ប្រធានាធិបតីអាម៉េរិក លោក ដូណាល់ ត្រាំ បានចេញមកការពារគោលនយោបាយពន្ធ និងការជំរុញប្រសិទ្ធការងាររបស់ខ្លួន ក្រោយពលរដ្ឋ ក៏ដូចជាអ្នកវិនិយោគបានបង្ហាញការព្រួយបារម្ភចំពោះគោលនយោបាយរបស់លោកក្នុងការបង្កើតភាពមិនច្បាស់លាស់សម្រាប់អាជីវកម្ម និងសេដ្ឋកិច្ចរបស់អាម៉េរិក។ ទន្ទឹមនឹងនេះ ប្រធានាធិបតីទី៤៧របស់អាម៉េរិក រូបនេះ បានច្រានចោលការព្យាកររបស់ក្រុមអ្នកវិភាគ ដែលវាយតម្លៃថា ក្រោមគោលនយោបាយរបស់លោកនឹងទាញទម្លាក់សេដ្ឋកិច្ចអាម៉េរិក ឱ្យធ្លាក់ចូលក្នុងវិបត្តិ ដូចអ្វីដែលលោកធ្លាប់បានដឹកនាំធ្វើឱ្យសេដ្ឋកិច្ចអាម៉េរិក ធ្លាក់ក្នុងវិបត្តិម្តងកាលពីអំឡុងវិបត្តិកូវីដ-១៩។
យ៉ាងណាក៏ដោយ លោក ដូណាល់ ត្រាំ ហាក់ទទួលស្គាល់ចំពោះការព្រមានពីការធ្លាក់ចូលក្នុងវិបត្តិសេដ្ឋកិច្ចនៅត្រីមាសទី១ឆ្នាំនេះ របស់ធនាគារកណ្តាល តែលោក នៅតែព្យាយាមការពារគោលនយោបាយរបស់ខ្លួន។ លោក ត្រាំ ទទួលស្គាល់ថា ផែនការរបស់លោកអាចធ្វើឱ្យប៉ះពាល់ដល់កំណើនសេដ្ឋកិច្ចរបស់សហរដ្ឋអាម៉េរិក ប៉ុន្តែគោលនយោបាយនេះនឹងនាំមកនូវភាពអស្ចារ្យសម្រាប់សហរដ្ឋអាម៉េរិក នាពេលអនាគត។
ពាក់ព័ន្ធការព្យាករពីការធ្លាក់ចូលក្នុងវិបត្តិសេដ្ឋកិច្ចរបស់អាម៉េរិក នៅឆ្នាំ២០២៥ នេះ លោក ត្រាំ បានឆ្លើយតបយ៉ាងខ្លីថា លោកស្អប់ការព្យាករនេះណាស់។ លោកបានអះអាងថា អ្វីដែលលោកកំពុងតែធ្វើវាជារឿងធំណាស់ ដោយវាត្រូវការចាយពេលវេលាយូរបន្តិច ប៉ុន្តែអាម៉េរិកនឹងមានស្ថានភាពប្រសើរជាងបច្ចុប្បន្ន។
ជាមួយគ្នានេះ លោក ត្រាំ បានលើកឡើងថា សហរដ្ឋអាម៉េរិក ត្រូវបានគេហែកចែកផលប្រយោជន៍ជាយូរមកហើយ ដោយក្រុមអ្នកសកលនិយម ប៉ុន្តែអ្វីដែលសហរដ្ឋអាម៉េរិក កំពុងធ្វើ គឺដើម្បីឲ្យពលរដ្ឋអាម៉េរិក ទទួលបាននូវយុត្តិធម៌មកវិញ៕
ដោយៈ សរ សុជាតិ
