រដ្ឋាភិបាលសហរដ្ឋអាមេរិកបានប្រកាសហាមឃាត់ការហោះហើរទាំងអស់របស់រុស្ស៊ី ហោះហើរចូលក្នុងដែនអាកាសអាមេរិក ខណៈដែលសម្ព័ន្ធមិត្តអាមេរិក រួមមាន សហភាពអឺរ៉ុប អង់គ្លេស និងកាណាដា ក៏បានប្រកាសពីចំណាត់ការស្រដៀងគ្នានឹងអាមេរិកនេះដែរ។ ប្រការនេះ កំពុងធ្វើឱ្យរុស្ស៊ីកាន់តែឯកោតែលតោលបន្ថែមទៀត ទៅមុខក៏មិនរួច ទៅក្រោយក៏មិនទាន់រួចនៅឡើយ និយាយឲ្យស្រួលស្តាប់កំពុងតែជាប់ផុងហើយ បន្ទាប់ពីមហាអំណាចយោធាលំដាប់ទី២ក្នុងពិភពលោកមួយនេះ បានចូលលុកលុយលើអ៊ុយក្រែន រងសម្ពាធដាក់ទណ្ឌកម្មពីគ្រប់ច្រកល្ហក និង គ្រប់រូបភាពទាំងអស់។ នេះបើយោងតាមការចុះផ្សាយដោយសារព័ត៌មានអន្តរជាតិធំៗ។
ក្រោយពីការប្រកាសរបស់ប្រធានាធិបតីអាមេរិក លោកចូ បៃឌិន ការអនុវត្តបទបញ្ជានេះនឹងត្រូវចូលជាធរមាននៅថ្ងៃពុធទី០២នេះតទៅ ហើយនឹងផ្អាកប្រតិបត្តិការនៃយន្តហោះទាំងអស់ដែលជាកម្មសិទ្ធិ ឬមានប្រតិបត្តិការទាក់ទង ឬគ្រប់គ្រង ឬផ្ដល់ផលប្រយោជន៍ ទៅឲ្យបុគ្គលដែលមានសញ្ជាតិរុស្ស៊ី។ ការបិទខ្ទប់ដែនអាកាសការហោះហើរទៅលើប្រទេសរុស្ស៊ីនេះ គឺរាប់ទាំងពីការដឹកអ្នកដំណើរ និងដឹកទំនិញ រួមទាំងជើងហោះហើរពិសេស charter Flights ផងដែរ។
ជាការឆ្លើយតបនឹងការបិទដែនអាកាសពីប្រទេសលោកខាងលិច រុស្ស៊ី ថ្មីៗនេះ ក៏បានចាត់វិធានការឆ្លើយតបវិញដែរ ដោយបានបិទខ្ទប់ក្រុមហ៊ុនអាកាសចរណ៍ពីរដ្ឋចំនួន៣៦ ប្រទេស និងដែនដី មិនឲ្យធ្វើដំណើរចេញពីដែនអាកាសរបស់ខ្លួនដូចគ្នាដែរ។ នេះបើតាមការរាយការណ៍ពីសារព័ត៌មានរដ្ឋរុស្ស៊ី RT។
អត្ថបទគួរអាន
គួរជម្រាបថា ការបិទជើងហោះហើរទៅលើរុស្ស៊ីពីសំណាក់សហភាពអឺរ៉ុប និងអាមេរិកនឹងធ្វើឱ្យប្រព័ន្ធអាកាសចរណ៍របស់រុស្ស៊ីចុះខ្សោយខ្លាំង។ ការរឹតបន្តឹងថ្មីដែលនឹងចូលជាធរមានឆាប់ៗនេះ នឹងបង្កើតជាវិធានការដ៏ធំទូលាយមួយដោយបណ្ដាប្រទេសលោកខាងលិច ដែលវាអាចរំខានដល់ឧស្សហកម្មអាកាសចរណ៍ពាណិជ្ជកម្មរបស់រុស្ស៊ី និងអាចជះឥទ្ធិពលដល់ឧស្សាហកម្មអាកាសចរណ៍អន្តរជាតិដូចគ្នាដែរ។
រហូតមកដល់ពេលនេះ បើយោងតាមសារព័ត៌មានរដ្ឋរុស្ស៊ី RT បានឱ្យដឹងថា ទេសចររុស្ស៊ីរាប់ពាន់នាក់បានជាប់គាំងបន្ទាប់ពីមានការប្រកាសហាមឃាត់ការហោះហើរពីរុស្ស៊ីពេលនេះ។ យោងតាមសមាគមទីភ្នាក់ងារទេសចរណ៍នៃប្រទេសរុស្ស៊ីបានឱ្យដឹងថា ភ្ញៀវទេសចរជាង ២ម៉ឺន ៧ពាន់នាក់នៅជុំវិញពិភពលោកត្រូវបានទុកចោលមិនអាចធ្វើដំណើរបាន បន្ទាប់ពីសហភាពអឺរ៉ុប និងកាណាដាបានបិទដែនអាកាសរបស់ពួកគេចំពោះក្រុមហ៊ុនអាកាសចរណ៍រុស្ស៊ីផង។
យ៉ាងណាមិញ នៅក្នុងសប្ដាហ៍នេះ បន្ទាប់ពីមានការប្រកាសបិទដែនអាកាសពីប្រទេសលោកខាងលិច មានជើងហោះហើរចេញចូលទៅកាន់អាកាសយានដ្ឋាននៅក្នុងទីក្រុងម៉ូស្គូជាង ១០០ជើងត្រូវបានលុបចោលផងដែរ។ នេះបើតាមការរាយការណ៍ពីសារព័ត៌មាន Washington Post៕
អត្ថបទ ស៊ើង និមល់
None
