របាយការណ៍របស់ធនាគារ ADB ដែលមានចំណងជើងថា «ផលប៉ះពាល់សេដ្ឋកិច្ចនៃការផ្ទុះឡើងនៃមេរោគ Covid-19 មកលើប្រទេសកំពុងអភិវឌ្ឍន៍នៅអាស៊ី» ដែលបានចេញផ្សាយកាលពីសប្ដាហ៍មុននេះ បានឲ្យដឹងថា បញ្ហា Covid-19 នឹងធ្វើឲ្យប៉ះពាល់ដល់សេដ្ឋកិច្ច ប្រទេសកម្ពុជា ១,៥៩% ខណៈដែល ប្រទេសកោះម៉ាល់ឌីវ ដែលឈរមុខកម្ពុជានឹងរងប៉ះពាល់ ២,០៥% ។ ទន្ទឹមនឹងនោះ ប្រទេសដែលតាមពីក្រោយកម្ពុជា ក្នុងចំណោមប្រទេសរងផលប៉ះពាល់សេដ្ឋកិច្ចព្រោះ Covid-19ដែរនោះ មានដូចជា ប្រទេសថៃ មាន ១,១១% , ហុងកុងប្រទេសចិន មាន ០,៨៥% , សាធារណៈរដ្ឋប្រជាមានិតចិន មាន ០,៧៦% , ម៉ុងកាលី មាន០,៧៤% , សាំងហ្គាពួរមាន ០,៥៧% , ទីក្រុងតែប៉ិប្រទេសចិន ០,៤៤% និងប្រទេសវៀតណាម មាន ០,៤១%។
ធនាគារ ADB៖ បញ្ហា Covid-19 ធ្វើឲ្យប៉ះពាល់សេដ្ឋកិច្ចកម្ពុជា ១,៥៩%
អត្ថបទគួរអាន!
បើតាមធនាគារ ADB មានកត្តាមួយចំនួន ដែលធ្វើឲ្យការផ្ទុះរាលដាលនៃវីរុស Covid-19 នឹងធ្វើឲ្យប៉ះពាល់ដល់សកម្មភាពសេដ្ឋកិច្ច នៅក្នុងប្រទេសកំពុងអភិវឌ្ឍន៍នៅអាស៊ី និងពិភពលោក។ ក្នុងនោះ រួមបញ្ចូលទាំងការការធ្លាក់ចុះបណ្ដោះអាសន្ននៃការប្រើប្រាស់ក្នុងស្រុកនៃប្រទេសចិន និងការប៉ះពាល់ផ្សេងទៀត ទៅលើសេដ្ឋកិច្ច ហើយវាក៏អាចប៉ះពាល់ដល់ការវិវនិយោគផងដែរ ប្រសិនបើឥទ្ធិពលនៃការផ្ទុះរាលដាលនេះ ធ្វើឲ្យមានប៉ះពាល់ដល់ទស្សនវិស័យលើសកម្មភាពអាជីវកម្មនាពេលអនាគត, ការធ្លាក់ចុះនៃវិស័យទេសចរណ៍ និងការធ្វើដំណើរលក្ខណៈធុរកិច្ច, ការធ្លាក់ចុះនៃតម្រូវការកាន់តែចុះខ្សោយ ចំពោះវិស័យផ្សេងៗ និងសេដ្ឋកិច្ចតាមរយៈការធ្វើពាណិជ្ជកម្ម និងខ្សែច្រវាក់ផលិតកម្ម, បញ្ហាការផ្គត់ផ្គង់ធ្វើឲ្យមានការរំខានដល់ការផលិត និងពាណិជ្ជកម្ម និងផលប៉ះពាល់លើសុខភាពមនុស្ស ដូចជាការកើនឡើងនៃជំងឺ និងអត្រាមរណភាពជាដើម។
ធនាគារ ADB គូសបញ្ជាក់ទៀតថា ផលប៉ះពាល់ធ្ងន់ធ្ងរ នឹងមានចំពោះសមាជិកប្រទេសកំពុងអភិវឌ្ឍន៍ ដែលជាប្រទេសមានទំនាក់ទំនងការធ្វើពាណិជ្ជកម្ម និងការផលិតជិតស្និទ្ធជាមួយនឹងប្រទេសចិនដីគោក។ បន្ថែមពីនេះ ប្រទេស ឬដែនដី ដែលមានសេដ្ឋកិច្ចពឹងផ្អែកលើវិស័យទេសចរណ៍ និងសេដ្ឋកិច្ចកំពុងអភិវឌ្ឍន៍ផ្សេងទៀត នៅអាស៊ី ដូចជា ទីក្រុងហុងកុង, ម៉ុងកាលី, ហ្វីលីពីន, សិង្ហបុរី, ទីក្រុងតៃប៉ិ និងវៀតណាមជាដើម នឹងត្រូវរងផលប៉ះពាល់ដោយសារការផ្ទុះឡើងនៃមរោគ Covid-19 នេះដូចគ្នាដែរ។ ភាគច្រើននៃសេដ្ឋកិច្ចទាំងនេះ គឺទទួលបានប្រយោជន៍ខ្លាំងពី ភ្ញៀវទេសចរមកពីប្រទេសចិនដីគោក។
ធនាគារ ADB គូសបញ្ជាក់ថា «ការខាតបង់សេដ្ឋកិច្ចនឹងអាស្រ័យលើររៀបដែលជាប់ទាក់ទងនឹងការផ្ទុះឡើងនៃមេរោគ Covid-19នោះ ហើយវានៅតែមានភាពមិនប្រាកដប្រជាខ្ពស់។ ចំណាត់ថ្នាក់នៃសេណារីយ៉ូ រកឃើញថា ផលប៉ះពាល់ជាសកល នឹងមានតម្លៃ ៧៧ពាន់លានដុល្លារ ទៅ ៣៤៧ ពាន់លានដុល្លារ ឬស្មើនឹងអត្រា ០,១% ទៅ០,៤% នៃសេដ្ឋកិច្ចរបស់សកលលោក។ បើធ្វើការប៉ាន់ប្រមាណជាមធ្យមគឺប៉ះពាល់ ១៥៦ ពាន់លានដុល្លារអាមេរិក ឬស្មើនឹង ០,២% នៃ កំណើនសេដ្ឋកិច្ចសកល។ ២ភាគ៣ នៃផលប៉ះពាល់ គឺធ្លាក់ទៅលើសាធារណរដ្ឋប្រជាមានិតចិន ដែលជាកន្លែងផ្ទុះឡើងនៃមេរោគ និងកំពុងបន្តរីករាលដាលខ្លាំង»៕
None
