អេស៊ីលីដាចូលរួមផ្តល់ឥណទានសម្រាប់ការស្តារ និងជំរុញកំណើនវិស័យទេសចរណ៍ ក្នុងអត្រាការប្រាក់ទាបត្រឹមតែ ៦,៥% ក្នុងមួយឆ្នាំ

ធនាគារអេស៊ីលីដា ដែលជាធនាគារពាណិជ្ជខ្មែរ ដ៏ធំជាងគេមួយនៅកម្ពុជា បានចូលរួមជាមួយនឹងរាជរដ្ឋាភិបាលកម្ពុជា ក្នុងការអនុវត្តគម្រោងសហហិរញ្ញប្បទានសម្រាប់ការស្ដារ និងជំរុញកំណើនវិស័យទេសចរណ៍ ក្នុងទំហំទឹកប្រាក់សរុប ១៥០លានដុល្លារ ខណៈដែលគម្រោងនេះ មានការចូលរួមផ្ដល់មូលនិធិ ៥០% ពីរាជរដ្ឋាភិបាលតាមរយៈធនាគារសហគ្រាសធុនតូច និងមធ្យម និង៥០% ទៀតមានការចូលរួមពីគ្រឹះស្ថានធនាគារ និងហិរញ្ញវត្ថុឯកជន។

លោក សឹង ភន នាយកប្រតិបត្តិឥណទានរបស់ធនាគារអេស៊ីលីដាបានមានប្រសាសន៍ថា គម្រោងសហហិរញ្ញប្បទាន គឺពិតជាមានសារៈសំខាន់ក្នុងការចូលរួមចំណែកស្តារការងើបឡើងវិញនៃម្ចាស់អាជីវកម្មនិងសហគ្រិននានាក្នុងវិស័យទេសចរណ៍ ជាមួយនិងការទទួលបានប្រាក់កម្ចីដែលមានអត្រាការប្រាក់ទាប។

លោកបានថ្លែងយ៉ាងដូច្នេះថា «គម្រោងនេះគឺជាគម្រោងដ៏ល្អមួយដែលផ្តល់ឱកាសដល់សហគ្រិនដែលមានអាជីវកម្មក្នុងវិស័យទេសចរណ៍ដោយពួកគាត់អាចទទួលបានប្រាក់កម្ចី ដែលមានអត្រាការប្រាក់ដ៏ល្អគឺអតិបរមាត្រឹម ៦,៥ភាគរយតែប៉ុណ្ណោះក្នុង១ឆ្នាំ។ ស្របជាមួយគ្នានោះ គឺមិនមានការគិតសោហ៊ុយផ្សេងៗផងដែរ ដូច្នេះសូមអតិថិជនដែលមានអាជីវកម្មក្នុងវិស័យនេះ សូមប្រញាប់រួសរាន់ដាក់ពាក្យសុំកម្ចីមកធនាគារអេស៊ីលីដាព្រោះថា ទឹកប្រាក់កម្ចីក្នុងគម្រោងនេះមានចំនួនកំណត់»។

សម្រាប់គម្រោងនេះ មានគោលដៅផ្តល់ហិរញ្ញប្បទានដល់ម្ចាស់អាជីវកម្មក្នុងវិស័យ ទេសចរណ៍ រួមមានដូចជា៖ សណ្ឋាគារ, ផ្ទះសំណាក់, ភោជនីយដ្ឋាន, ការផ្គត់ផ្គង់អាហារ និងភេសជ្ជៈ និង ការផ្គត់ផ្គង់ផលិតផល-សេវាកម្មដទៃទៀត ដែលគាំទ្រឧស្សាហកម្មទេសចរណ៍ ដែលមានតម្រូវការឥណទានសម្រាប់ធ្វើប្រតិបត្តិការអាជីវកម្មឡើងវិញ កែលម្អ និងទំនើបកម្ម ពង្រីកខ្លួនបន្ថែម។