យោងតាមលិខិតរបស់លោក Joseph Felter, ឧបការីរងរដ្ឋមន្រ្តីការពារជាតិអាមេរិកសម្រាប់តំបន់អាស៊ីខាងត្បូង និងអាស៊ីអាគ្នេយ៍មកលោកទៀ បាញ់, លោកJoseph Felter បានសរសេរថា ការមិនទទួលជំនួយអាមេរិកបានបង្កឲ្យមានការគិតថា អាចនឹងមានវត្តមានយោធាចិនទៅវិញ។
ក្នុងលិខិតដដែលនោះ លោក Joseph Felter បានស្នើឲ្យលោក ទៀ បាញ់ ផ្តល់ព័ត៌មាន លម្អិត និងការពន្យល់ថា ហេតុអ្វីបដិសេធជំនួយអាមេរិចដើម្បីជួសជុលកន្លែងហ្វឹកហ្វឺននិងកន្លែងសំចតសម្រាប់ជួសជុលទូក ដែលភាគីកម្ពុជាបានស្នើសុំឲ្យអាមេរិកជួយកាលពីខែមករា ដើម្បីបន្ថែមសមត្ថភាពសន្តិសុខដែនសមុទ្រ។
អត្ថបទទាក់ទង!
លោក Joseph Felter បានសរសេរបន្ថែមថា ខណ:ដែលគាត់បានចំណាយពេលវេលាយ៉ាងច្រើនដើម្បីស្វែករកជំនួយនោះ នៅទីក្រុងវ៉ាស៊ីនតោន ដើម្បីជួយកម្ពុជាហើយទីចុងបញ្ចប់ក៏ទទួលបានចម្លើយវិជ្ជមាននៅខែមេសា ស្រាប់តែគាត់បានលិខិតពីក្រសួងការពារជាតិកម្ពុជា នៅខែមិថុនាបដិសេធជំនួយថវិកាអាមេរិកដោយអះអាងថាវា «មិនចាំបាច់ទៀតទេ»។
លោក Joseph Felter បានសរសេរទៅលោក ទៀ បាញ់ ដូច្នេះថា«ខ្ញុំនឹងពិតជាសូមថ្លែងអំណរគុណយ៉ាងជ្រាលជ្រៅចំពោះការពន្យល់លម្អិតបន្ថែមទៀតអំពីមូលហេតុអ្វីដែលការជួសជុលទាំងនេះ - ដែលបុគ្គលិករបស់លោកបានស្នើសុំ - មិនចាំបាច់ទៀតទេក៏ដូចជាព័ត៏មានអំពីផែនការទៅអនាគតរបស់លោក ទាក់ទងនឹងទីកន្លែងដែលបានកសាងដោយថវិកាសហរដ្ឋអាមេរិក។»
លោក Joseph Felter បានសរសេរបន្ថែមថា«លិខិតជូនដំណឹងថ្ងៃទី៦ ខែមិថុនាឆ្នាំ ២០១៩ ត្រូវបានគេមើលឃើញទូទាំងរដ្ឋាភិបាលសហរដ្ឋអាមេរិកហើយកំពុងតែជំរុញឱ្យមានការគិតថា ការផ្លាស់ប្តូរគោលនយោបាយនេះអាចបង្ហាញពីផែនការធំជាងនេះ សម្រាប់ឲ្យមានការផ្លាស់ប្តូរនៅមូលដ្ឋានកងទ័ពជើងទឹករាម ជាពិសេស ពាក់ព័ន្ធនឹងការទទួលយោធាចិន។»
លោក Joseph Felter បានសរសេរបន្ថែមថា សហរដ្ឋអាមេរិកបានផ្តល់ជំនួយ និងការគាំទ្រដល់យោធាកម្ពុជាអស់រយ:ពេល ២៨ឆ្នាំហើយសង្ឃឹមថា អាចបន្តធ្វើការជាមួយគ្នាបន្តទៀតទៅអនាគត។
លោកឈុំ សុជាតិ អ្នកនាំពាក្យក្រសួងការពារជាតិ បានអះអាងថា កម្ពុជាមិនបានបដិសេធជំនួយថវិការបស់អាមេរិកនោះទេ ក៏ប៉ុន្តែគ្រាន់បានស្នើឲ្យថវិកានោះទៅធ្វើទីតាំងផ្សេងនៅក្នុងខេត្តព្រះសីហនុហ្នឹងដែរ។
លោកឈុំ សុជាតិ បាននិយាយដូច្នេះថា«យើងមិនបានបដិសេធថវិកាហ្នឹងទេ។ យើងគ្រាន់តែឲ្យគេធ្វើនៅកន្លែងផ្សេង គឺនៅកោះព្រាប។»
លោកឈុំ សុជាតិ បាននិយាយថា លោកមិនដឹងថា នឹងមានការប្រែប្រួលអ្វីនោះទេ នៅមូលដ្ឋានកងទ័ពជើងទឹករាម ហើយលោកបន្ថែមថា កម្ពុជាក៏នឹងមិនមានមូលដ្ឋានយោធាចិននោះទេ៕
None
