូនតាមផ្លូវទឹក ដែលរាជរដ្ឋាភិបាលកម្ពុជាកំពុងយកចិត្តដាក់ខ្ពស់។ ក្រៅពីនេះ រាជរដ្ឋាភិបាលកម្ពុជាតាមរយៈក្រសួងសាធារណការ និងដឹកជញ្ជូនកំពុងសិក្សាលើគម្រោងបង្កើតផ្លូវដឹកជញ្ជូនតាមផ្លូវទឹកពីទន្លេបាសាក់នៅរាជធានីភ្នំពេញទៅខេត្តកែបផងដែរ។ តាមរយៈគម្រោងទាំងនេះ វានឹងជួយជំរុញកំណើនការដឹកជញ្ជូនតាមផ្លូវទឹក ដែលជាការដឹកជញ្ជូនមួយដ៏មានសក្តានុពលនាពេលបច្ចុប្បន្ន។
គួរបញ្ជាក់ថា គម្រោងមជ្ឈមណ្ឌលភស្តុភារកម្មនិងកំពង់ផែពហុបំណងតម្លៃជាង១ពាន់លានដុល្លារនៅខេត្តកំពត មានទីតាំងស្ថិតនៅភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពត។ គម្រោងនេះ នឹងអាចបង្កើតការងារដល់ពលរដ្ឋបានជិត៦០០កន្លែង៕
None
