នៅក្នុងសន្និសីទសារព័ត៌មានថ្មីៗនេះ លោកស្រី ចេន សាគី (Jen Psaki) បានលើកឡើងដោយប្រៀបធៀបថា នៅពេលនេះ ករណីឆ្លងរីករាលដាលកូវីដ-១៩ ថ្មីៗនេះ ក៏ដូចជាវត្តមានមេរោគបំប្លែងថ្មី ឌែលតា មិនទាន់អាចធ្វើឲ្យអាមេរិកឈានទៅបិទខ្ទប់សេដ្ឋកិច្ចរបស់ខ្លួន ឬ បិទសាលារៀននោះទេ ដ្បិតថា ស្ថានភាពនាពេលនេះ គឺអាមេរិករឹងមាំជាងមុន តាំងពីពេលដែលរដ្ឋាភិបាល លោកចូបៃឌិន ចូលដឹកនាំប្រទេសមក។
បើទោះបីជាស្ថានភាពការងារនៅក្នុងសហរដ្ឋអាមេរិកហាក់មានភាពស្ទុះងើបវិញបន្ដិចក្ដី ប៉ុន្ដែ នៅមួយរយៈពេលចុងក្រោយនេះ ការឆ្លងកូវីដ-១៩ នៅតែបន្ដកើនឡើង ខណៈដែលការតម្រូវឲ្យពាក់ម៉ាស់ត្រូវបានបន្ដធ្វើឡើងវិញ រីឯការចាក់វ៉ាក់សាំងក៏ត្រូវបានតម្រូវនៅតាមស្ថាប័នមួយចំនួនដែរ។
យ៉ាងណាក៏ដោយចុះ វ៉ាក់សាំងកូវីដ-១៩ ត្រូវបានចាក់ជូនពលរដ្ឋបានទូលំទូលាយ គឺនៅក្នុងអំឡុងពេលដែលលោកបៃឌិន បានចូលមកកាន់តំណែងប្រធានាធិបតី ហើយបើគិតមកទល់ពេលនេះ អាមេរិកមានពលរដ្ឋសរុប ១៩៣លាននាក់ហើយ ដែលបានចាក់វ៉ាក់សាំងកូវីដ-១៩ចំនួន ១ដូស ខណៈដែលក្នុងចំណោមវ៉ាក់សាំងដែលត្រូវបានអនុម័តឲ្យប្រើប្រាស់នៅអាមេរិកចំនួន៣ប្រភេទ គឺមាន២ប្រភេទតម្រូវឲ្យចាក់២ដូសក្នុងម្នាក់ ខណៈដែល១ប្រភេទទៀត គឺចាក់តែ១ដូសប៉ុណ្ណោះ។
អត្ថបទគួរអាន
អត្រាអ្នកគ្មានការងារធ្វើនៅអាមេរិក គិតមកទល់ពេលនេះ មានប្រមាណ ៥,៤% ខណៈដែលកាលពីអំឡុងពេលមានការបិទអាជីវកម្មដោយសារតែការផ្ទុះកូវីដ-១៩រាតត្បាតលើកដំបូង ក្នុងអំឡុងខែ មេសា ឆ្នាំ២០២០ អត្រាអ្នកគ្មានការងារធ្វើនៅអាមេរិកមានដល់ជិត១៥%ឯណោះ។
បើមើលទៅលើតួលេខករណីឆ្លងកូវីដ១៩ប្រចាំថ្ងៃនៅអាមេរិក នៅមួយរយៈចុងក្រោយនេះ មានប្រមាណ ១០ម៉ឺននាក់ក្នុងមួយថ្ងៃ គឺមានការកើនឡើងដល់ទៅ ១០ដង បើធៀបនឹងករណីឆ្លងប្រចាំថ្ងៃកាលពីខែមិថុនា។ ចំពេលស្ថានភាពឆ្លងកូវីដ-១៩ កើនឡើង ក្រុមហ៊ុនដ៏ធំមួយរបស់អាមេរិកគឺ Amazon បានប្រាប់ទៅកាន់បុគ្គលិករបស់ខ្លួននៅសប្ដាហ៍នេះថា ពួកគេមិនត្រូវមកធ្វើការងារក្នុងការិយាល័យនោះទេ គឺរង់ចាំដល់ខែ មករាឆ្នាំ២០២២។ ទន្ទឹមនឹងករណីឆ្លងបន្ដកើនឡើងនេះ ក៏មានការព្រួយបារម្ភជាថ្មីទៀតថា សាលារៀននៅអាមេរិកក៏អាចនឹងត្រូវបន្ដឲ្យរៀនពីចម្ងាយ តាមអនឡាញផងដែរ។
សូមបញ្ជាក់ថា ថ្មីៗនេះ អាមេរិកបានសម្រេចបន្ដរឹតត្បិតការធ្វើដំណើរចេញចូលក្រៅប្រទេសដដែល ហើយថ្មីៗនេះ រដ្ឋាភិបាលអាមេរិក ក៏មានផែនការនឹងចេញវិធានការកំណត់ឲ្យភ្ញៀវទេសចរចូលសហរដ្ឋអាមេរិក ត្រូវតែបានចាក់វ៉ាក់សាំងគ្រប់ចំនួនដូស ទើបអាចចូលបាន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
