លោក ហ័ង ញ៉ាន ជិញ អគ្គលេខាធិកានៃគណៈកម្មាធិការប្រឹក្សាទេសចរណ៍វៀតណាម បានថ្លែងប្រាប់សារព័ត៌មានក្នុងស្រុក Vietnam Express ថា បើនិយាយពីអត្ថប្រយោជន៍ ដែលវៀតណាមទទួលបាន គឺមិនអាចយកអ្វីមកវាស់វែងបានទេ។ ប៉ុន្ដែ លោក ជឿជាក់ថា ការរៀបចំកម្មវិធីជំនួបកំពូលនេះ នឹងជំរុញខ្លាំង គឺវិស័យទេសចរណ៍ ការវិនិយោគ ពាណិជ្ជកម្ម ពិសេស គឺការឈានទៅការពង្រីកដៃគូពាណិជ្ជកម្មជាមួយកូរ៉េខាងជើង បើកិច្ចពិភាក្សារវាងអាមេរិក និងកូរ៉េខាងជើងសម្រេចបានផ្លែផ្កាល្អ។
លោក ហ័ង ញ៉ាន ជិញ បានលើកឡើងថា «ប្រទេសវៀតណាម ធ្លាប់បានចំណាយលុយរាប់លានដុល្លារអាមេរិក ដើម្បីផ្សព្វផ្សាយពីវិស័យទេសចរណ៍ ប៉ុន្ដែ រាល់ការចំណាយផ្សព្វផ្សាយទាំងប៉ុន្មានពីមុនមកនោះ គឺមានប្រសិទ្ធភាពមិនស្មើនឹងការរៀបចំកម្មវិធីជំនួបរវាងមេដឹកនាំកំពូលរបស់ពិភពលោកទាំងពីររូបនេះឡើយ»។
អត្ថបទទាក់ទង!
ឆ្នាំ២០១៨ ទេសចរបរទេស ដែលធ្វើដំណើរកម្សាន្ដចូលក្នុងប្រទេសវៀតណាមមានប្រមាន ១៥លាន ៥សែននាក់ កើនឡើង២០% ធៀបនឹងឆ្នាំ ២០១៧ ហើយនៅឆ្នាំ២០១៩នេះ វៀតណាមរំពឹងថា ទេសចរបរទេសនឹងកើនឡើងដល់ ១៨លាននាក់។
ពិសេសជាងនេះ នៅមុនជំនួបមកដល់ ក្រុមហ៊ុនវៀតណាម និងអាមេរិក ដែលមានការសម្របសម្រួលពីរដ្ឋាភិបាលប្រទេសទាំងពីរ ក៏បានសម្រេចចុះកិច្ចព្រមព្រៀងពាណិជ្ជកម្មធំៗមួយចំនួនផងដែរ ដែលមានតម្លៃជាទឹកប្រាក់រាប់ពាន់លានដុល្លារអាមេរិកឯណោះ។
ជាក់ស្ដែង មានក្រុមហ៊ុនអាកាសចរណ៍វៀតណាមចំនួនពីរ គឺក្រុមហ៊ុន Vietjet និង Bamboo បានចុះកិច្ចព្រមព្រៀងជាមួយក្រុមហ៊ុនអាមេរិក Boeing ក្នុងការបញ្ជាទិញយន្ដហោះពីក្រុមហ៊ុនអាមេរិក ចំនួន ១១០ គ្រឿង ក្នុងតម្លៃទឹកប្រាក់១៥ពាន់លានដុល្លារអាមេរិក ខណៈដែលថ្មីៗនេះ ប្រទេសវៀតណាម និងអាមេរិក ក៏ទើបតែមានតែមានកិច្ចព្រមព្រៀងហោះហើរត្រង់ទៅមកជាមួយគ្នាផងដែរ។
ក្នុងកិច្ចព្រមព្រៀងទិញយន្ដហោះ១១០គ្រឿងនេះ ក្រុមហ៊ុនវៀតណាម Vietjet នឹងទិញយន្ដហោះប្រភេទ Boeing 737 MAX ចំនួន ១០០ គ្រឿង ពីក្រុមហ៊ុនអាមេរិក Boeing ដែលមានតម្លៃជាទឹកប្រាក់សរុប ១២,៧ ពាន់លានដុល្លារអាមេរិក ខណៈដែលក្រុមហ៊ុន Bamboo បានចុះកិច្ចសន្យាទិញយន្ដហោះប្រភេទ Boeing 787 Wide-bodied ចំនួន១០ គ្រឿង ដែលមានតម្លៃសរុប២,៩ ពាន់លានដុល្លារអាមេរិក។ បន្ថែមពីនេះ ក្រុមហ៊ុន Bamboo ក៏មានផែនការនឹងបញ្ជាទិញ យន្ដហោះ ប្រមាណ២៥ គ្រឿងបន្ថែមទៀត នៅឆ្នាំនេះផងដែរ
លើសពីនេះ តាមរយៈព្រឹត្តិការណ៍ជំនួបនេះដែរ ត្រូវបានគេមើលឃើញថា វៀតណាម នឹងមានឱកាសកាន់តែប្រសើរ ដើម្បីជំរុញការធ្វើពាណិជ្ជកម្មនិងការវិនិយោគជាមួយនឹងកូរ៉េខាងជើង ប្រសិនបើប្រទេសកូរ៉េខាងជើង បានបង្កើននូវទំនាក់ទំនងល្អជាមួយអាមេរិក និងបើកចំហរទីផ្សាររបស់ខ្លួន។ ជាក់ស្ដែង វៀតណាម និងអាមេរិក ដែលធ្លាប់តែជាសត្រូវស៊ីសាច់ហុតឈាមគ្នាកាលពីអតីតកាល តែបច្ចុប្បន្នក៏បានក្លាយជាមហាមិត្តមួយ ដែលមានទំនាក់ទំងល្អទាំងការទូត សេដ្ឋកិច្ច និងពាណិជ្ជកម្ម។
អត្ថបទគួរឲ្យចាប់អារម្មណ៍!
