ធនាគារអាម៉េរិក JPMorgan ដែលជាធនាគារធំបំផុតទី៥ ក្នុងពិភពលោកបានព្យាករថា កំណើននៅក្នុងបណ្ដាប្រទេសកំពុងអភិវឌ្ឍន៍ នឹងថយចុះពីរង្វង់៤,១% នៅឆ្នាំ២០២៤ មកនៅត្រឹមរង្វង់៣,៤% នៅឆ្នាំ២០២៥ ខណៈដែលកំណើនក្នុងបណ្ដាទីផ្សារកំពុងរីកចម្រើនឆាប់រហ័ស ដែលមិនរាប់បញ្ចូលប្រទេសចិន ត្រូវបានព្យាករថា នឹងធ្លាក់ចុះពីរង្វង់៣,៤% មកនៅត្រឹមរង្វង់៣%។
ធនាគារនេះ បានឱ្យដឹងទៀតថា សញ្ញាបណ្ណ ឬមូលបត្របំណុលក្នុងបណ្ដាទីផ្សារកំពុងរីកចម្រើនឆាប់រហ័សទំនងជាជួបបញ្ហាធំៗ ជាពិសេសក្រោយពីប្រធានាធិបតីទើបជាប់ឆ្នោតមកពីគណបក្សសាធារណរដ្ឋ គឺលោក ដូណាល់ ត្រាំ វិលត្រប់ទៅកាន់សេតវិមានជាផ្លូវការនៅខែមករា ដើមឆ្នាំ២០២៥ ខាងមុខ ខណៈដែលគោលនយោបាយរបស់គណបក្សសាធារណរដ្ឋលើពន្ធគយ ភូមិសាស្ត្រនយោបាយ និងបញ្ហាក្នុងស្រុករបស់សហរដ្ឋអាម៉េរិក អាចនឹងធ្វើឱ្យប្រាក់ដុល្លារហក់ឡើងថ្លៃ និងឈានទៅដល់ការដំឡើងអត្រាការប្រាក់។
ធនាគារអាម៉េរិក JPMorgan បានព្យាករថា អ្នកវិនិយោគអាចនឹងសម្រុកដកទុនយ៉ាងច្រើនចន្លោះពី៥ពាន់លានដុល្លារអាម៉េរិក ទៅ១៥ពាន់លានដុល្លារអាម៉េរិក ចេញពីមូលនិធិសញ្ញាបណ្ណនៅក្នុងបណ្ដាទីផ្សារកំពុងរីកចម្រើនឆាប់រហ័សនៅឆ្នាំក្រោយ ដែលភាគច្រើននៃការដកទុនចេញនេះ គឺដោយសារតែគោលនយោបាយរបស់សហរដ្ឋអាម៉េរិក ធ្វើឱ្យប៉ះពាល់ដល់ទំនុកចិត្តរបស់អ្នកវិនិយោគ។
ធនាគារនេះ ក៏បានព្យាករដែរថា ការបោះផ្សាយលក់សញ្ញាបណ្ណ ឬមូលបត្របំណុលនៅទូទាំងពិភពលោកអាចនឹងមានទំហំសរុប១៦៩ពាន់លានដុល្លារអាម៉េរិក នៅឆ្នាំ២០២៥ ដែលបានធ្លាក់ចុះតិចតួចបើធៀបនឹងឆ្នាំ២០២៤៕
ដោយ: តែម សុខុម
