ការចេញមុខមកប្រកាសពីចំណាត់ការថ្មី របស់គណៈកម្មការមូលបត្រសហរដ្ឋអាមេរិកនេះ ធ្វើឡើងជាលើកដំបូងបំផុតក្នុងន័យឆ្លើយតបទៅកាន់រដ្ឋាភិបាលចិន ចាប់តាំងពីក្រុងប៉េកាំងបានដាក់សម្ពាធ និង ធ្វើការបង្ក្រាបមកលើក្រុមហ៊ុនចិន Didi ក្រោយពេលក្រុមហ៊ុនចិនមួយនេះ បានសម្រេចចុះបញ្ជីក្នុងផ្សារហ៊ុន New York ជាមួយនឹងទឹកប្រាក់ដ៏ច្រើនសម្បើមប្រមាណ ៤ពាន់៤រយលានដុល្លារអាមេរិក។
ការបង្ក្រាបនៅពីពេលនោះ ធ្វើឲ្យតម្លៃភាគហ៊ុនក្រុមហ៊ុនបចេ្ចកវិទ្យាយក្សចិន Didi នៅផ្សារហ៊ុនអាមេរិក New York ធ្លាក់ចុះជាង ២៥% ខណៈដែលតម្លៃភាគហ៊ុនរបស់ក្រុមហ៊ុនចិនប្រមាណ ៩៨ ក្រុមហ៊ុនផ្សេងទៀត ក៏បានរង្គោះរង្គើដូចគ្នាដែរ ពោលគឺបានធ្លាក់ចុះក្នុងរង្វង់១០%។
ការដាក់ចេញនូវចំណាត់ការនេះ ទំនងជាវិធានការថ្មីរបស់សហរដ្ឋអាមេរិក ដើម្បីដាក់សម្ពាធលើក្រុមហ៊ុនចិនវិញ ក៏ដូចជាធានាឲ្យបានពីសុវត្ថិភាពទីផ្សារភាគហ៊ុនរបស់ខ្លួន ពីការប្រមូលយកទិន្នន័យ និង បញ្ហាកម្មសិទ្ធបញ្ញា ដែលជារឿយៗសហរដ្ឋអាមេរិករមែងដាក់ការចោទប្រកាន់នេះ លើរដ្ឋាភិបាលក្រុងប៉េកាំង។
អត្ថបទគួរអាន
សូមជម្រាបថា គិតត្រឹម ៦ខែដំបូងនៅឆ្នាំ២០២១ មានក្រុមហ៊ុនចិនចំនួន២៩ ក្រុមហ៊ុនហើយ ដែលបានចុះបញ្ជីបោះផ្សាយលក់ភាគហ៊ុន និង ប្រមូលបានដើមទុនពីទីផ្សារភាគហ៊ុនអាមេរិកសរុបជាង ៧ពាន់៦រយលានដុល្លារ។
ហើយសូមបញ្ជាក់ដែរថា អស់រយៈពេល១ទសវត្សរ៍មកហើយ ដែលក្រុមអ្នករៀបចំគោលនយោបាយរបស់ទីក្រុងវ៉ាស៊ិនតោន បានផ្ដោតទៅលើការទទួលបានក្រុមហ៊ុនចិន ដែលចុះបញ្ជីលក់ភាគហ៊ុននៅអាមេរិក អនុលោមទៅតាមច្បាប់របស់អាមេរិក។ កាលពីឆ្នាំមុន សភាអាមេរិក ក៏បានអនុម័តនូវច្បាប់ថ្មីមួយ ដែលអនុញ្ញាតឲ្យរដ្ឋាភិបាលអាមេរិក អាចទាត់ចោលក្រុមហ៊ុនចិនចេញពីផ្សារភាគហ៊ុនអាមេរិក លើកលែងតែក្រុមហ៊ុនទាំងអស់នោះ បានប្រកាន់ខ្ជាប់នូវស្ដង់ដារសវនកម្មរបស់អាមេរិកតែប៉ុណ្ណោះ៕
None
