យោងតាមសេចក្តីរាយការណ៍របស់បណ្តាញព័ត៌មាន Vietnam News បានឲ្យដឹងថា ប្រទេសវៀតណាមមានក្រុមហ៊ុនដំឡើង និងផលិតរថយន្តនៅក្នុងស្រុកជាង៤០ក្រុមហ៊ុនរហូតមកដល់បច្ចុប្បន្ន ដែលអាចមានសមត្ថភាពផ្គត់ផ្គង់ទីផ្សាររថយន្តនៅក្នុងប្រទេសសម្រាប់រថយន្ត ប្រភេទ៩កៅអីចុះដល់ទៅ៧០%នៃទីផ្សារ ពោលគឺអាចផលិតបានរថយន្តសរុបដល់ទៅ ជាង៧៥ម៉ឺនគ្រឿងកាលពីឆ្នាំ២០២២ កន្លងទៅ ។
ប្រភពដដែលបានបន្តទៀតថា ដោយឡែកសម្រាប់រថយន្តក្រុងគឺ ៦០% ផលិតនៅក្នុងស្រុក ខណៈដែលរថយន្តដឹកទំនិញធំៗគឺអាចមានសមត្ថភាពផ្គត់ផ្គង់ដល់ទៅ ៤០% ឯណោះ ។
ទោះបីជារថយន្តទាំងនេះផលិតនៅក្នុងស្រុកក៏ពិតមែន ប៉ុន្តែរថយន្តទាំងនោះក៏នៅ មិនទាន់មានតម្លៃថោកនៅឡើយទេ ពោលគឺវាខ្ពស់ជាងតម្លៃរថយន្តនៅប្រទេសថៃ និងឥណ្ឌូនេស៊ីដល់ទៅពីរដង ហើយបើធៀបនឹងទីផ្សាររថយន្តនៅជប៉ុន និងអាមេរិកក៏តម្លៃរថយន្តនៅវៀតណាមនៅតែខ្ពស់ផងដែរ ។
អត្ថបទគួរអាន
ពាក់ព័ន្ធនឹងបញ្ហានេះក្រសួងឧស្សាហកម្ម និងពាណិជ្ជកម្មវៀតណាម បានឱ្យដឹងថា តម្លៃរថយន្តរបស់វៀតណាម គឺខ្ពស់ជាងប្រទេសក្នុងតំបន់ផ្សេងទៀត ដោយសារតែពន្ធខ្ពស់ និងទិន្នផលផលិតកម្មនៅទាប ប៉ុន្តែទោះបីជាយ៉ាងណាក៏ដោយអ្នកដែលពាក់ព័ន្ធកំពុងតែពិនិត្យនិងខិតខំកែសម្រួល ។
ប្រភពដដែលបានបន្តទៀតថា វិធានការណ៍ដែលរដ្ឋាភិបាលកំពុងតែដាក់ចេញនោះ គឺជំរុញផលិតកម្មគ្រឿងបន្លាស់និងគ្រឿងបង្គុំនានា ស្របពេលដែលពេលនេះវៀតណាមនៅពឹងផ្អែកច្រើន ពោលគឺប្រមាណជា ពី ៨០ ទៅ ៩០ភាគរយ នៃផលិតកម្មរថយន្តរបស់ខ្លួន ។
ប្រភពដដែលបានបន្ថែមថា អ្វីដែលវៀតណាមអាចមានសមត្ថភាពផលិតនៅក្នុងស្រុកពាក់ព័ន្ធនឹងឧស្សាហកម្មរថយន្តនេះ មានតែពាក់ព័ន្ធនឹងសំបកកង់ កៅអី កញ្ចក់ ខ្សែភ្លើង និងផ្នែកប្លាស្ទិកមួយចំនួនប៉ុណ្ណោះ ។
ក្រសួងឧស្សាហកម្ម និងពាណិជ្ជកម្មវៀតណាមបាននិយាយថា ខ្លួននឹងចាត់វិធានការដើម្បីជួយក្រុមហ៊ុនផលិតរថយន្តក្នុងស្រុក និងអ្នកដំឡើងរថយន្តឈានដល់កម្រិតសេដ្ឋកិច្ច ដើម្បីជំរុញឱ្យតម្លៃរថយន្តនៅប្រទេសវៀតណាមធ្លាក់ចុះ។
អត្ថបទ ៖ សរ សុជាតិ