ជាមួយគ្នានេះដែរ គ្រាន់តែទៅដល់ទឹកដីទីក្រុងហាណូយ ប្រទេសវៀតណាមភ្លាម ពោលគឺនៅមុនជំនួបចាប់ផ្ដើម លោកដូណាល់ត្រាំ ក៏បានបង្ហោះសារមួយលើបណ្ដាញ Twitter ផ្លូវការរបស់លោកភ្លែតដែរ ដោយលោកបានសរសេរដោយចង់បញ្ចុះបញ្ជូលកូរ៉េខាងជើងឲ្យមានភាពជឿជាក់ទៅលើអាមេរិក និងដើរតាមគំរូវៀតណាម ដោយអាមេរិកសន្យានឹងជួយជ្រោមជ្រែងកូរ៉េខាងជើង ឲ្យលូតលាស់ដូចវៀតណាមដែរ។
លោក ដូណាល់ត្រាំ បានសរសេរថា «ប្រទេសវៀតណាមកំពុងមានការរីកលូតលាស់ ដូចទៅនឹងកន្លែងពី បី នៃផែនដីនេះ។ កូរ៉េខាងជើង ក៏អាចក្លាយដូចជាប្រទេសវៀតណាមដែរ និងរីកចម្រើនលឿនរហ័សទៀតផង ប្រសិនបើ បោះបង់គម្រោងនុយក្លែអ៊ែចោល។ សក្ដានុពល គឺពិតជាអស្ចារ្យណាស់ ហើយឱកាសដ៏ល្អនេះ គឺដូចជាមិនមានឡើយ នៅក្នុងប្រវត្តិសាស្ត្រ សម្រាប់សម្លាញ់របស់ខ្ញុំ គីម ជុងអុន។ យើងនឹងទទួលបានភាពយុត្តិធម៌ក្នុងពេលឆាប់ៗ ហើយវាជារឿងគួរឲ្យចាប់អារម្មណ៍ណាស់»។
អត្ថបទគួរឲ្យចាប់អារម្មណ៍!
គួរបញ្ជាក់ថា នេះគឺជាជំនួបលើកទី២ហើយ រវាងលោកដូណាល់ត្រាំ និងលោក គីម ជុងអ៊ុន ក្នុងការពិភាក្សាដោយផ្តោតជាសំខាន់ លើការឈានទៅរកដំណោះស្រាយ លុបបំបាត់ គម្រោងអាវុធនុយក្លេអ៊ែររបស់កូរ៉េខាងជើង និងការដោះស្រាយបញ្ហាជម្លោះនៅឧបទ្វីកូរ៉េ ខណៈដែលកាលពីជំនួបលើកទី១ គឺធ្វើឡើងនៅប្រទេសសិង្ហបុរីកាលពីខែមិថុនា ឆ្នាំ២០១៨ តែត្រូវបានគេមើលឃើញថា ហាក់មិនសូវជាទទួលបានលទ្ធផលផ្លែផ្កានោះឡើយ។
តែយ៉ាងណា យើងនឹងរង់ចាំមើលទាំងអស់គ្នាបន្តទៀតថា តើជំនួបលើកទី២នេះ នឹងសម្រេចបានផ្លែផ្កាអ្វីខ្លះ សម្រាប់ភាគីទាំងពីរ ក៏ដូចជាពិភពលោកផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
