ការចុះផ្សាយរបស់សារព័ត៌មាន VN Express ឲ្យដឹងថា កាលពីថ្ងៃទី២២ វិច្ឆិកា ២០១៨ តុលាការប្រជាជនក្រុងហូជីមិញ បានផ្ដន្ទាទោសលោក Huynh Nam Dung ឲ្យជាប់ពន្ធនាគាររយៈពេល ១៣ឆ្នាំ រួមទាំងអ្នកសមគំនិតពីរនាក់ទៀត គឺអតីតអគ្គនាយក ឈ្មោះ Nguyen Phuoc Hoa និងអតីតអគ្គនាយកក្រុមហ៊ុន មូលបត្រ របស់ធនាគារ លំនៅដ្ឋាន មេគង្គ ឲ្យជាប់ពន្ធនាគារ ១០ឆ្នាំ និង ១១ឆ្នាំម្នាក់ៗ។
យោងតាមសាលក្រម ចន្លោះឆ្នាំ២០១១ និងឆ្នាំ២០១៤ លោក Dung ដែលជាប្រធានក្រុមប្រឹក្សាភិបាលធនាគារ និងលោក Hoa បានប្រើប្រាស់មុខតំណែងរបស់ខ្លួន ធ្វើការផ្ទេរប្រាក់ ២១៣លានដុល្លារអាមេរិក ពីធនាគារ លំនៅដ្ឋាន មេគង្គ ដែលគ្រប់គ្រងដោយរដ្ឋ ទៅឲ្យក្រុមហ៊ុន មូលបត្រ ធនាគារលំនៅដ្ឋានមេគង្គ ដោយមានចំណែកគ្រប់គ្រងភាគហ៊ុនជាម្ចាស់ ៦០%។ គោលបំណងនៃប្រាក់នេះ គឺដើម្បីសហការវិនិយោគលើសញ្ញាប័ណ្ណ (bonds) របស់រដ្ឋាភិបាល។
បានអានអត្ថបទនេះ ឬនៅ?
ប៉ុន្តែ ក្រុមហ៊ុនមូលបត្រនេះបែរជាយកលុយនេះទៅដាក់ផ្ញើនៅតាមសាខារបស់ធនាគារ លំនៅដ្ឋានមេគង្គ ចំនួន ១៤៣លានដុល្លារអាមេរិក និងបានចំណេញការប្រាក់ចំនួន ១,៩២លានដុល្លារអាមេរិក។
ទន្ទឹមនឹងនេះ ក្រុមហ៊ុនមូលបត្រដដែល បានប្រើប្រាស់លុយជា 63លានដុល្លារអាមេរិក វិនិយោគទៅលើការទិញសញ្ញាប័ណ្ណ ក្នុងនោះទឹកប្រាក់ជាង ៤២លានដុល្លារអាមេរិក ត្រូវបានយកទៅប្រើប្រាស់ដើម្បីលក់ដូរសញ្ញាប័ណ្ណរដ្ឋាភិបាលដែលកាន់កាប់ដោយធនាគារ លំនៅដ្ឋាន មេគង្គ តាមរយៈក្រុមហ៊ុនអន្តរការី។ ទង្វើនេះបាននាំឲ្យធនាគារ លំនៅដ្ឋាន មេគង្គ ខាតបង់ប្រាក់ជិត ១៥លានដុល្លារអាមេរិក៕
