សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកាលពីថ្ងៃទី១៦ ខែវិច្ឆិកា បានសរសរលិខិតមួយស្នើសុំគោលការណ៍ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីតែងតាំងឯកឧត្តម ជាវ តាយ អភិបាលខេត្តពោធិ៍សាត់ ទៅជារដ្ឋលេខាធិការក្រសួងមហាផ្ទៃ និងដំឡើងតំណែងឯកឧត្តម ខូយ ដារី ពីអភិបាលរងខេត្តបាត់ដំបងជាអភិបាលខេត្តពោធិ៍សាត់ជំនួសវិញ។ លិខិតនេះទទួលបានការចារឯកភាពពីសម្តេចតេជោ ហ៊ុន សែនផងដែរ កាលពីថ្ងៃទី ១៦ ខែវិច្ឆិា ឆ្នាំ២០២២។
អត្ថបទគួរអាន
បើគ្មានការប្រែប្រួលទេសម្តេចក្រឡាហោម ស ខេង នឹងចូលរួមប្រកាសតែងតាំងឯកឧត្តម ខូយ ដារី ជាអភិបាលខេត្តនៅថ្ងៃចន្ទសប្តាហ៍ក្រោយនេះ។ សម្តេចក្រឡាហោម បានគូសបញ្ជាក់ប្រាប់អ្នកសារព័ត៌មាននៅក្រោយកិច្ចប្រជុំលើកទី៥ គណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេវរកម្ម និងហិរញ្ញប្បទានដល់ការរីកសាយភាយអាវុធមហាប្រល័យ (គ.ស.ហ) យ៉ាងដូច្នេះថា ឯកឧត្តម ជាវ តាយ ពុំមានកំហុសនោះទេពេលកាន់តំណែងជាអភិបាលខេត្ត ហើយការដោះដូរតំណែងនេះ ក៏ដោយសារ ឯកឧត្តម មានបញ្ហាសុខភាព ដែលត្រូវការពេលវេលាដើម្បីព្យាបាល ហើយវាជាការចង់បានរបស់ឯកឧត្តម និងក្រុមគ្រួសារ។
គួររំលឹកផងដែរថា ឯកឧត្តម ជាវ តាយ ត្រូវបានផ្ទេរតំណែងពីអភិបាលខេត្តកំពតទៅកាន់តំណែងជាអភិបាលខេត្តពោធិ៍សាត់ ជំនួសឯកឧត្តម ម៉ៅ ធនិន កាលពីអំឡុងខែតុលា ឆ្នាំ២០២១ ខណៈឯកឧត្តម ម៉ៅ ធនិន ផ្លាស់ទៅកាន់តំណែងជាអភិបាលខេត្តកំពតវិញ។ ដោយឡែកសម្រាប់ឯកឧត្តម ខូយ ដារី មុនផ្ទេរទៅកាន់តំណែងជាអភិបាលរងខេត្តបាត់ដំបង និងត្រូវបន្ដផ្ទេរមកកាន់តំណែងអភិបាលខេត្តពោធិ៍សាត់ ឯកឧត្តម ក៏ធ្លាប់កាន់តំណែងជាអភិបាលរងខេត្តពោធិ៍សាត់ពីមុនមកផងដែរ៕
