សារព័ត៌មាន VN Express បានឲ្យដឹងថា ក្រសួងផែនការ និងវិនិយោគ វៀតណាម បានប៉ាន់ប្រមាណ និងព្រមានថា បើសិនជាបញ្ហា Covid-19នេះ កាន់តែវិវត្តទៅរកស្ថានភាពអាក្រក់ទៅនោះ នឹងមានមនុស្សប្រមាណ៤០ម៉ឺននាក់ នឹងត្រូវបាត់បង់ការងារ ហើយមាន ៣លាននាក់ទៀត អាចនឹងត្រូវបញ្ឈប់ពីការងារ។
ចាប់ពីថ្ងៃទី ០១ ខែមករា ដល់ថ្ងៃទី ២៦ ខែមីនា កន្លងមកនេះ មានពលរដ្ឋវៀតណាមជាង ១៥ម៉ឺននាក់ បានដាក់ពាក្យស្នើសុំអត្ថប្រយោជន៍ពីការអត់មានការងារធ្វើ ហើយភាគច្រើន គឺជាអតីតកម្មករនិយោជិត នៅក្នុងវិស័យដឹកជញ្ជូន, កាត់ដេរសម្លៀកបំពាក់, ស្បែកជើង, ទេសចរណ៍, បដិសណ្ឋារកិច្ច និងម្ហូបអាហារ។
អត្ថបទទាក់ទង!
នៅក្នុងត្រីមាសទី១ នៅឆ្នាំនេះដែរ មានអាជីវកម្មជិត ៣,៥ ម៉ឺនអាជីវកម្ម នៅវៀតណាម បានបិទទ្វារ។
កំណើនសេដ្ឋកិច្ចវៀតណាម នៅក្នុងត្រីមាសទី១ ឆ្នាំនេះ ត្រូវបានប៉ាន់ប្រមាណថា មាន ៣,៨២% ធៀបនឹងរយៈពេលដូចគ្នាកាលពីឆ្នាំមុន ដែលជាកំណើនទាបបំផុតក្នុងរយៈពេល១០ឆ្នាំចុងក្រោយនេះ។
នាយករដ្ឋមន្ត្រីវៀតណាម លោក ង្វៀន សៀនហ្វុក បានចេញបញ្ជាឲ្យអាជីវកម្មមិនសូវសំខាន់មួយចំនួន ត្រូវបិទទ្វារបណ្ដោះអាសន្ន ដូចជា ហាងម៉ាស្សា, ការ៉ាអូខេ,ទីតាំងកម្សាន្ដ, រោងកុន, ហាងកែសម្ផស្ស, ហាងលក់ស្រាបៀរ, ភោជនីយដ្ឋាន, និងហាងបាយជាដើម ត្រូវបិទទ្វារហូតដល់ថ្ងៃទី ១៥ ខែមេសា ដោយរដ្ឋាភិបាលវៀតណាមអះអាងថា ប្រទេសនេះ កំពុងចូលដល់ដំណាក់កាល២សប្ដាហ៍ដ៏សំខាន់ ក្នុងការប្រយុទ្ធប្រឆាំងនឹង Covid-19។
ប្រសិនបើ បញ្ហា Covid-19 នៅតែបន្ដ នៅរយៈពេល ៦ខែ នោះនឹងមាន ៧៤% នៃក្រុមហ៊ុននៅវៀតណាមនឹងត្រូវក្ស័យធន ដោយសារតែចំណូលធ្លាក់ចុះ នេះបើតាមការស្ទង់មតិមួយ ដែលធ្វើឡើងដោយស្ថាប័នក្រុមប្រឹក្សាស្រាវជ្រាវអភិវឌ្ឍន៍សេដ្ឋកិច្ចឯកជន ជាមួយនឹងក្រុមហ៊ុនជាង ១.២០០ ក្រុមហ៊ុន កាលពីដើមខែមីនា៕
None
