ក្រុមហ៊ុនដំឡើងបន្ទះសូឡា Auxin ដែលមានមូលដ្ឋាននៅរដ្ឋកាលីហ្វ័រញ៉ាសហរដ្អាមេរិក បានដាក់ញត្តិថ្មីមួយទៅកាន់ក្រសួងពាណិជ្ជកម្មអាមេរិកកាលពីថ្ងៃទី ៨ កុម្ភៈ នេះ ដោយស្នើសុំឱ្យមានការពិនិត្យឡើងវិញលើការនាំចូលបន្ទះសូឡាពីប្រទេសកម្ពុជា ម៉ាឡេស៊ី ថៃ និងវៀតណាម។ ការដាក់ញត្តិថ្មីនេះធ្វើឡើងប៉ុន្មានថ្ងៃ បន្ទាប់ពីរដ្ឋបាលរបស់ប្រធានាធិបតីអាមេរិកលោក ចូ បៃដិន បានបន្ដការយកពន្ធគយ ប៉ុន្តែក៏មានបន្ធូរបន្ថយពន្ធលើផលិតផលថាមពលពន្លឺព្រះអាទិត្យដែលផលិតនៅបរទេស ដែលប្រការនេះបានធ្វើឲ្យក្រុមហ៊ុនផលិតបន្ទះសូឡាតូចៗនៅអាមេរិកខកចិត្តជាខ្លង។
សូមជម្រាបថា អ្នកផលិតបន្ទះសូឡាក្នុងស្រុករបស់អាមេរិកក្នុងរយៈពេលប៉ុន្មានឆ្នាំថ្មីៗនេះបានស្វែងរកដំណោះស្រាយពាណិជ្ជកម្មម្តងហើយម្តងទៀតជុំវិញការនាំចូលបន្ទះសូឡានេះ ដោយពួកគេបាននិយាយថា ផលិតផលរបស់ពួកគេមិនអាចប្រកួតប្រជែងជាមួយនឹងបន្ទះសូឡាផលិតនៅអាស៊ីដែលមានតំលៃថោក និងគ្របដណ្តប់ទីផ្សារបាននោះទេ។
អត្ថបទទាក់ទង
ប៉ុន្តែក្រុមហ៊ុនពាណិជ្ជកម្មបន្ទះសូឡាធំៗរបស់សហរដ្ឋអាមេរិកវិញ បានប្រឆាំងនឹងរនាំងពន្ធគយនេះ ដោយសារតែសមាជិករបស់ពួកគេ ដែលមានដូចជា អ្នកអភិវឌ្ឍន៍ឧបករណ៍ និងការដំឡើងបន្ទះសូឡា ពឹងផ្អែកលើការនាំចូលផលិតផលតម្លៃថោក ដើម្បីប្រកួតប្រជែងជាមួយឥន្ធនៈហ្វូស៊ីល។
គួររំឭកថា ប្រធានាធិបតីអាមេរិក Joe Biden កាលពីថ្ងៃសុក្រសប្តាហ៍មុន បានចុះហត្ថលេខាបន្តការយកពន្ធលើបន្ទះសូឡានាំចូលពីក្រៅប្រទេស ដែលចាប់អនុវត្តតាំងពីជំនាន់លោក ដូណាល់ ត្រាំ នៅជាប្រធានាធិបតីម្ល៉េះ ពិសេសបន្ទះសូឡានាំចូលពីប្រទេសចិនទាំងអស់តែម្ដង។ គេនៅចាំបានថា កាលពីរដ្ឋបាលលោក Donald Trump ពោលគឺនៅឆ្នាំ២០១៨អាមេរិកបានផ្តើមបន្ថែមពន្ធលើការនាំចូលផលិផលបន្ទះសូឡាពីប្រទេសចិន ក្នុងអត្រា ៣០% ហើយក្រោយមកចុះមកនៅត្រឹម ១៥%វិញ៕
អត្ថបទ ស៊ើង និមល់
None
