លោក Trinh Van Quyet ម្ចាស់ក្រុមហ៊ុន FLC group ដែលជាអាណាចក្រជំនួញដ៏ធំមួយនៅវៀតណាម ដោយបានវិនិយោគលើរមណីយដ្ឋានប្រណិតៗ ទីលានវាយកូនហ្គោល និង ក្រុមហ៊ុនអាកាសចរណ៍ Bamboo Airwaysផងដែរ។ មហាសេដ្ឋីវៀតណាមរូបនេះ ត្រូវបានអាជ្ញាធរវៀតណាមចេញដីការចាប់ខ្លួន កាលពីល្ងាចថ្ងៃអង្គារ ពីបទចោទប្រកាន់ថារូបលោក កំពុងរៀបចំទីផ្សារភាគហ៊ុន និងលាក់ព័ត៌មាននៅក្នុងសកម្មភាពភាគហ៊ុន កាលពីថ្ងៃទី ១០ ខែមករា ដែលបណ្តាលឱ្យមានការខាតបង់យ៉ាងធ្ងន់ធ្ងរសម្រាប់អ្នកវិនិយោគ និងជះឥទ្ធិពលយ៉ាងអាក្រក់ដល់សកម្មភាពនៃទីផ្សារភាគហ៊ុនវៀតណាមផងដែរ។ នេះបើតាមការបញ្ជាក់ពីក្រសួងសន្ដិសុខសាធារណៈវៀតណាម។
សេចក្តីថ្លែងការណ៍របស់ក្រសួងដដែលនេះបានបន្ថែមថា ក្រុមមន្ត្រីបានចាប់ផ្តើមប្រមូលផ្តុំបានភស្តុតាង ២១ ទីតាំង រួមនៅទាំងផ្ទះ និងការិយាល័យរបស់លោក Trinh Van Quyet ប៉ុន្ដែក្រសួងមិនបានផ្តល់ព័ត៌មានលម្អិតបន្ថែមឡើយ។
អត្ថបទគួរអាន
មហាសេដ្ឋីវ័យ៤៦ឆ្នាំរបស់វៀតណាម លោក Trinh Van Quyet បានបង្កើតក្រុមហ៊ុន Bamboo Airways ក្នុងឆ្នាំ ២០១៨ ដោយរំពឹងប្រាក់ប្រាក់ចំណូលរាប់ពាន់លានដុល្លារពីវិស័យអាកាសចរណ៍ ដែលទទួលបានពីភ្ងៀវទេសចរណ៍នៅអាស៊ី។ លោក Quyet ធ្លាប់បានប្រាប់សារព័ត៌មាន AFP ក្នុងឆ្នាំ ២០១៨ ថាក្រុមហ៊ុនរបស់លោកនឹង រីកធំធាត់ឡើង ដោយសន្យាថា នឹងទទួលបានប្រាក់ចំណេញច្រើន។ ក្រុមហ៊ុនអាកាសចរណ៍បានពង្រីកយ៉ាងខ្លាំង បន្ទាប់ពីចាប់ផ្តើមការហោះហើរលើកដំបូងរបស់ខ្លួននៅដើមឆ្នាំ ២០១៩ ហើយមានបំណងហោះហើរទៅកាន់គោលដៅអន្តរជាតិចំនួន ៤០ ប្រទេស និងដែនដីនៅដើមឆ្នាំនេះ។
គួរជម្រាបថា ក្រុមហ៊ុនអាកាសចរណ៍ Bamboo Airways មានចំណែកត្រឹមតែ ២០% ប៉ុណ្ណោះ នៃទីផ្សារអាកាសចរណ៍របស់ប្រទេសវៀតណាម ហើយមានតែក្រុមហ៊ុនអាកាសចរណ៍ជាតិ Vietnam Airlines និង ក្រុមហ៊ុនអាកាសចរណ៍តម្លៃទាប Vietjet តែប៉ុណ្ណោះ ដែលមានចំណែកទីផ្សារធំជាងគេ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
