ក្រុមហ៊ុន Top Glove បានបញ្ជាក់ថា ក្រុមហ៊ុនបានបិទរោងចក្រជាង ២០កន្លែងហើយ នៅក្រៅទីក្រុងកូឡាឡាំពួរ តាំងពីថ្ងៃទី ១៧ ខែវិច្ឆិកា មកម្ល៉េះ បន្ទាប់ពីបានរកឃើញកម្មករជាង ៣ពាន់នាក់ បានឆ្លងមេរោគកូវីដ-១៩នេះ ខណៈដែលទីតាំង ៨កន្លែងផ្សេងទៀត កំពុងតែដំណើរការដោយប្រើប្រាស់សមត្ថភាពត្រឹមតែ ២០%ប៉ុណ្ណោះ។
ប្រធានក្រុមហ៊ុន Top Glove បានបង្ហាញឲ្យដឹងថា ក្រុមហ៊ុនជាអ្នកផ្គត់ផ្គង់ដ៏ធំមួយនៅក្នុងសកលលោក ដូច្នេះហើយការកាត់ផ្តាច់ខ្សែចង្វាក់ផ្គត់ផ្គង់ នឹងប៉ះពាល់ដល់តម្រូវការផ្គត់ផ្គង់ក្នុងទីផ្សារ ហើយតម្លៃក៏អាចនឹងកើនឡើងផងដែរ។
អត្ថបទទាក់ទង!
ក្រុមហ៊ុនមួយនេះ កាន់កាប់ចំណែកផ្គត់ផ្គង់ផលិតផលស្រោមដៃដល់ទៅ ២៥% នៃការផ្គត់ផ្គង់សរុបរបស់ពិភពលោក ហើយដោយសារតែបញ្ហាមេរោគកូវីដ-១៩ ការចែកចាយផលិតផលអាចនឹងត្រូវបានពន្យារពេល ២ ទៅ ៤សប្តាហ៍ ដែលប៉ះពាល់ដល់ការលក់ប្រចំាឆ្នាំ ប្រមាណ ៣% ដែរ។
ថ្នាក់ដឹកនាំជាន់ខ្ពស់ក្រុមហ៊ុន Top Glove បានអះអាងថា បុគ្គលិកពុំមានការពាក់ព័ន្ធដោយផ្ទាល់ទៅនឹង ស្រោមដៃនោះទេ ព្រោះពួកគេប្រើប្រាស់បច្ចេកវិទ្យាទំនើបដោយស្វ័ប្រវត្តិទាំងអស់ លើសពីនេះ គ្មានការបញ្ជាទិញណាមួយ ត្រូវបានលុបចោលនោះទេ ហើយក្រុមហ៊ុន នឹងផ្តល់អាទិភាពដល់មន្ទីរពេទ្យ និងសេវាកម្មចាំបាច់ អំឡុងពេលខ្វះខាតនេះ។
ក្រុមហ៊ុនម៉ាឡេស៊ីមួយនេះ មានបុគ្គលិកសរុបជាង ២ម៉ឺននាក់ និងរោងចក្រចំនួន ៤១កន្លែងក្នុងប្រទេសម៉ាឡេស៊ី និង ៦កន្លែងនៅប្រទេសផ្សេងៗ ហើយមានសមត្ថភាពផលិតស្រោមដៃ ៩០ពាន់លានឯកតា ក្នុងមួយឆ្នាំ នឹងធ្វើការនាំចេញទៅកាន់ ១៩៥ប្រទេសទូទាំងសកលលោក៕
None
