ប្រធានាធិបតីវៀតណាម លោកង្វៀន ស៊ុនហ្វ៊ុក ក្នុងដំណើរទស្សនកិច្ចផ្លូវរដ្ឋ ទៅកាន់ប្រទេសគុយបាកាលពីដើមសប្តាហ៍មុន បានចុះកិច្ចព្រៀមព្រៀងទិញយកវ៉ាក់សាំងកូវីដ១៩ចំនួន ១០លានដូសពីប្រទេសគុយបា ដែលជាវ៉ាក់សាំងផលិតដោយអ្នកវិទ្យាសាស្ត្រគុយបាផ្ទាល់ មានឈ្មោះថា អាប់ឡាដា (Ablada) ហើយដែលក្រសួងសុខាភិបាលវៀតណាម បានអនុម័តឲ្យប្រើប្រាស់ក្នុងលក្ខខណ្ឌបន្ទាន់រួចហើយដែរ កាលពីពាក់កណ្តាលខែ កញ្ញានេះ។
បើតាមប្រភពពីខាងអាជ្ញាធរគុយបាឲ្យដឹងថា វ៉ាក់សាំងនឹងចាប់ផ្តើមដឹកជញ្ជូនទៅដល់ប្រទេសវៀតណាមនៅថ្ងៃសៅរ៍សប្តាហ៍មុននេះ ហើយរំពឹងថា បាននិងកំពុងទៅដល់ក្នុងអាទិត្យ និងថ្ងៃច័ន្ទនេះ ក្នុងចំនួនដំបូងប្រមាណ ១លានដូស។
គួរជម្រាបផងដែរថា វ៉ាក់សាំងរបស់គុយបាឈ្មោះ Ablada នេះ បានក្លាយជាវ៉ាក់សាំងទី៨ហើយ ដែលរដ្ឋាភិបាលក្រុងហាណូយ បានអនុញ្ញាតឲ្យប្រើប្រាស់ជាផ្លូវការ។ ប៉ុន្តែ ទោះបី វ៉ាក់សាំងជាច្រើនប្រភទត្រូវបានក្រុងហាណូយអនុម័តឲ្យប្រើក្តី ក៏មិនទាន់អាចបំពេញតម្រូវការបានគ្រប់គ្រាន់សម្រាប់ពលរដ្ឋវៀតណាមនោះដែរ។
អត្ថបទគួរអាន
បច្ចុប្បន្នវៀតណាម ជាប្រទេសមានអត្រាចាក់វ៉ាក់សាំងដ៏ទាបជាងគេមួយ បើធៀបនឹងប្រទេសដទៃទៀតក្នុងតំបន់ ពោលវៀតណាមមានអ្នកចាក់វ៉ាក់សាំងបានទាំងពីរដូសចំនួនជិត៧% នៃពលរដ្ឋសរុប ទាំង៩៨លាននាក់របស់ខ្លួនប៉ុណ្ណោះ។
សូមបញ្ជាក់ដែរថា អ្នកវិទ្យាសាស្ត្ររបស់ប្រទេសគុយបា មកទល់ពេលនេះផលិតបានវ៉ាក់សាំងបង្ការកូវីដ១៩ចំនួន៣ប្រភេទហើយ ក្នុងនោះមានដូចជាវ៉ាក់សាំង Ablada ដែលវៀតណាមបញ្ជាទិញនេះ រួមទាំង វ៉ាក់សាំងសូបឺរ៉ាណា02 (Soberana 02) និង សូបឺរ៉ាណាបូក (Soberana Plus)។ វ៉ាក់សាំងទាំងបីនេះ កំពុងត្រូវបានអាជ្ញាធរគុយបា ដាក់សំណើសុំការទទួលស្គាល់ឲ្យប្រើប្រាស់ជាផ្លូវការពីអង្គការសុខភាពពិភពលោកផងដែរ ប៉ុន្ដែ នៅមិនទាន់មានការអនុញ្ញាតពីអង្គការនេះជាផ្លូវការនៅឡើយទេ៕
None
