ផ្ទះតម្លៃសមរម្យដំបូងគេបង្អស់នៅកម្ពុជាកំពុងសម្រុកការសាងសង់កាន់តែខ្លាំង!

គម្រោងផ្ទះតម្លៃថោកនិងមធ្យមដំបូងគេបង្អស់នៅកម្ពុជារបស់សេដ្ឋីអចលនទ្រព្យ និង ឡូជីស្ទីក ដ៏ល្បីល្បាញមួយរូប សព្វថ្ងៃ កំពុងតែបន្ថែមល្បឿនសាងសង់កាន់តែខ្លាំង ដើម្បីឆ្លើយតបទៅនឹងការទន្ទឹងរង់ចាំយ៉ាងអន្ទះសា ពីសំណាក់អតិថិជនដែលបានចុះឈ្មោះទិញផ្ទះតម្លៃសមរម្យ នៅក្នុងគម្រោងទីក្រុងរណបសិរីមង្គលរបស់ក្រុមហ៊ុនលោកឧកញ៉ា សៀ ឫទ្ធី កន្លងមកនេះ។

ផ្ទះតម្លៃសមរម្យដំបូងគេបង្អស់នៅកម្ពុជាកំពុងសម្រុកការសាងសង់កាន់តែខ្លាំង! រូបថតនៅថ្ងៃទី១៩ វិច្ឆិកា ២០១៨។

លោក យក់ សុធីរិទ្ធ ប្រធានគ្រប់គ្រងទូទៅគម្រោងលំនៅដ្ឋានតម្លៃសមរម្យរបស់ក្រុមហ៊ុន WorldBridge Home បានឲ្យដឹងថា ក្នុងដំណាក់កាលដំបូងនេះ នឹងចាប់ផ្ដើមប្រគល់ផ្ទះជូនអតិថិជនចាប់ពីត្រីមាសទី១ ឆ្នាំ២០១៩ តទៅ។ បច្ចុប្បន្ន គម្រោងនេះកំពុងតែពន្លឿនការសាងសង់ជាប់ជានិច្ច និងមិនមានការប្រែប្រួលអ្វីនោះទេ។

លោក សុធីរិទ្ធិ បានបញ្ជាក់អះអាងថា នៅត្រីមាសទី១ ឆ្នាំ២០១៩ខាងមុខនេះ គម្រោងលំនៅដ្ឋានតម្លៃសមរម្យ នៅក្នុងគម្រោងទីក្រុងរណបសិរីមង្គលរបស់ក្រុមហ៊ុន WorldBridge Home សម្រាប់លក់ជូនប្រជាពលរដ្ឋចំណូលទាបនិងមធ្យម ពិសេស គឺមន្ត្រីរាជការ នឹងត្រូវសាងសង់រួចរាល់ប្រមាណ ៣០០ ទៅ ៤០០ខ្នង នៅដំណាក់កាលដំបូងនេះ សម្រាប់ប្រគល់ជូនអតិថិជនរបស់ខ្លួន។

ទស្សនាវីដេអូប្លង់មេ នៃគម្រោងទីក្រុងរណប សិរីមង្គល

បើតាមការកំណត់គោលដៅរបស់ក្រុមហ៊ុន នៅត្រឹមដើមឆ្នាំ២០២០ ក្រុមហ៊ុននឹងបញ្ចប់ការសាងសង់លំនៅដ្ឋានតម្លៃសមរម្យនេះ ឲ្យបានចប់រួចរាល់ទាំងស្រុងតែម្ដង។

នាយកគ្រប់គ្រងគម្រោងរូបនេះ បានឲ្យដឹងទៀតថា គម្រោងលំនៅដ្ឋានតម្លៃសមរម្យនេះត្រូវបានសាងសង់ឡើងដោយមានការយកចិត្តទុកដាក់តាមស្ដង់ដារបច្ចេកទេស និងមានការអភិវឌ្ឍដូចជា សាលារៀន មន្ទីរពេទ្យ និងផ្សារនៅទីនោះផងដែរ។

គម្រោងផ្ទះតម្លៃសមរម្យមួយនេះ បាននិងកំពុងអភិវឌ្ឍនៅលើផ្ទៃដីជាង ២០ហិកតា ស្ថិតនៅតាមបណ្តោយផ្លូវជាតិលេខ២១ ក្នុងឃុំរកាខ្ពស់ ស្រុកស្អាង ខេត្តកណ្តាល ប្រមាណ ៨គីឡូម៉ែត្រ ពីទីក្រុងតាខ្មៅ។

បើតាមការគូសបញ្ជាក់ពីនាយកគ្រប់គ្រងគម្រោងលំនៅដ្ឋានតម្លៃសមរម្យ លោក យក់ សុធីរិទ្ធ បានឲ្យដឹងថា អ្វីដែលជាលក្ខណៈពិសេសរបស់គម្រោងនេះ គឺវាស្ថិតនៅក្នុងគម្រោងទីក្រុងរណបសិរីមង្គលរបស់ក្រុមហ៊ុន WorldBridge Home ហើយនៅក្បែរតំបន់នេះ ក៏មានបង្កើតជាកន្លែងបណ្ដុំសហគ្រាសធុនតូចនិងមធ្យមមួយនៅទីនោះផងដែរ ដែលវានឹងជួយឲ្យពលរដ្ឋដែលរស់នៅទីនេះអាចស្វែងរកឱកាសការងារកាន់តែងាយស្រួល។

ពិសេសជាងនេះទៀតនោះ គឺតំបន់នេះមានផ្លូវក្រវាត់ក្រុងទី៣ នៅក្បែរនោះ ហើយទីស្នាក់ការខេត្តក៏គ្រោងនឹងរើទីតាំងមកនៅក្បែរតំបន់ទីក្រុងរណបសិរីមង្គលនេះផងដែរ។ ដូច្នេះ អ្នករស់នៅតំបន់នោះ នឹងចំណេញទាំងផ្នែកសេដ្ឋកិច្ច និងរចនាសម្ព័ន្ធទូទៅ គឺមានសព្វគ្រប់ទាំងអស់។ នេះបើតាមការបង្ហើបឲ្យដឹងពីលោក យក់ សុធីរិទ្ធ។

តាមប្រសាសន៍របស់មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ ធ្លាប់បានឲ្យដឹងថា ក្រៅពីគម្រោងអភិវឌ្ឍន៍លំនៅដ្ឋាន និងទីក្រុងរណប ក្រសួងរៀបចដែនដី ក៏បានគិតគូរអភិវឌ្ឍលំនៅដ្ឋានដែលមានតម្លៃសមរម្យសម្រាប់ប្រជាពលរដ្ឋដែលមានចំណូលទាប និងមធ្យម ឲ្យបានចំនួនបីទីតាំងបន្ថែមទៀត ស្មើនឹង ៨ពាន់លំនៅដ្ឋាន ហើយតាមការគិតគូរជំរឿនប្រជាសាស្រ្ត នៅឆ្នាំ២០៣០ ខាងមុខ ប្រជាពលរដ្ឋកម្ពុជាប្រមាណ ១៨លាននាក់ នឹងមានតម្រូវការលំនៅដ្ឋានថ្មី ប្រមាណ ១,១លានខ្នងបន្ថែមទៀត ខណៈនៅរាជធានីភ្នំពេញ និងទីប្រជុំជនផ្សេងៗ មានតម្រូវការលំនៅដ្ឋាន ៥ម៉ឺនខ្នងក្នុងមួយឆ្នាំ៕