នៅក្នុងកិច្ចសម្ភាសជាមួយសារព័ត៌មានខេមបូណូមីស ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា សង្កេតឃើញថា នៅ២ខែដំបូងក្នុងឆ្នាំ២០២៤ នេះ សេដ្ឋកិច្ចកម្ពុជា បានបង្ហាញសញ្ញាកើនឡើងគួរឱ្យចាប់អារម្មណ៍ ហើយវាស្របទៅនឹងអ្វីដែលអ្នកជំនាញ និងស្ថាប័នអន្តរជាតិ បានព្យាករនាពេលកន្លងទៅ។ បើតាមមេផ្សារហ៊ុនរូបនេះ កត្តាដែលអាចបញ្ជាក់ថា សេដ្ឋកិច្ចកម្ពុជា មានភាពល្អប្រសើរ គឺផ្នែកលើកំណើននៃការធ្វើពាណិជ្ជកម្មរបស់កម្ពុជា ជាមួយបណ្ដាប្រទេសនានានៅដើមឆ្នាំនេះ មានការកើនឡើង២០% គួបផ្សំការធ្វើចរាចរណ៍របស់ពលរដ្ឋហាក់មានភាពមាញឹកខ្លាំងជាងមុន ព្រមទាំងវិស័យទេសចរកំពុងទទួលបានភ្ញៀវទេសចរជាតិ និងអន្តរជាតិច្រើនជាងមុន។
សូមបញ្ជាក់ថា កាលពីថ្ងៃទី៣១ ខែមករា ឆ្នាំ២០២៤ មូលនិធិរូបិយវត្ថុអន្តរជាតិ(IMF) បានព្យាករណ៍ថា កំណើនសេដ្ឋកិច្ចកម្ពុជាស្ថិតក្នុងអត្រា៦,១% ខណៈអតិផរណានឹងមានក្នុងរង្វង់៣%នៅឆ្នាំនេះ។ កំណើននេះ ជំរុញដោយការស្ទុះងើបឡើងវិញ នៃសេដ្ឋកិច្ចក្នុងតំបន់ និងពិភពលោក ជាពិសេសប្រទេសចិន និងសហរដ្ឋអាម៉េរិក៕
អត្ថបទ៖ បូ ដូឡា
