ក្រសួងកសិកម្ម និងអភិវឌ្ឍន៍ជនបទវៀតណាម បានគូសបញ្ជាក់ថា ការនាំចូលសាច់ជ្រូកពីក្រៅប្រទេស គឺដើម្បីបំពេញតម្រូវការក្នុងស្រុក ដែលមានការខ្វះខាត ដោយសារតែ ការរាតត្បាតនៃជម្ងឺប៉េស្តជ្រូក បានបំផ្លាញសត្វជ្រូកក្នុងស្រុក និងធ្វើឲ្យតម្លៃកើនឡើងខ្ពស់ ហើយម្យ៉ាងទៀត ជម្ងឺកូវីដ១៩ ក៏ជាការរាំងស្ទះដល់ ការធ្វើពាណិជ្ជកម្ម និងដឹកជញ្ជូនតាមច្រកព្រំដែនផងដែរ។
លោក ង្វៀន សួនហ្វ៊ក នាយករដ្ឋមន្ត្រីវៀតណាម ក៏បានបង្គាប់ឲ្យក្រសួងពាក់ព័ន្ធទាំងអស់ ចាត់វិធានការសំខាន់ៗ ដើម្បីបន្ទាបថ្លៃសាច់ជ្រូក ដោយស្នើឲ្យក្រុមហ៊ុនចិញ្ចឹមសត្វធំៗក្នុងស្រុក ជួយបន្ទាបថ្លៃសាច់ជ្រូករស់ ឲ្យនៅត្រឹមប្រមាណ ៣ដុល្លារ ក្នុងមួយគីឡូក្រាម។
អត្ថបទគួរអាន
អ្វីដែល រដ្ឋាភិបាលវៀតណាមចង់បាន គឺបន្ទាបថ្លៃសាច់ជ្រូករស់ ឲ្យថយចុះពី ៣,៦ដុល្លារ មកនៅត្រឹម ២,៦០ដុល្លារ ក្នុងមួយគីឡូក្រាម ក៏ប៉ុន្តែពុំទាន់អាចធ្វើបាន ដោយសារតែ តម្លៃសាច់ជ្រូកលើទីផ្សារអន្តរជាតិ នៅមានកម្រិតខ្ពស់ ព្រោះវៀតណាម បាននាំចូលសាច់ជ្រូកពី កាណាដា អាល្លឺម៉ង់ ប្រេស៊ីល និងអាមេរិកជាដើម ហើយអ្វីដែលវៀតណាម អាចធ្វើបានគឺពង្រឹងការចិញ្ចឹមជ្រូកឡើងវិញ ដោយផ្តោតទៅលើ ស្តង់ដារសុខភាពអនាម័យ ជាចំបង។
យ៉ាងណាក៏ដោយ ជាជាងការប្រើប្រាស់សាច់ជ្រូកតែមួយមុខ រដ្ឋវៀតណាម ក៏បានណែនាំប្រជាជនរបស់ខ្លួន ប្រើប្រាស់សាច់ផ្សេងៗដូចជា សាច់មាន់ សាច់គោ និងគ្រឿងសមុទ្រ ជំនួស ហើយនៅដើមឆ្នាំ ២០២០នេះ វៀតណាម ក៏បាននាំចូលសាច់ក្របី ២០ពាន់តោន សាច់គោ ១០៤ពាន់តោន និងសាច់បក្សី ជិត ៥០ពាន់តោន។
សូមជម្រាបដែរថា ក្នុងរយៈពេល ២ខែដំបូងនេះ វិស័យកសិកម្មវៀតណាម សម្រេចបានអតិរេកពាណិជ្ជកម្មជាង ១ពាន់លានដុល្លារអាមេរិក ដោយក្នុងនោះ វៀតណាមនាំចូលផលិតផលកសិកម្មជាង ៤ពាន់ ៣រយលានដុល្លារ និងនាំចេញផលិតផលទៅក្រៅប្រទេសវិញជាង ៥,៣ពាន់លានដុល្លារអាមេរិក៕
None
