វៀតណាមគ្រោងចាក់បញ្ចូលទឹកប្រាក់៨២ពាន់លានដុល្លារ ដើម្បីជំរុញសេដ្ឋកិច្ចនៅឆ្នាំ២០២៤

ដើម្បីលើកកម្ពស់ និងពង្រឹងចរន្តសេដ្ឋកិច្ចនៅក្នុងប្រទេសដែលមានប្រជាជនជាង១០០លាននាក់ ធនាគាររដ្ឋវៀតណាម បានកំណត់ទិសដៅលើកកម្ពស់កំណើនឥណទានរហួតដល់១៥% ស្មើនឹង ជាង៨២ពាន់លានដុល្លារនៅឆ្នាំ២០២៤។ វិស័យធនាគារនៅប្រទេសវៀតណាម កំពុងតែប្រឹងប្រែងដើម្បីជំរុញកំណើនសេដ្ឋកិច្ច ស្របពេលដែលកាលពីឆ្នាំ២០២៣ វិស័យធនាគារបានទ្រទ្រង់ស្ថានភាពសេដ្ឋកិច្ចជាច្រើនតាមរយៈកញ្ចប់ឥណទានផ្សេងៗ។ នេះបើតាមសេចក្តីរាយការណ៍របស់សារព័ត៌មាន VN Express។

លោក ដាវ មិញ ថឹ ( Dao Minh Tu ) អគ្គទេសាភិបាលរងធនាគារកណ្តាលវៀតណាម បាននិយាយនៅក្នុងកិច្ចប្រជុំរដ្ឋាភិបាលកាលពីថ្ងៃសុក្រ កន្លងទៅថា កាលពីឆ្នាំ២០២៣ កន្លងទៅវិស័យធនាគារនៅវៀតណាម បានចាក់បញ្ចូលថវិកាប្រមាណជា៥៣ពាន់លានដុល្លារ ពោលគឺមានកំណើនកើនឡើងដល់ទៅជិត១៤% ទៅក្នុងចរន្តសេដ្ឋកិច្ច។ បើតាមមន្ត្រីជាន់ខ្ពស់រូបនេះ ប្រសិនបើស្ថានភាពអំណោយផលនោះ នៅឆមាសទីពីរនៃឆ្នាំនេះ ធនាគាររដ្ឋវៀតណាម នឹងផ្តល់ការអនុញ្ញាតឲ្យស្ថាប័នធនាគារ ដែលមានស្ថានភាពល្អប្រសើរនូវកូតាបញ្ចេញកញ្ចប់ឥណទានបន្ថែមទៀត។

នៅក្នុងកិច្ចខិតខំប្រឹងប្រែងដើម្បីជំរុញសេដ្ឋកិច្ច កាលពីខែធ្នូ ឆ្នាំ២០២៣ បណ្តាធនាគារនានា នៅក្នុងប្រទេសនេះបានជំរុញគោលដៅកំណើនឥណទាន តាមរយៈការផ្តល់ប្រាក់កម្ចីដោយមិនមានការប្រាក់ និងកញ្ចប់ឥណទានតាមរយៈក្រេឌីតកាត ដែលជាហេតុនាំឱ្យនៅក្នុងខែធ្នូ កន្លងទៅនេះ កម្មវិធីឥណទាននៅវៀតណាម មានកំណើនដល់ទៅ៤,៥៦%។

ពាក់ព័ន្ធនឹងផែនការជំរុញសេដ្ឋកិច្ចនេះដែរ លោក ឃ្វៀន ឌឹក ជី ( Nguyen Duc Chi) អនុរដ្ឋមន្ត្រីក្រសួងហិរញ្ញវត្ថុវៀតណាម បានមានប្រសាសន៍ថា វៀតណាមក៏កំពុងតែជំរុញសកម្មភាពសេដ្ឋកិច្ចតាមទីផ្សាភាគហ៊ុនផងដែរ ដោយបច្ចុប្បន្នវៀតណាម មានគណនីជួញដូរភាគហ៊ុនជាង៧លានគណនី។ នៅពេលនេះគេដឹងថា ទីផ្សារភាគហ៊ុនវៀតណាម គឺមានទុនសរុបរហូតដល់ទៅប្រមាណជា២៤៦ពាន់លានដុល្លារ កើនឡើង៩,៥% ពោលគឺស្មើនឹង៦២% នៃផលិតផលក្នុងស្រុកសរុប៕

ដោយៈ សរ សុជាតិ