សារព័ត៌មានអនឡាញផ្សាយជាភាសាអង់គ្លេសរបស់វៀតណាម VN Express ផ្សាយថា ប្រាក់ចំណូលប្រចាំឆ្នាំរបស់ប្រជាជនវៀតណាមក្នុងម្នាក់ៗ នៅឆ្នាំ២០២០នេះ ត្រូវបានគេប៉ាន់ស្មានថា មានចំនួន ២.៧៥០ ដុល្លារ ពោលគឺកើនឡើងជិត ១,៣ដង បើប្រៀបធៀបទៅនឹងឆ្នាំ២០១៥ ដែលមានចំនួន ២.១០៩ ដុល្លារ ។
អនុរដ្ឋមន្ត្រីក្រសួងផែនការនិងវិនិយោគរបស់វៀតណាម ត្រូវបានដកស្រង់សម្ដីចុះផ្សាយថា ក្នុងរយៈពេល ៥ ឆ្នាំទៅមុខទៀត ប្រទេសវៀតណាមគួរតែផ្តោតការវិនិយោគលើវិស័យសំខាន់ៗនិងគម្រោងដែលមានសារៈសំខាន់ថ្នាក់ជាតិ ជាពិសេស លើហេដ្ឋារចនាសម្ព័ន្ធដឹកជញ្ជូន ថាមពល ការវិវឌ្ឍទៅរកឌីជីថល ការអភិវឌ្ឍវិទ្យាសាស្ត្រ បច្ចេកវិទ្យា និងនវានុវត្តន៍។
នៅឆ្នាំ២០២៥ ប្រទេសវៀតណាមរំពឹងថា នឹងបញ្ចប់គម្រោងធំ ៗ ដូចជា ផ្លូវល្បឿនលឿនខាងជើង - ខាងត្បូងទាំងមូល និងដំណាក់កាលដំបូងនៃអាកាសយានដ្ឋានអន្តរជាតិ ឡុងថាញ នៅខេត្តដុងណៃ ភាគខាងត្បូង ដែលត្រូវបានគេរំពឹងថា នឹងជួយកាត់បន្ថយបន្ទុកដែលកំពុងលើស នាពេលបច្ចុប្បន្ន នៅអាកាសយានដ្ឋានអន្តរជាតិ នៅទីក្រុងហូជីមិញ ។
អត្ថបទទាក់ទង
នៅតាមទីក្រុងធំ ៗ ក្រសួងចង់ឱ្យការវិនិយោគផ្តោតលើការពន្លឿនគម្រោងផ្លូវដែកទីក្រុង ក្នុងទីក្រុងហាណូយ និងទីក្រុងហូជីមិញ ផ្លូវក្រវាត់ និងគម្រោងប្រព្រឹត្តកម្មសំណល់និងសំរាម ។
កាលពីឆ្នាំមុន នាយករដ្ឋមន្ត្រីវៀតណាម លោក Nguyen Xuan Phuc បានបង្ហាញក្តីសង្ឃឹមថា ប្រទេសវៀតណាមនឹងក្លាយជាប្រទេសដែលមានប្រាក់ចំណូលខ្ពស់ នៅឆ្នាំ២០៤៥។
នាយករដ្ឋមន្ត្រីវៀតណាមក៏បាននិយាយផងដែរថា វៀតណាមនៅពេលឆាប់ៗនេះ អាចឡើងទៅដល់ចំណាត់ថ្នាក់ប្រទេសចំណូលមធ្យមកម្រិតខ្ពស់ ដែលមានចំណូលសរុបប្រចាំឆ្នាំនៃប្រជាជនម្នាក់ៗ មានចំនួន ពី ៣.៩៩៦ដុល្លារអាមេរិក ដល់ ១២.៣៧៥ដុល្លារអាមេរិក ។ ប្រទេសដែលស្ថិតក្នុងចំណាត់ថ្នាក់នេះ រួមមាន ប្រទេសចិន ម៉ាឡេស៊ី ម៉ិកស៊ិក អាហ្វ្រិកខាងត្បូង និង ថៃ ៕
